ഇതിഹാസ സംവിധായകൻ പത്മശ്രീ ഭാരതിരാജ അന്തരിച്ചു

ചെന്നൈ: തമിഴ് സിനിമയ്ക്ക് പുത്തൻ ഭാവുകത്വം നൽകിയ,  ഗ്രാമീണതയ്ക്ക്  ദൃശ്യഭാഷ തീർത്ത ചലച്ചിത്ര വിസ്‌മയം പദ്‌മശ്രീ  ഭാരതിരാജ (84) അന്തരിച്ചു. വാർധക്യ സഹജമായ അസുഖങ്ങളെത്തുടർന്ന് ചെന്നൈയിലെ വസതിയിലായിരുന്നു അന്ത്യം. കുറച്ചു നാളുകളായി അദ്ദേഹം ആരോഗ്യപ്രശ്നങ്ങളെ തുടർന്ന് ചികിത്സയിലായിരുന്നു. 1977-ൽ പുറത്തിറങ്ങിയ ‘പതിനാറ് വയതിനിലെ’ എന്ന ചിത്രത്തിലൂടെയായിരുന്നു ഭാരതിരാജ സംവിധാനരംഗത്തേക്ക് കടന്നുവന്നത്. തമിഴ് സിനിമയുടെ വ്യാകരണത്തെ പൊളിച്ചെഴുതിയ ഈ ചിത്രം വലിയ വിജയമായിരുന്നു. തുടർന്ന് ‘കിഴക്കേ പോകുമെ’, ‘സിഗപ്പു റോജകൾ’, ‘നിഴൽഗൽ’, ‘അലൈകൾ ഓയിവതില്ലൈ’, ‘മുതൽ മര്യാദൈ’ തുടങ്ങി നിരവധി ക്ലാസിക് സിനിമകൾ അദ്ദേഹം പ്രേക്ഷകർക്ക് സമ്മാനിച്ചു. 2020-ൽ പുറത്തിറങ്ങിയ ‘മീണ്ടും ഒരു മര്യാദൈ’ ആണ് അദ്ദേഹം സംവിധാനം ചെയ്ത അവസാന ചിത്രം.

തമിഴ് സിനിമാ ലോകത്തെ അനിഷേധ്യനായ ഈ പ്രതിഭയെ തേടി ആറ് തവണ ദേശീയ ചലച്ചിത്ര പുരസ്കാരങ്ങൾ എത്തിയിട്ടുണ്ട്. കലാരംഗത്തെ സംഭാവനകൾ പരിഗണിച്ച് രാജ്യം പത്മശ്രീ നൽകി ആദരിക്കുകയും ചെയ്തു. സംവിധായകനായി മാത്രമല്ല, മികച്ചൊരു നടനായും അദ്ദേഹം തന്റെ കഴിവ് തെളിയിച്ചിട്ടുണ്ട്.

ആദ്യകാല ജീവിതവും പോരാട്ടവും

1941 ജൂലൈ 17ന് തമിഴ്‌നാട്ടിലെ തേനി ജില്ലയിലുള്ള അല്ലിനഗരത്തിലാണ് ഭാരതിരാജ ജനിച്ചത്. മായ തേവർ, കരുത്തമ്മ എന്നിവരായിരുന്നു മാതാപിതാക്കൾ. ‘ചിന്നസാമി’ എന്നായിരുന്നു അദ്ദേഹത്തിൻ്റെ യഥാർഥ നാമം. സ്കൂൾ പഠനകാലത്തുതന്നെ സാഹിത്യത്തിലും പ്രസംഗമത്സരങ്ങളിലും നാടകങ്ങളിലും സജീവമായ താത്പര്യം അദ്ദേഹം പ്രകടിപ്പിച്ചിരുന്നു. സിനിമ എന്ന മോഹത്തിലേക്ക് എത്തുന്നതിന് മുൻപ് സ്വന്തം നാട്ടിൽ ഹെൽത്ത് ഇൻസ്‌പെക്ടറായി ജോലി ചെയ്തിരുന്നു. എന്നാൽ സിനിമാ മോഹം ശക്തമായതോടെ ജോലി ഉപേക്ഷിച്ച് അദ്ദേഹം ചെന്നൈയിലേക്ക് ചേക്കേറി.ചെന്നൈയിലെത്തിയ ആദ്യകാലങ്ങളിൽ ചലച്ചിത്ര മേഖലയിൽ ഒരവസരം ലഭിക്കുന്നതിനായി കഠിനമായ പോരാട്ടമാണ് അദ്ദേഹത്തിന് നടത്തേണ്ടി വന്നത്. ജീവിതമാർഗ്ഗത്തിനായി നാടകങ്ങളിൽ അഭിനയിച്ചും പെട്രോൾ പമ്പുകളിൽ ജോലി ചെയ്തുമാണ് അദ്ദേഹം മുന്നോട്ട് പോയത്. ഈ പ്രതിസന്ധികൾക്കിടയിലും സിനിമയോടുള്ള അടങ്ങാത്ത അഭിനിവേശം അദ്ദേഹത്തെ പ്രശസ്ത സംവിധായകൻ പുട്ടണ്ണ കാനഗലിൻ്റെ അടുത്തെത്തിച്ചു. അദ്ദേഹത്തിൻ്റെ സഹായിയായി പ്രവർത്തിച്ചതാണ് ഭാരതിരാജയുടെ സിനിമാ ജീവിതത്തിൽ വഴിത്തിരിവായത്.

