നേവിയിൽ ഓഫീസറാകാൻ സുവർണ്ണാവസരം :ഏഴിമല നാവിക അക്കാഡമിയിൽ പ്ലസ് ടുക്കാർക്ക് സൗജന്യ ബി.ടെക് പഠനം

കണ്ണൂർ :ഹയർ സെക്കൻഡറി കഴിഞ്ഞ യുവതീ യുവാക്കൾക്ക് ഇന്ത്യൻ നാവികസേനയിൽ ഓഫീസർ റാങ്കിൽ ജോലി നേടാൻ മികച്ച അവസരം. കണ്ണൂർ ഏഴിമല നാവിക അക്കാഡമിയിൽ നടത്തുന്ന '10+2 ബി.ടെക് കേഡറ്റ് എൻട്രി സ്കീമി'ലേക്ക് അപേക്ഷിക്കാനുള്ള അവസാന തീയതി ജനുവരി 19 ആണ്. തിരഞ്ഞെടുക്കപ്പെടുന്നവർക്ക് നാല് വർഷത്തെ ബി.ടെക് പഠനവും തുടർന്ന് നാവികസേനയിൽ സ്ഥിരനിയമനവും ലഭിക്കും.

ഒഴിവുകൾ:  എക്സിക്യൂട്ടീവ്, ടെക്നിക്കൽ ബ്രാഞ്ചുകളിലായി 44 ഒഴിവുകൾ (7 എണ്ണം വനിതകൾക്കായി സംവരണം ചെയ്തിരിക്കുന്നു).

യോഗ്യത:     പ്ലസ് ടുവിന് ഫിസിക്സ്, കെമിസ്ട്രി, മാത്തമാറ്റിക്സ് വിഷയങ്ങളിൽ 70% മാർക്ക്. പത്താം ക്ലാസിലോ പന്ത്രണ്ടാം ക്ലാസിലോ ഇംഗ്ലീഷിന് 50% മാർക്ക് നിർബന്ധം.

 റാങ്ക് പട്ടിക: ജെ.ഇ.ഇ (മെയിൻ) 2025 ഓൾ ഇന്ത്യ റാങ്ക് ലിസ്റ്റിലുള്ളവർക്കായിരിക്കും പരിഗണന.

പ്രായപരിധി:  2007 ജനുവരി 2-നും 2009 ജൂലൈ 1-നും ഇടയിൽ ജനിച്ചവരാകണം.

ജെ.ഇ.ഇ റാങ്ക് അടിസ്ഥാനത്തിൽ ചുരുക്കപ്പട്ടിക തയ്യാറാക്കി സർവീസസ് സെലക്ഷൻ ബോർഡ് (SSB) നടത്തുന്ന ഇന്റർവ്യൂ വഴിയാണ് സെലക്ഷൻ. ബാംഗ്ലൂർ, ഭോപാൽ, കൊൽക്കത്ത, വിശാഖപട്ടണം എന്നിവിടങ്ങളിലായാകും ഇന്റർവ്യൂ നടക്കുക. തിരഞ്ഞെടുക്കപ്പെടുന്നവർക്ക് ആഹാരം, വസ്ത്രം, പുസ്തകം എന്നിവയുൾപ്പെടെയുള്ള പഠനച്ചെലവുകൾ നാവികസേന പൂർണ്ണമായും വഹിക്കും.കോഴ്സ് വിജയകരമായി പൂർത്തിയാക്കുന്നവർക്ക് ജവഹർലാൽ നെഹ്‌റു യൂണിവേഴ്സിറ്റിയുടെ (JNU) ബിരുദം ലഭിക്കുകയും നാവികസേനയിൽ ഓഫീസർ പദവിയിൽ നിയമനം നൽകുകയും ചെയ്യും. താൽപ്പര്യമുള്ളവർക്ക് www.joinindiannavy.gov.in എന്ന വെബ്സൈറ്റ് വഴി ഇന്ന് തന്നെ അപേക്ഷിക്കാവുന്നതാണ്.