കെപിസിസി പ്രസിഡന്റ് സ്ഥാനo: അവകാശവാദവുമായി ജോസഫ് വാഴക്കൻ.

ന്യൂഡൽഹി: കെപിസിസി പ്രസിഡന്റ് സ്ഥാനത്തേക്ക് താൻ അർഹനാണെന്ന അവകാശവാദവുമായി മുതിർന്ന കോൺഗ്രസ് നേതാവ് ജോസഫ് വാഴക്കൻ. പാർട്ടി നേതൃത്വത്തെ കാണുന്നതിനായി ഡൽഹിയിലെത്തിയ വാഴക്കൻ മാധ്യമങ്ങളോട് സംസാരിക്കവെയാണ് താൽപ്പര്യം വ്യക്തമാക്കിയത്.തന്റെ അമ്പത് വർഷത്തെ പാർട്ടി സേവനം ചൂണ്ടിക്കാട്ടിയ അദ്ദേഹം, തനിക്ക് പദവി ലഭിക്കണമെങ്കിൽ അത് നൽകേണ്ടതാണെന്ന് വ്യക്തമാക്കി. പാർട്ടിക്ക് വേണ്ടി പൂർണ്ണമായും സമയം ചെലവഴിക്കാൻ കഴിയുന്ന ഘട്ടമാണിത്. ഇപ്പോൾ എനിക്ക് മറ്റ് ദൗത്യങ്ങളൊന്നുമില്ല. അർഹതയുണ്ടെന്ന് ബോധ്യമുണ്ടെങ്കിൽ മാത്രമേ ഞാൻ ഏതെങ്കിലും പദവി ആഗ്രഹിക്കാറുള്ളൂ, അദ്ദേഹം കൂട്ടിച്ചേർത്തു.

സണ്ണി ജോസഫ് മന്ത്രിസഭയിൽ അംഗമായതിനെത്തുടർന്നാണ് കെപിസിസിയിൽ പുതിയ അധ്യക്ഷനെ കണ്ടെത്താനുള്ള നീക്കങ്ങൾ സജീവമായത്. കൊടിക്കുന്നിൽ സുരേഷ്, ബെന്നി ബഹനാൻ, ഷാഫി പറമ്പിൽ തുടങ്ങിയ പ്രമുഖ നേതാക്കളുടെ പേരുകളും പരിഗണനാ പട്ടികയിലുണ്ട്.