കാഫിർ സ്ക്രീൻഷോട്ട് കേസ്: ഡിവൈഎഫ്ഐ നേതാവ് ജിതിൻ ഭാസ്കറിന് ജാമ്യം

കോഴിക്കോട്:  വടകര കാഫിർ സ്ക്രീൻഷോട്ട് കേസിൽ ഒന്നാം പ്രതിയും ഡിവൈഎഫ്ഐ നേതാവുമായ ജിതിൻ ഭാസ്കറിന് കടുത്ത ഉപാധികളോടെ ജാമ്യം. കോഴിക്കോട് ജില്ലാ സെഷൻസ് കോടതിയാണ് ജിതിൻ ഭാസ്കറിന്റെ ജാമ്യഹർജി അംഗീകരിച്ച് ഉത്തരവിട്ടത്. നേരത്തെ വടകര ഒന്നാം ക്ലാസ് ജുഡീഷ്യൽ മജിസ്‌ട്രേറ്റ് കോടതി പ്രതിയുടെ ജാമ്യഹർജി  തള്ളിയതിനെ തുടർന്നാണ് ജിതിൻ നിയമോപദേശപ്രകാരം ജില്ലാ സെഷൻസ് കോടതിയെ സമീപിച്ചത്.

ലോക്സഭാ തിരഞ്ഞെടുപ്പ് കാലത്ത് വടകരയിൽ വർഗ്ഗീയ ചേരിതിരിവ് ഉണ്ടാക്കാൻ ലക്ഷ്യമിട്ട് നിർമ്മിച്ച വ്യാജ സ്ക്രീൻഷോട്ട് ആദ്യം പ്രത്യക്ഷപ്പെട്ട ‘വടകര സ്ക്വാഡ്’ എന്ന പിണറായി അനുകൂല വാട്‌സാപ്പ് ഗ്രൂപ്പിന്റെ അഡ്മിൻ ആണ് പിടിയിലായ ജിതിൻ.തനിക്കെതിരെ നടക്കുന്നത് പൂർണ്ണമായും ആസൂത്രണം ചെയ്ത രാഷ്ട്രീയ വേട്ടയാണെന്നായിരുന്നു കോടതിയിൽ ജിതിൻ ഭാസ്കറിന്റെ പ്രധാന പ്രതിരോധ വാദം. ഒരു വ്യക്തി സ്വന്തം വ്യക്തിപരമായ കാരണങ്ങളാൽ ഫോൺ ഫാക്ടറി റീസെറ്റ്  ചെയ്യുന്നതിനെ നിയമപരമായി തെളിവ് നശിപ്പിക്കലായി മാത്രം കണക്കാക്കാൻ സാധിക്കുമോ എന്ന് പ്രതിഭാഗം അഭിഭാഷകൻ കോടതിയിൽ ചോദ്യമുയർത്തി. സ്ക്രീൻഷോട്ട് സോഷ്യൽ മീഡിയയിൽ പ്രചരിച്ചു എന്നതല്ലാതെ വടകര മണ്ഡലത്തിൽ മറ്റ് ക്രമസമാധാന പ്രശ്നങ്ങളോ അനിഷ്ട സംഭവങ്ങളോ ഒന്നും തന്നെ ഉണ്ടായിട്ടില്ലെന്നും, പോലീസിന്റെ അന്വേഷണവുമായി എല്ലാ ഘട്ടത്തിലും പ്രതി പൂർണ്ണമായി സഹകരിച്ചിട്ടുണ്ടെന്നും ജിതിൻ കോടതിയെ ബോധിപ്പിച്ചു. കഴിഞ്ഞ ബുധനാഴ്ച ഇരുഭാഗത്തിന്റെയും വിശദമായ വാദം പൂർത്തിയായ ഹർജിയിലാണ് അതീവ നിർണ്ണായകമായ ഇന്നത്തെ വിധി വന്നിരിക്കുന്നത്.

എന്നാൽ, ജിതിൻ ഭാസ്കർ പോലീസിനെ വെട്ടിച്ച് മനപ്പുർവ്വം കേസ് അട്ടിമറിക്കാൻ വേണ്ടി തെളിവ് നശിപ്പിച്ചെന്നാണ് പ്രോസിക്യൂഷൻ  കോടതിയിൽ ശക്തമായി വാദിച്ചത്. ഫോണിലെ പ്രധാന ഡിജിറ്റൽ രേഖകളും ചാറ്റുകളും സൈബർ വിദഗ്ദ്ധർക്ക് പോലും തിരിച്ചുകിട്ടാനാകാത്ത വിധം അതീവ സാങ്കേതിക മാർഗ്ഗങ്ങളിലൂടെ ഇല്ലാതാക്കിയെന്നാണ് പോലീസ് റിപ്പോർട്ട്. ഇതിനായി ജില്ലാ ഫോറൻസിക് സയൻസ് ലാബിൽ  നിന്ന് ലഭിച്ച ശാസ്ത്രീയ പരിശോധനാ ഫലങ്ങളും പ്രോസിക്യൂഷൻ ഡിജിറ്റൽ തെളിവായി കോടതിയിൽ ഹാജരാക്കിയിരുന്നു. എന്നാൽ രണ്ട് ആഴ്ചയിലധികമായി പ്രതി കസ്റ്റഡിയിലുള്ള സാഹചര്യത്തിലും ചോദ്യം ചെയ്യൽ പൂർത്തിയായതിനാലും തുടർന്നുള്ള തടങ്കൽ ആവശ്യമില്ലെന്ന് വിലയിരുത്തിയാണ് കോടതി ഇപ്പോൾ ജാമ്യം അനുവദിച്ചിരിക്കുന്നത്. പാസ്‌പോർട്ട് കോടതിയിൽ സമർപ്പിക്കണമെന്നും അന്വേഷണ ഉദ്യോഗസ്ഥർക്ക് മുന്നിൽ ഹാജരാകണമെന്നുമുള്ള കടുത്ത നിബന്ധനകളോടെയാണ് ജാമ്യം.