ആഗോള എണ്ണ വിപണിയിൽ ചലനം : വില താഴേക്ക്

ന്യൂഡൽഹി : ഹോർമുസ് കടലിടുക്കിലെ ഗതാഗതം ഭാഗികമായി പുനഃസ്ഥാപിച്ചതോടെ ആഗോള എണ്ണ വിപണിയിൽ വിലയിൽ നേരിയ കുറവുണ്ടായി. എന്നാൽ, മേഖലയിലെ സംഘർഷങ്ങൾ ഇപ്പോഴും നിഴൽ വീഴ്ത്തുന്നതിനാൽ വിപണി ജാഗ്രതയിലാണ്.ബ്രെന്റ് ക്രൂഡ് ബാരലിന് 74.43 ഡോളർ (ഏകദേശം 1.1% ഇടിവ്). ഡബ്ല്യു.ടി.ഐ (WTI) ബാരലിന് 71.21 ഡോളർ (ഏകദേശം 1% ഇടിവ്) എന്നിങ്ങനെയാണ് വില. ഈ ആഴ്ചയിൽ ഏകദേശം 7% വരെ വിലയിടിവാണ് വിപണിയിൽ രേഖപ്പെടുത്തിയിരിക്കുന്നത്.

ഏറെ നാളത്തെ അനിശ്ചിതത്വത്തിന് ശേഷം ഹോർമുസ് കടലിടുക്കിലൂടെ ടാങ്കറുകൾ വീണ്ടും സഞ്ചരിച്ചു തുടങ്ങിയിട്ടുണ്ട്. എങ്കിലും, ഗതാഗതം യുദ്ധത്തിന് മുൻപുള്ള സാധാരണ നിലയിലേക്ക് എത്തിയിട്ടില്ല. ഒരു കാർഗോ കപ്പലിന് നേരെ ആക്രമണം ഉണ്ടായതിനെത്തുടർന്ന്, ഐക്യരാഷ്ട്രസഭയുടെ കീഴിലുള്ള കപ്പൽ ഒഴിപ്പിക്കൽ പദ്ധതി താൽക്കാലികമായി നിർത്തിവെച്ചിരിക്കുകയാണ്. ഇറാൻ നിർദ്ദേശിച്ച റൂട്ടുകളിലൂടെ അല്ലാതെ സഞ്ചരിക്കുന്ന കപ്പലുകളുടെ സുരക്ഷയ്ക്ക് ഉത്തരവാദിത്തമില്ലെന്ന് ഇറാനിയൻ അധികൃതർ കർശന മുന്നറിയിപ്പ് നൽകിയിട്ടുണ്ട്.