വയറിലെ അർബുദം : അഞ്ച് ലക്ഷണങ്ങളെ അവഗണിക്കാതിരിക്കുക

ലോകമെമ്പാടും കണ്ടുവരുന്ന ക്യാൻസറുകളിൽ അഞ്ചാം സ്ഥാനത്താണ് വയറിലെ ക്യാൻസർ. സാധാരണ ദഹനപ്രശ്നങ്ങളോട് സാമ്യമുള്ള ലക്ഷണങ്ങൾ പ്രകടിപ്പിക്കുന്നതുകൊണ്ട് തന്നെ, പലപ്പോഴും ഈ രോഗം തുടക്കത്തിൽ തിരിച്ചറിയാൻ കഴിയാതെ പോകുന്നു. ക്യാൻസർ ലക്ഷണങ്ങളെക്കുറിച്ച് കൃത്യമായ ബോധവൽക്കരണം ഉണ്ടായാൽ മാത്രമേ രോഗത്തെ നേരത്തെ പ്രതിരോധിക്കാൻ സാധിക്കൂ എന്ന് ഓങ്കോളജിസ്റ്റുകൾ മുന്നറിയിപ്പ് നൽകുന്നു.വയറിലെ ക്യാൻസർ ഒരു ‘നിശബ്ദ രോഗം’ എന്നാണ് അറിയപ്പെടുന്നത്. ആമാശയത്തിന് വികസിക്കാനുള്ള കഴിവുള്ളതിനാൽ, വലിയ ലക്ഷണങ്ങളോ കടുത്ത വേദനയോ ഇല്ലാതെ തന്നെ ട്യൂമറിന് അവിടെ ദീർഘനാൾ വളരാൻ സാധിക്കും. വയറ് എപ്പോഴും വീർത്തിരിക്കുന്നതായും കടുത്തിരിക്കുന്നതായും തോന്നുക, ഭക്ഷണത്തോടുള്ള താല്പര്യം പെട്ടെന്ന് കുറയുക തുടങ്ങിയവയാണ് പ്രധാന ലക്ഷണങ്ങൾ. പലരും ഇതിനെ സാധാരണ വയറിലെ അസ്വസ്ഥതയായി കണ്ട് അവഗണിക്കുന്നതാണ് രോഗം ഗുരുതരമാകാൻ കാരണം.

ഗൗരവമായി കാണേണ്ട 5 മുന്നറിയിപ്പുകൾ

വയറ് നിറഞ്ഞതായി തോന്നുക: കുറഞ്ഞ അളവിൽ ഭക്ഷണം കഴിക്കുമ്പോൾ പോലും വയറ് പൂർണ്ണമായി നിറഞ്ഞതുപോലെയും അസ്വസ്ഥതയും അനുഭവപ്പെടുക.

തുടർച്ചയായ ദഹനക്കേട്: മരുന്നുകൾ കഴിച്ചിട്ടും മാറാത്ത രീതിയിൽ തുടർച്ചയായുണ്ടാകുന്ന ദഹനക്കേടും നെഞ്ചെരിച്ചിലും.

വിട്ടുമാറാത്ത വേദന: വയറിന്റെ മുകൾഭാഗത്ത് വിട്ടുമാറാതെ നിൽക്കുന്ന മന്ദമായ വേദന. ഇത് പ്രത്യേക ഭക്ഷണവുമായി ബന്ധപ്പെട്ടാകണമെന്നില്ല.

അകാരണമായ ഭാരക്കുറവ്: ഭക്ഷണക്രമത്തിലോ വ്യായാമത്തിലോ മാറ്റം വരുത്താതെ തന്നെ ശരീരഭാരം പെട്ടെന്ന് കുറയുക.

മലത്തിലെ മാറ്റങ്ങൾ: മലത്തിൽ രക്തത്തിന്റെ സാന്നിധ്യം കാണുകയോ, മലം കറുത്ത നിറത്തിൽ കാണപ്പെടുകയോ ചെയ്യുക.

ഈ ലക്ഷണങ്ങളിൽ ഏതെങ്കിലും രണ്ടാഴ്ചയിൽ കൂടുതൽ നീണ്ടുനിൽക്കുന്നുണ്ടെങ്കിൽ ഒട്ടും വൈകാതെ ഒരു ഡോക്ടറുടെ സഹായം തേടേണ്ടതാണ്. കൃത്യസമയത്തുള്ള പരിശോധനയും രോഗനിർണ്ണയവും ജീവൻ രക്ഷിക്കാൻ സഹായിക്കുമെന്ന് ഓർക്കുക. ചെറിയ അസ്വസ്ഥതകളായി കരുതി ഇത്തരം ലക്ഷണങ്ങളെ തള്ളിക്കളയുന്നത് അപകടകരമാണ്. ശരീരത്തിന്റെ ഓരോ മാറ്റങ്ങളും സൂക്ഷ്മമായി നിരീക്ഷിക്കുക, ആരോഗ്യകരമായ ജീവിതശൈലിയിലൂടെ രോഗങ്ങളെ ചെറുക്കുക.