ഇംഗ്ലണ്ട്-നോർവേ ക്വാർട്ടർ ഫൈനൽ : പോര് ആകാശത്തും! എയർലൈൻ കമ്പനികൾ 'വെല്ലുവിളിക്കുന്നു'

നോർവേ:  ഫിഫ ലോകകപ്പ് ക്വാർട്ടർ ഫൈനൽ മത്സരത്തിന് മുന്നോടിയായി സമൂഹമാധ്യമങ്ങളിൽ രസകരമായ പോരുമായി ഇംഗ്ലണ്ട് – നോർവേ എയർലൈൻ കമ്പനികൾ. നോർവീജിയൻ എയർലൈനും ബ്രിട്ടിഷ് എയർവേയ്സുമാണ് തങ്ങളുടെ രാജ്യങ്ങളുടെ ഫുട്ബോൾ ടീമുകൾക്കായി പരസ്യവെല്ലുവിളിയുമായി രംഗത്തെത്തിയത്. ഫുട്ബോൾ ആവേശം വാനോളമുയർന്നതോടെയാണ് ഈ വമ്പൻ കമ്പനികൾ തമ്മിലുള്ള പോര് സോഷ്യൽ മീഡിയയിൽ വൈറലായി മാറിയത്.

മത്സരത്തിൽ നോർവേ വിജയിച്ചാൽ ബ്രിട്ടിഷ് എയർവേയ്സിന്റെ പ്രൊഫൈൽ ചിത്രമായി നോർവീജിയൻ എയർലൈനിന്റെ ലോഗോ വെക്കണമെന്നായിരുന്നു നോർവീജിയൻ എയർലൈനിന്റെ ആദ്യ വെല്ലുവിളി. നേരെമറിച്ച്, ഇംഗ്ലണ്ട് ജയിച്ചാൽ ബ്രിട്ടിഷ് എയർവേയ്സിന്റെ ലോഗോ നോർവീജിയൻ എയർലൈൻ ഉപയോഗിക്കണമെന്നും അവർ ആവശ്യപ്പെട്ടു. ആദ്യം അല്പം മടിച്ചുനിന്ന ബ്രിട്ടിഷ് എയർവേയ്സ്, എന്നാൽ പിന്നീട് വളരെ തന്ത്രപരമായി വെല്ലുവിളി ഏറ്റെടുത്തു. “ജയിക്കാൻ സാധ്യതയില്ലാത്ത വെല്ലുവിളികൾ ഏറ്റെടുക്കാറില്ല” എന്ന് മറുപടി നൽകിയ ബ്രിട്ടിഷ് എയർവേയ്സിനെ “പേടിച്ചുപോയോ” എന്ന് നോർവീജിയൻ എയർലൈൻ പരിഹസിക്കുകയും ചെയ്തു.

ഒടുവിൽ, ഇംഗ്ലണ്ടിന്റെ ലോകകപ്പ് മുദ്രാവാക്യമായ ‘ഇറ്റ്സ് കമിങ് ഹോം’ എന്നെഴുതിയ വിഡിയോ ദൃശ്യം പങ്കുവെച്ചുകൊണ്ട് ബ്രിട്ടിഷ് എയർവേയ്സ് വെല്ലുവിളി ഔദ്യോഗികമായി സ്വീകരിച്ചു. ഇതോടെ ഞായറാഴ്ച നടക്കാനിരിക്കുന്ന നിർണ്ണായക ക്വാർട്ടർ ഫൈനൽ മത്സരത്തിന് അപ്പുറം, ആര് ലോഗോ മാറ്റുമെന്ന കാത്തിരിപ്പിലാണ് ഇപ്പോൾ ഫുട്ബോൾ ആരാധകർ.

2026 ഫിഫ ലോകകപ്പിലെ ഇംഗ്ലണ്ട് vs. നോർവേ ക്വാർട്ടർ ഫൈനൽ മത്സരം നാളെ , ഇന്ത്യൻ സമയം പുലർച്ചെ 2:30 ന് നടക്കും.. ഫ്ലോറിഡയിലെ മിയാമി സ്റ്റേഡിയത്തിലാണ് മത്സരം