ചെന്നൈയെ തകർത്തെറിഞ്ഞ് 15കാരൻ വൈഭവ്; രാജസ്ഥാന് രാജകീയ ജയം

ഗുവഹത്തി: ഇന്ത്യൻ പ്രീമിയർ ലീഗിലെ  തങ്ങളുടെ ആദ്യ മത്സരത്തിൽ രാജസ്ഥാൻ റോയൽസിന് തകർപ്പൻ ജയം. മത്സരത്തിൽ ചെന്നൈ സൂപ്പർ കിങ്സിനെ എട്ടു വിക്കറ്റിനാണ് രാജസ്ഥാൻ പരാജയപ്പെടുത്തിയത്. മഴ കാരണം മൂടിയിട്ടിരുന്ന പിച്ചിൽ ടോസ് നേടിയ രാജസ്ഥാൻ നായകൻ റിയാൻ പരാഗ് ബോളിങ് തെരഞ്ഞെടുക്കുകയായിരുന്നു.തുടക്കത്തിലെ അനുകൂല സാഹചര്യം മുതലെടുത്ത രാജസ്ഥാൻ ബൗളർമാർ ചെന്നൈയെ 19.4 ഓവറിൽ 127 റൺസിന് ഓൾഔട്ടാക്കി. മറുപടി ബാറ്റിങ്ങിനിറങ്ങിയ രാജസ്ഥാൻ 12.1 ഓവറിൽ രണ്ടു വിക്കറ്റ് നഷ്ടത്തിൽ ലക്ഷ്യം കണ്ടു. അസാമാന്യ പ്രതിഭയായ 15കാരൻ വൈഭവ് സൂര്യവംശിയുടെ വെടിക്കെട്ട് ബാറ്റിങ്ങാണ് രാജസ്ഥാന് അനായാസ ജയം സമ്മാനിച്ചത്. 15 പന്തിൽ അർധസെഞ്ചുറി തികച്ച താരം 17 പന്തിൽ 52 റൺസെടുത്ത് പുറത്തായി. ഐപിഎൽ ചരിത്രത്തിലെ ഏറ്റവും വേഗമേറിയ മൂന്നാമത്തെ അർധസെഞ്ചുറിയാണിത്. സ്പിന്നർ നൂർ അഹമ്മദിൻ്റെ പന്തിൽ രണ്ടു സിക്സറുകൾ അടിച്ചാണ് താരം ഈ നേട്ടത്തിലെത്തിയത്. കഴിഞ്ഞ സീസണിലെ ഐപിഎല്ലിൽ റെക്കോഡ് സെഞ്ചുറി നേടിയ താരമാണ് വൈഭവ്.

തകർന്നടിഞ്ഞ് ചെന്നൈ

കഴിഞ്ഞ സീസണിലെ അവസാന സ്ഥാനക്കാരായിരുന്നു ചെന്നൈയും രാജസ്ഥാനും. സീസണിന് മുന്നോടിയായി സഞ്ജു സാംസൺ, രവീന്ദ്ര ജഡേജ എന്നിവരെ ഇരു ടീമുകളും പരസ്പരം കൈമാറിയിരുന്നു. രാജസ്ഥാനിലേക്ക് വിജയകരമായി തിരിച്ചെത്തിയ ജഡേജ തൻ്റെ ആദ്യ ഓവറിൽ തന്നെ രണ്ടു വിക്കറ്റുകൾ വീഴ്ത്തി തിളങ്ങി. എന്നാൽ ചെന്നൈക്കായുള്ള അരങ്ങേറ്റത്തിൽ സഞ്ജു നിരാശപ്പെടുത്തി. മുൻ രാജസ്ഥാൻ താരം കൂടിയായ സഞ്ജു ഏഴു പന്തിൽ ആറു റൺസുമായി നന്ദ്രെ ബർഗറിന് വിക്കറ്റ് സമ്മാനിച്ചു.

