രാജ്യത്തിന് പുതിയ പ്രതീക്ഷകൾ നൽകികൊണ്ട്, നേപ്പാൾ പ്രധാനമന്ത്രിയായി ബാലേന്ദ്ര ഷാ സത്യപ്രതിജ്ഞ ചെയ്തു,

കാഠ്മണ്ഡു: ബാലെൻ ഷാ എന്നറിയപ്പെടുന്ന ബാലേന്ദ്ര ഷാ നേപ്പാളിൻ്റെ  പ്രധാനമന്ത്രിയായി  ഇന്ന് സത്യപ്രതിജ്ഞചെയ്തു. മുതിർന്ന രാഷ്ട്രീയ നേതാക്കൾ, സർക്കാർ ഉദ്യോഗസ്ഥർ, വിശിഷ്ടാതിഥികൾ എന്നിവർ പങ്കെടുത്ത ഔപചാരിക ചടങ്ങിൽ പ്രസിഡന്റ് രാം ചന്ദ്ര പൗഡൽ പ്രധാനമന്ത്രി ബാലേന്ദ്ര ഷായ്ക്ക് സത്യവാചകം ചൊല്ലിക്കൊടുത്തു.

ഷാ  ഔദ്യോഗികമായി അധികാരമേറ്റതോടെ നേപ്പാളിന്റെ രാഷ്ട്രീയ യാത്രയിൽ ഒരു പുതിയ അധ്യായത്തിനു തുടക്കം കുറിച്ചിരിക്കയാണ് . ദേശീയ ശ്രദ്ധാകേന്ദ്രമായിമാറിയ  സത്യപ്രതിജ്ഞാ ചടങ്ങ്,  ഒരു പ്രധാന മാറ്റത്തിന് വഴിയൊരുക്കുകയും നേപ്പാളിലെ പൗരന്മാർക്കിടയിൽ പുതിയ പ്രതീക്ഷകൾ ഉയർത്തുകയും ചെയ്തു. ഭരണമേറ്റയുടനെ, പരിചയസമ്പന്നരായ നേതാക്കളേയും  പുതുമുഖങ്ങളേയും  ഉൾപ്പെടുത്തിക്കൊണ്ട്  പ്രധാനമന്ത്രി ഷാ തന്റെ മന്ത്രിസഭ പ്രഖ്യാപിച്ചു. രാഷ്ട്രീയ അനുഭവത്തെ പുതിയ ഊർജ്ജവുമായി സന്തുലിതമാക്കികൊണ്ടുള്ള പുതിയ കേബിനറ്റ് ടീം പരിഷ്കരണത്തിലും ഫലപ്രദമായ ഭരണത്തിലും ശ്രദ്ധ കേന്ദ്രീകരിക്കുന്നതിന്റെ സൂചനയായാണ് രാഷ്ട്രീയ നിരീക്ഷകർ  കാണുന്നത്.

ചടങ്ങിനുശേഷം നടത്തിയ ഹ്രസ്വമായ പ്രസംഗത്തിൽ, സുതാര്യത, ഉത്തരവാദിത്തം, പൊതുസേവനം എന്നിവ തന്റെ ഭരണത്തിന്റെ പ്രധാന മുൻഗണനകളായി ഷാ ഊന്നിപ്പറഞ്ഞു. ദീർഘകാല വെല്ലുവിളികൾ നേരിടുന്നതിനും സേവന വിതരണം മെച്ചപ്പെടുത്തുന്നതിനും സർക്കാർ സ്ഥാപനങ്ങളിലുള്ള പൊതുജന വിശ്വാസം ശക്തിപ്പെടുത്തുന്നതിനുമുള്ള പ്രതിബദ്ധത അദ്ദേഹം പ്രകടിപ്പിച്ചു.നയപരമായ ദിശ രൂപപ്പെടുത്തുന്നതിലും വികസന ശ്രമങ്ങൾ ത്വരിതപ്പെടുത്തുന്നതിലും പുതിയ മന്ത്രിസഭയുടെ രൂപീകരണം നിർണായക പങ്ക് വഹിക്കുമെന്ന് പ്രതീക്ഷിക്കുന്നു. പുതിയ നേതൃത്വം അവരുടെ അജണ്ട രൂപപ്പെടുത്താനും പ്രാരംഭ തീരുമാനങ്ങൾ എടുക്കാനും തുടങ്ങുന്നതിനാൽ വരും ആഴ്ചകൾ നിർണായകമാകുമെന്ന് നിരീക്ഷകർ അഭിപ്രായപ്പെടുന്നു.

