മെക്സിക്കോയിൽ ശക്തമായ ഭൂചലനം; സുനാമി മുന്നറിയിപ്പ്

മെക്സിക്കോ സിറ്റി: വടക്കേ അമേരിക്കൻ രാജ്യമായ മെക്സിക്കോയിലെ  തെക്കൻ പ്രവിശ്യയായ ചിയാപ്പാസിൽ  അതിശക്തമായ ഭൂചലനം. റിക്ടർ സ്കെയിലിൽ 7.4 തീവ്രത രേഖപ്പെടുത്തിയ ഭൂകമ്പമാണ് അനുഭവപ്പെട്ടത്. ഭൂചലനത്തിന്റെ പശ്ചാത്തലത്തിൽ പസഫിക് തീരമേഖലകളിൽ അധികൃതർ അടിയന്തര സുനാമി മുന്നറിയിപ്പ്  പുറപ്പെടുവിച്ചു. മെക്സിക്കോയ്ക്ക് പുറമെ അയൽരാജ്യങ്ങളായ എൽ സാൽവദോർ, ഗ്വാട്ടിമാല എന്നിവിടങ്ങളിലും അതിശക്തമായ പ്രകമ്പനം അനുഭവപ്പെട്ടത് ജനങ്ങളെ കടുത്ത പരിഭ്രാന്തിയിലാഴ്ത്തി. ഗ്വാട്ടിമാല സിറ്റിയിൽ ഉൾപ്പെടെ ഭൂചലനം ബാധിച്ച അതിർത്തി മേഖലകളിലെ ജനങ്ങളെ ഭരണകൂടം യുദ്ധകാലാടിസ്ഥാനത്തിൽ സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചതായി അന്താരാഷ്ട്ര വാർത്താ ഏജൻസികൾ റിപ്പോർട്ട് ചെയ്യുന്നു.അമേരിക്കൻ ജിയോളജിക്കൽ സർവേയുടെ  ഔദ്യോഗിക കണക്കുകൾ പ്രകാരം, മെക്സിക്കൻ തീരദേശ നഗരമായ പ്യൂർട്ടോ മഡെറോയ്ക്ക്  സമീപം പസഫിക് സമുദ്രത്തിൽ ഭൂമിക്കടിയിൽ വെറും 10 കിലോമീറ്റർ ആഴത്തിലാണ്  ഭൂചലനത്തിന്റെ പ്രഭവകേന്ദ്രം രേഖപ്പെടുത്തിയത്. പ്രഭവകേന്ദ്രത്തിന് ആഴം വളരെ കുറവായതിനാൽ ഉപരിതലത്തിലും സമീപപ്രദേശങ്ങളിലും പ്രകമ്പനത്തിന്റെ ആഘാതവും വിനാശശേഷിയും വളരെ കൂടുതലായിരുന്നു. നഗരങ്ങളിലെ വൻകിട കെട്ടിടങ്ങൾ ശക്തമായി കുലുങ്ങുന്നതും, വീടുകളിലെ ഷെൽഫുകളിൽ നിന്നും ചുവരുകളിൽ നിന്നും സാധനങ്ങൾ തകർന്നു താഴെ വീഴുന്നതുമായ ദൃശ്യങ്ങൾ ഇതിനോടകം തന്നെ സാമൂഹികമാധ്യമങ്ങളിൽ വ്യാപകമായി പ്രചരിക്കുന്നുണ്ട്. അപകടസാധ്യത മുൻകൂട്ടി കണ്ട് യു.എസ് സുനാമി മുന്നറിയിപ്പ് സംവിധാനം സമുദ്രതീരങ്ങളിൽ അതീവ ജാഗ്രതാ നിർദ്ദേശം നൽകിയിട്ടുണ്ട്.

ഭൂചലനത്തെത്തുടർന്ന് വലിയ തോതിലുള്ള നാശനഷ്ടങ്ങളോ ആളപായമോ ഇതുവരെ ദുരന്തനിവാരണ സേന ഔദ്യോഗികമായി സ്ഥിരീകരിച്ചിട്ടില്ലെങ്കിലും പ്രാദേശിക അധികൃതർ സ്ഥിതിഗതികൾ സൂക്ഷ്മമായി നിരീക്ഷിച്ചുവരികയാണ്. ഭൂകമ്പ ശാസ്ത്രജ്ഞരുടെ വിലയിരുത്തൽ പ്രകാരം 7.4 തീവ്രതയുള്ള ഭൂചലനങ്ങൾ ‘മേജർ’  വിഭാഗത്തിലാണ് ഉൾപ്പെടുന്നത്. ഇത്തരം വൻ ഭൂചലനങ്ങൾ ജനസാന്ദ്രതയേറിയ മേഖലകളിൽ വലിയ തോതിലുള്ള നാശനഷ്ടങ്ങൾക്കും അടിസ്ഥാന സൗകര്യങ്ങളുടെ വ്യാപകമായ തകർച്ചയ്ക്കും കാരണമായേക്കാമെന്ന് വിദഗ്ധർ മുന്നറിയിപ്പ് നൽകുന്നു. കൂടുതൽ ദുരന്തനിവാരണ സേനാംഗങ്ങളെ ചിയാപ്പാസ് മേഖലയിലേക്ക് നിയോഗിച്ചിട്ടുണ്ട്.