നന്ദ്രെ ബർഗറും ജോഫ്ര ആർച്ചറും പവർപ്ലേയിൽ പന്ത് നന്നായി സ്വിങ് ചെയ്യിപ്പിച്ചു. ബർഗറിൻ്റെ പന്തിൽ ഷോട്ടിന് ശ്രമിച്ച സഞ്ജുവിൻ്റെ ഓഫ് സ്റ്റമ്പ് തെറിച്ചു. തൊട്ടടുത്ത പന്തിൽ പത്തു പന്തിൽ അക്കൗണ്ട് തുറക്കാതിരുന്ന ആയുഷ് മാത്രെയെ വിക്കറ്റ് കീപ്പർ ധ്രുവ് ജുറേലിൻ്റെ കൈകളിലെത്തിച്ച ബർഗർ ഹാട്രിക്കിനരികെ എത്തി. ആർച്ചറുടെ പന്തിൽ ഷോട്ടിന് ശ്രമിച്ച ക്യാപ്റ്റൻ ഋതുരാജ് ഗെയ്ക്‌വാദിനും പിഴച്ചു. 11 പന്തിൽ ആറു റൺസെടുത്ത താരം ക്ലീൻ ബൗൾഡായി. മാത്യു ഷോർട്ടിനെ സന്ദീപ് ശർമ പുറത്താക്കി.എട്ടാം ഓവറിൽ പന്തെറിയാനെത്തിയ ജഡേജ സർഫറാസ് ഖാനെയും ശിവം ദുബെയെയും മടക്കി. സർഫറാസ് എൽബിഡബ്ല്യു ആയപ്പോൾ ആറു റൺസെടുത്ത ദുബെ രവി ബിഷ്‌ണോയ്ക്ക് ക്യാച്ച് നൽകി. എട്ട് ഓവറിൽ 57ന് ആറ് എന്ന നിലയിലേക്ക് ചെന്നൈ കൂപ്പുകുത്തി. ബ്രിജേഷ് ശർമ കാർത്തിക് ശർമയെ പുറത്താക്കി. നൂർ അഹമ്മദ്, മാറ്റ് ഹെൻറി എന്നിവർ വേഗം മടങ്ങി. 43 റൺസെടുത്ത ജെയ്മി ഓവർട്ടൺ മാത്രമാണ് ചെന്നൈ നിരയിൽ പൊരുതിയത്. അൻഷുൽ കാംബോജ് ഏഴു റൺസോടെ പുറത്താകാതെ നിന്നു.

അനായാസം രാജസ്ഥാൻ

വൈഭവ് സൂര്യവംശി തുടക്കം മുതലേ ആക്രമിച്ചുകളിച്ചു. മാറ്റ് ഹെൻറിയുടെ പന്ത് സിക്സറിന് പറത്തിയത് ഏറെ ശ്രദ്ധേയമായി. ഒരു ഓവറിൽ 18 റൺസ് നേടിയ വൈഭവിനെ കാർത്തിക് ശർമ ക്യാച്ച് കൈവിട്ട് സഹായിക്കുകയും ചെയ്തു. കാംബോജിൻ്റെ പന്തിൽ സർഫറാസ് ഖാന് ക്യാച്ച് നൽകിയാണ് താരം മടങ്ങിയത്. മറുവശത്ത് ഓപ്പണിങ് പങ്കാളി യശസ്വി ജയ്‌സ്വാൾ വൈഭവിന് മികച്ച പിന്തുണ നൽകി. 38 റൺസെടുത്ത യശസ്വി പുറത്താകാതെ നിന്നു. 18 റൺസെടുത്ത ധ്രുവ് ജുറേൽ കാംബോജിൻ്റെ പന്തിൽ പുറത്തായി. ക്യാപ്റ്റൻ റിയാൻ പരാഗ് 14 റൺസോടെ പുറത്താകാതെ നിന്നു.

