വെനിസ്വേല ഭൂചലനം; മരണം 589 കടന്നു, തകർന്നടിഞ്ഞ് നഗരങ്ങൾ, സഹായവുമായി ലോകരാജ്യങ്ങൾ

കരാക്കസ്: ലാറ്റിനമേരിക്കൻ രാജ്യമായ വെനിസ്വേലയിൽ ബുധനാഴ്ചയുണ്ടായ അതിശക്തമായ ഇരട്ട ഭൂചലനത്തിൽ തകർന്നുപോയ കെട്ടിടങ്ങൾക്കിടയിൽ കുടുങ്ങിക്കിടക്കുന്നവർക്കായുള്ള തെരച്ചിൽ യുദ്ധകാലാടിസ്ഥാനത്തിൽ തുടരുന്നു . റിക്ടർ സ്കെയിലിൽ 7.2, 7.5 എന്നിങ്ങനെ തീവ്രത രേഖപ്പെടുത്തിയ തുടർച്ചയായ ഭൂചലനങ്ങളിൽ ഇതുവരെ 589 പേർ മരിച്ചതായി ഔദ്യോഗികമായി സ്ഥിരീകരിച്ചു. ദുരന്തത്തിൽ 2,980-ൽ അധികം ആളുകൾക്ക് പരിക്കേറ്റിട്ടുണ്ട്. നൂറുകണക്കിന് ആളുകൾ ഇനിയും തകർന്ന കെട്ടിടാവശിഷ്ടങ്ങൾക്കിടയിൽ കുടുങ്ങിക്കിടക്കുന്നുണ്ടെന്നാണ് ദുരന്തനിവാരണ സേന കണക്കാക്കുന്നത്.ലാറ്റിനമേരിക്കയുടെ ചരിത്രത്തിലെ തന്നെ ഏറ്റവും വിനാശകരമായ ഭൂചലനങ്ങളിലൊന്നാണ് വെനിസ്വേലയിൽ സംഭവിച്ചത്. രാജ്യത്തിന്റെ തലസ്ഥാനമായ കരാക്കസിന്  160 കിലോമീറ്റർ പടിഞ്ഞാറ് ഭാഗത്താണ് ഭൂകമ്പത്തിന്റെ പ്രഭവകേന്ദ്രം അടയാളപ്പെടുത്തിയത്. പ്രശസ്ത തീരദേശ നഗരമായ ലഗ്വൈറയിലാണ്  ഏറ്റവും കൂടുതൽ നാശനഷ്ടങ്ങൾ സംഭവിച്ചിട്ടുള്ളത്. നൂറിലധികം ബഹുനില കെട്ടിടങ്ങൾ ഇവിടെ നിമിഷങ്ങൾക്കകം തകർന്നുതരിപ്പണമായി. ദുരന്തത്തിന്റെ വ്യാപ്തി കണക്കിലെടുത്ത് വിവിധ വിദേശ രാജ്യങ്ങളിൽ നിന്നുള്ള അത്യാധുനിക രക്ഷാപ്രവർത്തക സംഘങ്ങൾ വെനിസ്വേലയിലേക്ക് എത്തിത്തുടങ്ങിയിട്ടുണ്ട്.മെക്സിക്കോ, എൽ സാൽവദോർ, സ്പെയിൻ, കൊളംബിയ, സ്വിറ്റ്സർലൻഡ്, ജർമ്മനി തുടങ്ങിയ രാജ്യങ്ങളിൽ നിന്നുള്ള വിദഗ്ദ്ധ രക്ഷാപ്രവർത്തകരും ജീവൻരക്ഷാ ഉപകരണങ്ങളുമാണ് നിലവിൽ ദുരന്തഭൂമിയിൽ എത്തിയിട്ടുള്ളത്. യു.എസ്  സർക്കാർ വെനിസ്വേലയ്ക്കായി 150 ദശലക്ഷം ഡോളറിന്റെ അടിയന്തര ധനസഹായം പ്രഖ്യാപിച്ചു. ദുരിതാശ്വാസ സാമഗ്രികളും മെഡിക്കൽ സഹായവും തടസ്സമില്ലാതെ എത്തിക്കുന്നതിനായി വാഷിംഗ്ടൺ വെനിസ്വേലയ്ക്ക് മേൽ ഏർപ്പെടുത്തിയിരുന്ന കടുത്ത സാമ്പത്തിക ഉപരോധങ്ങളിൽ താൽക്കാലിക ഇളവ് വരുത്തിയിട്ടുണ്ട്.വർഷങ്ങളായുള്ള ആഭ്യന്തര സാമ്പത്തിക-രാഷ്ട്രീയ പ്രതിസന്ധികളിൽ വലയുന്ന വെനിസ്വേലയ്ക്ക് ഈ പ്രകൃതിദുരന്തം താങ്ങാനാവാത്ത വലിയൊരു ആഘാതമാണ് നൽകിയിരിക്കുന്നത്. അടിയന്തര സാഹചര്യം കണക്കിലെടുത്ത് കരാക്കസ് സ്റ്റോക്ക് എക്സ്ചേഞ്ച്  താൽക്കാലികമായി പ്രവർത്തനം നിർത്തിവെക്കുകയും ഈ കെട്ടിടം പൂർണ്ണമായും ദുരിതാശ്വാസ ക്യാമ്പാക്കി മാറ്റുകയും ചെയ്തു. അതേസമയം, രാജ്യത്തിന്റെ പ്രധാന വരുമാന സ്രോതസ്സായ എണ്ണപ്പാടങ്ങൾക്ക് ഭൂചലനത്തിൽ കാര്യമായ നാശനഷ്ടങ്ങളൊന്നും സംഭവിച്ചിട്ടില്ലെന്ന് പ്രമുഖ എണ്ണ കമ്പനികൾ വ്യക്തമാക്കിയിട്ടുണ്ട്.

