പ്രധാനമന്ത്രി സ്ലൊവാക്യയിൽ; സ്വതന്ത്ര രാഷ്ട്ര രൂപീകരണത്തിന് ശേഷം രാജ്യം സന്ദർശിക്കുന്ന ആദ്യ ഇന്ത്യൻ പ്രധാനമന്ത്രി

ബ്രാറ്റിസ്ലാവ: 1993-ൽ സ്ലൊവാക്യ സ്വതന്ത്ര രാഷ്ട്രമായി രൂപീകൃതമായതിന് ശേഷം രാജ്യം സന്ദർശിക്കുന്ന ആദ്യ ഇന്ത്യൻ പ്രധാനമന്ത്രിയായി നരേന്ദ്ര മോദി ചരിത്രം കുറിക്കുന്നു  സ്ലൊവാക്യൻ പ്രധാനമന്ത്രി റോബർട്ട് ഫിക്കോയുടെ  പ്രത്യേക ഔദ്യോഗിക ക്ഷണപ്രകാരം  പ്രധാനമന്ത്രി തലസ്ഥാനമായ ബ്രാറ്റിസ്ലാവയിൽ എത്തി . ജൂൺ 16 വരെ നീളുന്ന ഈ നിർണ്ണായക നയതന്ത്ര സന്ദർശനം ഇരുരാജ്യങ്ങളും തമ്മിലുള്ള ഉഭയകക്ഷി-വ്യാപാര ബന്ധങ്ങളിൽ പുതിയൊരു സുവർണ്ണ അധ്യായം തുറക്കുമെന്നാണ് രാഷ്ട്രീയ നിരീക്ഷകർ വിലയിരുത്തുന്നത്.അടുത്ത കാലത്തായി ഇന്ത്യയും സ്ലൊവാക്യയും തമ്മിലുള്ള സാമ്പത്തിക ബന്ധങ്ങൾ വലിയ രീതിയിൽ ശക്തിപ്പെട്ടിരുന്നു. ഇരുരാജ്യങ്ങളും തമ്മിലുള്ള ഉഭയകക്ഷി വ്യാപാരം കഴിഞ്ഞ 2025-ൽ 1.8 ബില്യൺ ഡോളറായി (ഏകദേശം 180 കോടി ഡോളർ) ഉയരുകയും ചെയ്തു. ടാറ്റ മോട്ടോഴ്സ്, ടിസിഎസ് (TCS), സി.കെ. ബിർള ഗ്രൂപ്പ് തുടങ്ങിയ പ്രമുഖ ഇന്ത്യൻ കോർപ്പറേറ്റ് കമ്പനികൾക്ക് നിലവിൽ സ്ലൊവാക്യയിൽ വൻതോതിലുള്ള നിക്ഷേപങ്ങളും ശക്തമായ സാന്നിധ്യവുമുണ്ട്. യൂറോപ്യൻ വിപണിയിലേക്കുള്ള തന്ത്രപരമായ ഒരു വലിയ കവാടമായിട്ടാണ് ഇന്ത്യൻ ബിസിനസ് ലോകം സ്ലൊവാക്യയെ നോക്കിക്കാണുന്നത്. ഇതിന് പുറമെ പീരങ്കികൾ, സൈനിക കവചിത വാഹനങ്ങൾ എന്നിവയുടെ സംയുക്ത നിർമ്മാണത്തിനായി ഇന്ത്യൻ കമ്പനികൾ സ്ലൊവാക്യൻ പ്രതിരോധ സ്ഥാപനങ്ങളുമായി നിർണ്ണായക കരാറുകളിൽ ഏർപ്പെട്ടിട്ടുമുണ്ട്. പ്രശസ്ത സ്ലൊവാക്യൻ തോക്ക് നിർമ്മാണ കമ്പനിയായ ‘ഗ്രാൻഡ് പവർ’  തമിഴ്‌നാട്ടിലെ കോയമ്പത്തൂരിന് സമീപം പുതിയ നിർമ്മാണ യൂണിറ്റ് സ്ഥാപിക്കാനുള്ള അന്തിമ നടപടികൾ സ്വീകരിച്ചു വരികയാണിപ്പോൾഡിജിറ്റൽ സാങ്കേതികവിദ്യ, ആധുനിക സൈബർ സുരക്ഷ എന്നീ മേഖലകളിൽ സംയുക്തമായി സഹകരിക്കുന്നതിനായുള്ള ഉന്നതതല ചർച്ചകളും നിലവിൽ പുരോഗമിക്കുകയാണ്. മുൻപ് 2017-ൽ സ്ലൊവാക്യയുടെ ചരിത്രത്തിലെ ആദ്യ ബഹിരാകാശ ഉപഗ്രഹം വിജയകരമായി വിക്ഷേപിച്ചത് ഇന്ത്യയുടെ പി.എസ്.എൽ.വി റോക്കറ്റ് ഉപയോഗിച്ചായിരുന്നു എന്നത് ഇരുരാജ്യങ്ങളും തമ്മിലുള്ള സാങ്കേതിക ബന്ധത്തിന്റെ ആഴം വെളിപ്പെടുത്തുന്നതാണ്.

നിലവിൽ സ്ലൊവാക്യയിൽ ഏകദേശം 11,000-ത്തോളം ഇന്ത്യൻ പ്രവാസികൾ താമസിക്കുന്നുണ്ട്. ഇതിൽ അഞ്ഞൂറിലധികം ഇന്ത്യൻ വിദ്യാർത്ഥികൾ അവിടുത്തെ വിവിധ പ്രമുഖ സർവ്വകലാശാലകളിൽ ഉപരിപഠനം നടത്തുന്നുമുണ്ട്. ഭാരതീയ തത്വചിന്തകളുടെ സമാഹാരങ്ങളായ ഉപനിഷത്തുകൾ സംസ്‌കൃതത്തിൽ നിന്ന് നേരിട്ട് സ്ലൊവാക്യൻ ഭാഷയിലേക്ക് വിവർത്തനം ചെയ്തിട്ടുണ്ട്. ഇത് ഇരുരാജ്യങ്ങളും തമ്മിലുള്ള സാംസ്‌കാരിക ബന്ധത്തിലെ ഏറ്റവും വലിയ നാഴികക്കല്ലാണെന്ന് പ്രധാനമന്ത്രി മോദി മുൻപ് സൂചിപ്പിച്ചിരുന്നു. ഇന്ത്യയും യൂറോപ്യൻ യൂണിയനും (EU) തമ്മിലുള്ള ചരിത്രപരമായ സ്വതന്ത്ര വ്യാപാര കരാറിനെ (FTA) സ്ലൊവാക്യ പൂർണ്ണമായി പിന്തുണയ്ക്കുന്നത് വരുംദിവസങ്ങളിൽ ഇന്ത്യൻ സമ്പദ്വ്യവസ്ഥയ്ക്ക് വലിയ ഗുണം ചെയ്യുമെന്ന് സ്ലൊവാക്യൻ പ്രസിഡന്റ് പെല്ലെഗ്രിനിയും വ്യക്തമാക്കിയിട്ടുണ്ട്. കേവലം ഒരു പ്രതീകാത്മക സന്ദർശനത്തിനപ്പുറം ഇരുരാജ്യങ്ങളും തമ്മിൽ ദീർഘകാല തന്ത്രപരമായ പങ്കാളിത്തം ഉറപ്പിക്കുകയാണ് പ്രധാനമന്ത്രിയുടെ ഈ സ്ലൊവാക്യൻ യാത്രയുടെ പ്രധാന ലക്ഷ്യം.