"ആക്രമിച്ചു കളിക്കാൻ പൂർണ സ്വാതന്ത്ര്യം നൽകി"

മുഖ്യ പരിശീലകൻ കുമാർ സംഗക്കാര ഉൾപ്പെടെയുള്ള സീനിയർ താരങ്ങളും സപ്പോർട്ട് സ്റ്റാഫും തൻ്റെ സ്വാഭാവിക ശൈലിയിൽ ആക്രമിച്ചു കളിക്കാൻ പൂർണ സ്വാതന്ത്ര്യം നൽകിയെന്ന് വൈഭവ് സൂര്യവംശി പറഞ്ഞു. പവർപ്ലേയിൽ മികച്ച പ്രകടനം നടത്തുക എന്നതായിരുന്നു ലക്ഷ്യം. തുടക്കത്തിൽ പിച്ച് അൽപം പതുക്കെയായിരുന്നുവെങ്കിലും പിന്നീട് ബാറ്റിങ് എളുപ്പമായി. ചെറിയ വിജയലക്ഷ്യങ്ങൾ പിന്തുടരുമ്പോൾ പവർപ്ലേയിലെ കളി നിർണായകമാണ്. തൻ്റെ ജന്മദിനം മൂന്നു ദിവസം മുമ്പായിരുന്നു. മുഖത്ത് കേക്ക് തേക്കുന്നത് ഒഴിവാക്കാൻ അന്ന് നേരത്തെ ഉറങ്ങാൻ കിടന്നു. സഹതാരം യശസ്വി ജയ്‌സ്വാൾ ഓരോ പന്തിലും നിർദേശങ്ങൾ നൽകുകയും സ്ട്രൈക്ക് കൈമാറുകയും ചെയ്തിരുന്നതായും താരം വ്യക്തമാക്കി.

മാധ്യമങ്ങളിലെ വാർത്തകൾ ശ്രദ്ധിക്കാതെ 14 മത്സരങ്ങളും കളിക്കാൻ വൈഭവിനോട് പറഞ്ഞിട്ടുണ്ടെന്ന് രാജസ്ഥാൻ ക്യാപ്റ്റൻ റിയാൻ പരാഗ് പറഞ്ഞു. അവനെ അവൻ്റെ ശൈലിയിൽ കളിക്കാൻ അനുവദിക്കണമെന്ന് പരിശീലകരോടും ആവശ്യപ്പെട്ടു. നെറ്റ്സിൽ അവൻ്റെ ബാറ്റിങ് കണ്ട് അദ്ഭുതപ്പെട്ടിട്ടുണ്ടെന്നും പരാഗ് കൂട്ടിച്ചേർത്തു. തുടക്കത്തിൽ ബാറ്റിങ് വളരെ ദുഷ്കരമായിരുന്നെന്ന് ചെന്നൈ ക്യാപ്റ്റൻ ഋതുരാജ് ഗെയ്ക്‌വാദ് പ്രതികരിച്ചു. പ്രത്യേകിച്ച് ജോഫ്ര ആർച്ചർക്കെതിരെ. മീഡിയം പേസർമാർക്കും സ്പിന്നർമാർക്കും പിച്ചിൽ നിന്ന് നല്ല ആനുകൂല്യം ലഭിച്ചു. കുറച്ചുകൂടി മികച്ച സ്കോർ കണ്ടെത്തേണ്ടതായിരുന്നു. ഇന്നത്തെ കാലത്ത് ഏതാണ് മികച്ച സ്കോർ എന്ന് പ്രവചിക്കാൻ കഴിയില്ലെന്നും ഋതുരാജ് വ്യക്തമാക്കി.

സ്കോർ ബോർഡ്

ചെന്നൈ സൂപ്പർ കിങ്സ്: 19.4 ഓവറിൽ 127ന് ഓൾഔട്ട്. ജെയ്മി ഓവർട്ടൺ 43. ജോഫ്ര ആർച്ചർ രണ്ടും നന്ദ്രെ ബർഗർ രണ്ടും രവീന്ദ്ര ജഡേജ രണ്ടും വിക്കറ്റ് വീഴ്ത്തി. രാജസ്ഥാൻ റോയൽസ്: 12.1 ഓവറിൽ രണ്ടു വിക്കറ്റിന് 128. വൈഭവ് സൂര്യവംശി 52, യശസ്വി ജയ്‌സ്വാൾ 38 നോട്ട് ഔട്ട്. അൻഷുൽ കാംബോജിന് രണ്ടു വിക്കറ്റ്.