 കൈത്താങ്ങായി ഇന്ത്യയുടെ ‘ഓപ്പറേഷൻ അമിസ്റ്റാഡ്’.

ഭൂകമ്പത്തിൽ തകർന്ന വെനിസ്വേലയ്ക്ക് കൈത്താങ്ങായി ഇന്ത്യയുടെ ‘ഓപ്പറേഷൻ അമിസ്റ്റാഡ്’. രണ്ട് ഇന്ത്യൻ വ്യോമസേന സി-17 ഗ്ലോബ് മാസ്റ്റർ വിമാനങ്ങൾ അടിയന്തര വൈദ്യസഹായവും ദുരിതാശ്വാസ വസ്തുക്കളുമായി വെനിസ്വേലയിലേക്ക് പുറപ്പെട്ടതായി വിദേശകാര്യ മന്ത്രി ഡോ. എസ്. ജയശങ്കർ അറിയിച്ചു.ഇന്ത്യൻ കരസേനയുടെ ഫീൽഡ് ഹോസ്പിറ്റൽ യൂണിറ്റാണ് സംഘത്തിലുള്ളത്. കൂടാതെ അടിയന്തര വൈദ്യസഹായം വേഗത്തിൽ ലഭ്യമാക്കുന്നതിനായി പ്രത്യേകം രൂപകൽപ്പന ചെയ്ത രണ്ട് ‘BHISHM’ ക്യൂബുകളും സംഘത്തിലുണ്ട്. 35 ടണ്ണിലധികം മരുന്നുകൾ, അത്യാവശ്യ മെഡിക്കൽ ഉപകരണങ്ങൾ എന്നിവയാണ് ഈ വിമാനങ്ങളിലുള്ളത്.പ്രതിസന്ധി ഘട്ടത്തിൽ വെനിസ്വേലൻ സർക്കാരിനും ജനങ്ങൾക്കും ഒപ്പമുണ്ടാകുമെന്ന് പ്രധാനമന്ത്രി നരേന്ദ്രമോദി ഉറപ്പുനൽകിയിരുന്നു.