വിപ്ലവകരമായ മാറ്റങ്ങൾ

1977ൽ പുറത്തിറങ്ങിയ '16 വയതിനിലേ' എന്ന ചിത്രത്തിലൂടെയാണ് ഭാരതിരാജ സ്വതന്ത്ര സംവിധായകനായി അരങ്ങേറ്റം കുറിച്ചത്. തമിഴ് സിനിമയുടെ ചരിത്രം മാറ്റിയെഴുതിയ ചിത്രമായിരുന്നു ഇത്. അതുവരെ സ്റ്റുഡിയോ സെറ്റുകൾക്കുള്ളിൽ മാത്രം ഒതുങ്ങിനിന്നിരുന്ന തമിഴ് സിനിമയെ ഗ്രാമങ്ങളിലെ പച്ചപ്പിലേക്കും മണ്ണിലേക്കും ഇറക്കിക്കൊണ്ടുവന്നത് ഭാരതിരാജയായിരുന്നു. കമൽഹാസൻ, രജനികാന്ത്, ശ്രീദേവി എന്നിവരുടെ അഭിനയ ജീവിതത്തിലെ ഏറ്റവും പ്രധാനപ്പെട്ട സിനിമകളിലൊന്നായി ഇത് മാറി.നാൽപ്പതിലധികം ചിത്രങ്ങൾ സംവിധാനം ചെയ്ത അദ്ദേഹം ഗ്രാമീണ ജീവിതത്തിൻ്റെ പശ്ചാത്തലത്തിൽ സാമൂഹിക വിഷയങ്ങൾ ലളിതമായി അവതരിപ്പിക്കുന്നതിൽ വിദഗ്ധനായിരുന്നു. ഇതിനകം ഒട്ടനവധി ദേശീയ പുരസ്കാരങ്ങളും അദ്ദേഹത്തെ തേടിയെത്തിയിട്ടുണ്ട്. സംവിധാനത്തിന് പുറമെ അഭിനയത്തിലും അദ്ദേഹം തൻ്റെ വ്യക്തിമുദ്ര പതിപ്പിച്ചു.ആയുത എഴുത്ത്, തിരുച്ചിറ്റമ്പലം, ഈശ്വരൻ, റോക്കി, നമ്മ വീട്ടു പിള്ളൈ, പാണ്ഡ്യ നാട്, മീണ്ടും ഒരു മര്യാതൈ, അന്നക്കൊടി, റെട്ട ചുഴി തുടങ്ങിയ സിനിമകളിൽ അദ്ദേഹം ശ്രദ്ധേയമായ വേഷങ്ങൾ കൈകാര്യം ചെയ്തു. താൻ സിനിമയിലേക്ക് കൈപിടിച്ചുയർത്തിയ നടി രാധികാ ശരത്കുമാർ അഭിനയിച്ച 'തായിക്കിഴവി' എന്ന സിനിമ അടുത്തിടെ കണ്ട അദ്ദേഹം അവരെ നേരിട്ട് വിളിച്ച് അഭിനന്ദിച്ചിരുന്നു. തമിഴ് സിനിമയിലെ ഗ്രാമീണതയുടെ ദൃശ്യഭാഷാ വിപ്ലവത്തിന് തുടക്കമിട്ട സംവിധായകനായാണ് ഭാരതിരാജ എന്നും ഓർമിക്കപ്പെടുക.