നല്ല ഉറക്കം കിട്ടാൻ ഈ കാര്യങ്ങൾ ചെയ്ത് നോക്കൂ

രാത്രിയിൽ ശരിയായ രീതിയിൽ ഉറക്കം ലഭിക്കാതെ വരുന്നത് അടുത്ത ദിവസം മുഴുവൻ ബുദ്ധിമുട്ടുണ്ടാക്കുന്ന കാര്യമാണ്. കണ്ണടച്ച് കിടന്നാലും ഉറക്കം വരാത്തതിന് കാരണം മാനസിക സമ്മർദ്ദം മാത്രമല്ല, നമ്മുടെ ദിനചര്യയിലെ ചില പിഴവുകളാണ്. നല്ലതും സുഖകരവുമായ ഉറക്കം ലഭിക്കാൻ നിങ്ങൾ ശ്രദ്ധിക്കേണ്ട 4 പ്രധാന കാര്യങ്ങൾ നോക്കാം.

വ്യായാമം ശീലമാക്കുക:

ശരീരത്തിന് ആവശ്യമായ വ്യായാമം ലഭിച്ചാൽ മാത്രമേ നല്ല രീതിയിൽ ഉറങ്ങാൻ സാധിക്കുകയുള്ളൂ. ഒരു ദിവസം മുഴുവൻ വെറുതെ ഇരിക്കുന്നതും ശരീരത്തിന് മതിയായ ആയാസം ലഭിക്കാതെ ഇരിക്കുന്നതും രാത്രി ഉറക്കം വരുന്നതിന് തടസ്സമുണ്ടാക്കും. അതിനാൽ പകൽ സമയങ്ങളിൽ ചെറിയ ജോലികൾ ചെയ്യുകയും ശരീരത്തിന് ഉചിതമായ വ്യായാമം നൽകുകയും ചെയ്യുന്നത് ഉറക്കത്തെ സഹായിക്കും.

വെളിച്ചം നിയന്ത്രിക്കുക:

രാത്രി ആയിക്കഴിഞ്ഞാൽ വീടിനുള്ളിൽ തീവ്രത കൂടിയ വെളിച്ചം ഉപയോഗിക്കുന്നത് ഒഴിവാക്കണം. പ്രകാശം ഉറക്കത്തെ സ്വാധീനിക്കുന്ന ഒരു ഘടകമാണ്. കൂടിയ വെളിച്ചം ഉപയോഗിക്കുമ്പോൾ അത് പകൽ സമയമാണെന്ന് തലച്ചോറിന് തെറ്റിദ്ധാരണ ഉണ്ടാക്കുകയും, ഉറക്കത്തെ സഹായിക്കുന്ന ഹോർമോണായ മെലടോണിൻ പുറത്തുവിടുന്നതിനെ മന്ദഗതിയിലാക്കുകയും ചെയ്യും. രാത്രി സമയങ്ങളിൽ മങ്ങിയതും പ്രകാശം കുറഞ്ഞതുമായ വെളിച്ചം ഉപയോഗിക്കുന്നതാണ് നല്ലത്.

സ്ക്രീൻ ടൈം കുറയ്ക്കുക:

ഫോൺ, ലാപ്ടോപ്പ്, ടി.വി. തുടങ്ങിയ ഇലക്ട്രോണിക് ഉപകരണങ്ങൾ ഉറക്കത്തിന് തടസ്സമുണ്ടാക്കുന്നവയാണ്. പ്രത്യേകിച്ചും ഉറങ്ങുന്നതിന് തൊട്ടുമുമ്പ് ഫോൺ സ്ക്രീൻ നോക്കുന്നത് പൂർണ്ണമായും ഒഴിവാക്കണം. കുറച്ചു സമയം മാത്രം സ്ക്രീനിൽ നോക്കുന്നത് പോലും ഉറക്കത്തിന്റെ ഗുണനിലവാരത്തെ ദോഷകരമായി ബാധിക്കും.

ഭക്ഷണം നേരത്തെ കഴിക്കുക:

അത്താഴം നേരത്തെ കഴിക്കുന്നത് ഒരു ശീലമാക്കുന്നത് നല്ല ഉറക്കം കിട്ടാൻ നിങ്ങളെ സഹായിക്കുന്നു. അതേസമയം, ഉറങ്ങുന്നതിന് തൊട്ടുമുമ്പുള്ള സമയം ഭക്ഷണം കഴിക്കുന്നത് പൂർണമായും ഒഴിവാക്കണം. ദഹനപ്രക്രിയ നടക്കുന്നതിനാൽ ഇത് നല്ല ഉറക്കം ലഭിക്കുന്നതിന് തടസ്സമുണ്ടാക്കുന്നു.