വ്യാജ ആരോപണങ്ങളെ കളിയിലെ മികവുകൊണ്ട് നേരിടുമെന്ന് ലയണൽ സ്കലോണി

കാൻസാസ് സിറ്റി: ലോകകപ്പിൽ നിലവിലെ ചാമ്പ്യന്മാരായ അർജന്റീനയെ ഫിഫ അനാവശ്യമായി സഹായിക്കുന്നുവെന്ന ആരോപണങ്ങൾക്ക് മറുപടിയുമായി പരിശീലകൻ ലയണൽ സ്കലോണി രംഗത്ത്. അർജന്റീന വീണ്ടും ലോകകിരീടം ചൂടുന്നത് കാണാൻ ആഗ്രഹിക്കാത്തവരാണ് ഇത്തരം വ്യാജ ആരോപണങ്ങൾക്ക് പിന്നിലെന്ന് അദ്ദേഹം തുറന്നടിച്ചു. സ്വിറ്റ്സർലൻഡിനെതിരായ ക്വാർട്ടർ ഫൈനൽ മത്സരത്തിന് മുന്നോടിയായി മാധ്യമങ്ങളോട് സംസാരിക്കുകയായിരുന്നു അദ്ദേഹം.പ്രീക്വാർട്ടറിൽ ഈജിപ്തിനെതിരെയുള്ള മത്സരത്തിൽ റഫറി തീരുമാനങ്ങളും ‘വാർ’ പരിശോധനകളും അർജന്റീനയ്ക്ക് അനുകൂലമായിരുന്നുവെന്ന് സോഷ്യൽ മീഡിയയിൽ വലിയ ചർച്ചകൾ നടന്നിരുന്നു. മെസി ടൂർണമെന്റിൽ തുടരുന്നത് ഫിഫയ്ക്ക് സാമ്പത്തിക ലാഭമുണ്ടാക്കുമെന്ന പ്രചാരണങ്ങളും ചില കോണുകളിൽ നിന്ന് ഉയർന്നിരുന്നു. എന്നാൽ, തങ്ങൾ കഴിഞ്ഞ തവണ ലോകകപ്പ് നേടിയതിനാൽ അർജന്റീന ഇത്തവണ ജയിക്കരുത് എന്ന് ആഗ്രഹിക്കുന്ന വലിയൊരു വിഭാഗം പുറത്തുണ്ടെന്ന് സ്കലോണി ആരോപിച്ചു. ഇത്തരം നെഗറ്റീവ് പ്രചാരണങ്ങളെ കളിക്കളത്തിൽ മികച്ച പ്രകടനം പുറത്തെടുക്കാനുള്ള ഒരു ആവേശമായി മാറ്റാനാണ് ടീം ശ്രമിക്കുന്നത്. 1986-ലും ഇതേ ആരോപണങ്ങൾ നേരിട്ടിട്ടുണ്ടെന്നും അർജന്റീനയെ തോൽപ്പിക്കാൻ ആഗ്രഹിക്കുന്നവർ ഉണ്ടാവുക സ്വാഭാവികമാണെന്നും അദ്ദേഹം കൂട്ടിച്ചേർത്തു.

ആധുനിക ഫുട്ബോളിലെ ‘വാർ’ സാങ്കേതികവിദ്യയിൽ ആർക്കും അനായാസം ഇടപെടാൻ കഴിയില്ലെന്ന് സ്കലോണി വ്യക്തമാക്കി. നിയമങ്ങൾ പാലിച്ചാണ് മൈതാനത്ത് തീരുമാനങ്ങൾ എടുക്കുന്നത്. ഇത്തരം വിവാദങ്ങൾ ടീമിന്റെ ശ്രദ്ധ തിരിക്കില്ലെന്നും സ്വിറ്റ്സർലൻഡിനെതിരായ ക്വാർട്ടർ ഫൈനലിൽ കളിക്കാർ കൂടുതൽ കരുത്തോടെ പൊരുതുമെന്നും അദ്ദേഹം ഉറപ്പുനൽകി.