സതീശൻ സർക്കാരിൻ്റെ ബജറ്റ് പ്രഖ്യാപനങ്ങളെ സ്വാഗതം ചെയ്ത് മലയാള ചലച്ചിത്രമേഖല
കൊച്ചി: വി.ഡി. സതീശൻ സർക്കാരിന്റെ കന്നി ബജറ്റിൽ മലയാള സിനിമയെ ഒരു വ്യവസായമായി ഔദ്യോഗികമായി പ്രഖ്യാപിച്ച ചരിത്രപരമായ തീരുമാനത്തെയും മറ്റ് ആനുകൂല്യങ്ങളെയും സ്വാഗതം ചെയ്ത് നടൻ മമ്മൂട്ടി. സിനിമാ മേഖലയ്ക്ക് വലിയ രീതിയിൽ കരുത്തുപകരുന്ന പ്രഖ്യാപനങ്ങൾ ബജറ്റിൽ ഉൾപ്പെടുത്തിയതിന് സർക്കാരിന് പ്രത്യേക നന്ദി അറിയിച്ച താരം, ഇവയെല്ലാം എത്രയും വേഗം യാഥാർത്ഥ്യമാക്കാൻ സാധിക്കട്ടെ എന്നും ആശംസിച്ചു. “മലയാള ചലച്ചിത്ര വേദിക്ക് വാഗ്ദാനം ചെയ്ത എല്ലാ ആനുകൂല്യങ്ങൾക്കും പുതിയ സർക്കാരിന് നന്ദി.. എല്ലാം വേഗത്തിൽ നടപ്പിലാകട്ടെ”- മമ്മൂട്ടി തന്റെ സോഷ്യൽ മീഡിയ പേജിൽ കുറിച്ചു.സിനിമയെ വ്യവസായമായി പ്രഖ്യാപിച്ച ബജറ്റിനെ ഇരുകൈയും നീട്ടിയാണ് ചലച്ചിത്ര ലോകം വരവേറ്റത്. ബജറ്റ് പ്രഖ്യാപനങ്ങൾ ആയിരക്കണക്കിന് സാധാരണക്കാരായ സിനിമാ പ്രവർത്തകർക്ക് പുതിയ പ്രതീക്ഷകളും വലിയ ആത്മവിശ്വാസവും നൽകുന്നതാണെന്ന് നടൻ മോഹൻലാൽ കഴിഞ്ഞ ദിവസം പ്രതികരിച്ചിരുന്നു. സിനിമയ്ക്കായി സംസ്ഥാനത്ത് അത്യാധുനിക കൾച്ചറൽ പാർക്ക് (Cultural Park) ഉൾപ്പെടെയുള്ള വിപുലമായ പദ്ധതികൾ പ്രഖ്യാപിച്ച തീരുമാനത്തെ സന്തോഷപൂർവ്വം സ്വാഗതം ചെയ്യുന്നുവെന്നും അദ്ദേഹം ഫേസ്ബുക്കിൽ കുറിച്ചിരുന്നു.
മലയാള സിനിമയ്ക്ക് ഏറെ സന്തോഷവും വലിയ അഭിമാനവും നൽകുന്ന പ്രഖ്യാപനമാണ് സർക്കാരിന്റെ ഭാഗത്തുനിന്നും ഉണ്ടായിരിക്കുന്നതെന്ന് നടനും സംവിധായകനുമായ പൃഥ്വിരാജ് സുകുമാരനും വ്യക്തമാക്കി. സർക്കാരിന്റെ ഈ പുതിയ ചുവടുവെപ്പിനെ സ്വാഗതം ചെയ്ത് പ്രമുഖ സിനിമാ നിർമ്മാതാക്കളുടെ സംഘടനയും ഔദ്യോഗികമായി രംഗത്തെത്തിയിട്ടുണ്ട്. സിനിമയ്ക്ക് വ്യവസായ പദവി ലഭിക്കുന്നതിലൂടെ തിയേറ്ററുകളുടെ ഉയർന്ന വൈദ്യുതി നിരക്ക് ഗണ്യമായി കുറയാനും പുതിയ പ്രൊജക്ടുകൾക്ക് കുറഞ്ഞ പലിശനിരക്കിൽ ബാങ്ക് വായ്പകൾ എളുപ്പത്തിൽ ലഭ്യമാക്കാനും ഇത് വലിയ രീതിയിൽ ഗുണകരമാകുമെന്നും സംഘടന കൂട്ടിചേർത്തു.