പൊതുജന പ്രതീക്ഷകൾ ഉയർന്ന നിലയിൽ തുടരുന്ന സാഹചര്യത്തിൽ, മാറ്റത്തിന്റെയും പുരോഗതിയുടെയും വാഗ്ദാനങ്ങൾ നിറവേറ്റുന്നതിനൊപ്പം പുതിയ സർക്കാർ രാഷ്ട്രീയ ചലനാത്മകതയെ എങ്ങനെ നയിക്കുമെന്നതിലാണ് ഇപ്പോൾ എല്ലാവരുടെയും കണ്ണുകൾ.

റാപ്പറിൽ നിന്നും രാഷ്ട്രീയക്കാരനും പിന്നീട് രാജ്യത്തിൻ്റെ പ്രധാനമന്ത്രിയും 

നേപ്പാളിൻ്റെ ചരിത്രത്തിലെ  ഏറ്റവും പ്രായം കുറഞ്ഞ പ്രധാനമന്ത്രിയാണ് 35 കാരനായ ബാലെൻ ഷാ എന്നറിയപ്പെടുന്ന ബാലേന്ദ്ര ഷാ.കഴിഞ്ഞ  മാർച്ച് 5 ന് നടന്ന പാർലമെന്റ് തിരഞ്ഞെടുപ്പിൽ നേപ്പാളിലെ കമ്മ്യുണിസ്റ്റുപാർട്ടി ഭരണത്തിന്റെ അന്ത്യംകുറിച്ചു കൊണ്ടാണ്   അദ്ദേഹത്തിന്റെ പാർട്ടിയായ ആർ‌എസ്‌പി ചരിത്ര വിജയം  നേടിയത്.

ബാലെൻ ഷായെ   പ്രധാനമന്ത്രി സ്ഥാനാർത്ഥിയായി ഉയർത്തിക്കാട്ടിയ ആർഎസ്പി പ്രതിനിധി സഭയിലെ ആകെയുള്ള 275 സീറ്റുകളിൽ 182 സീറ്റുകൾ നേടി വൻ വിജയം നേടി. പ്രതിനിധി സഭയിലെ 275 അംഗങ്ങളിൽ 165 പേരെ നേരിട്ടുള്ള വോട്ടെടുപ്പിലൂടെയും 110 പേരെ ആനുപാതിക വോട്ടെടുപ്പിലൂടെയുമാണ് തിരഞ്ഞെടുക്കുന്നത്.നേപ്പാൾ കമ്മ്യൂണിസ്റ്റ് പാർട്ടിയുടെ (യൂണിഫൈഡ് മാർക്സിസ്റ്റ്-ലെനിനിസ്റ്റ്) ദീർഘകാല ശക്തികേന്ദ്രമായ ഝാപ -5 മണ്ഡലത്തിൽ നിന്നും നാല് തവണ പ്രധാനമന്ത്രിയായിരുന്ന കെ പി ശർമ്മ ഒലിയെ പരാജയപെടുത്തിയാണ് വൻഭൂരിപക്ഷത്തിൽ ബാലെൻ ഷാ വിജയിക്കുന്നത്.

കഴിഞ്ഞ സർക്കാരിൻ്റെ  അഴിമതിഭരണത്തിൽ ജനം പൊറുതിമുട്ടിയപ്പോൾ , യുവജനത മുന്നോട്ടുവന്ന്  നയിച്ച ശക്തമായ പ്രക്ഷോഭമാണ്  നേപ്പാളിൽ പുതിയ ഭരണമാറ്റത്തിന് വഴിതുറന്നത്.