യുഎഇ വിസിറ്റ് വിസ: ബന്ധുക്കളെ കൊണ്ടുവരാൻ പുതിയ നിര്ദ്ദേശങ്ങളുമായി ജിഡിആര്എഫ്എ
ദുബായ്: യുഎഇയിലെ താമസക്കാർക്ക് തങ്ങളുടെ കുടുംബാംഗങ്ങളെയും ബന്ധുക്കളെയും സുഹൃത്തുക്കളെയും സന്ദർശന വിസയില് കൊണ്ടുവരുന്നതിനുള്ള പുതുക്കിയ സ്പോണ്സർഷിപ്പ് നിയമങ്ങള് വ്യക്തമാക്കി ജനറല് ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ്.പ്രവാസികള്ക്ക് തങ്ങളുടെ പ്രിയപ്പെട്ടവരെ വർഷത്തില് 120 ദിവസം വരെ യുഎഇയില് താമസിപ്പിക്കാൻ അനുവദിക്കുന്നതാണ് ഈ പദ്ധതി.
യാത്രക്കാരുടെ സൗകര്യത്തിനനുസരിച്ച് 30, 60, 90 ദിവസത്തെ സിംഗിള്-എൻട്രി അല്ലെങ്കില് മള്ട്ടിപ്പിള്-എൻട്രി വിസകള് തെരഞ്ഞെടുക്കാവുന്നതാണ്. ആവശ്യാനുസരണം രാജ്യത്ത് നിന്ന് തന്നെ വിസ കാലാവധി നീട്ടാനും സാധിക്കും.
സ്പോണ്സർമാരുടെ കുറഞ്ഞ ശമ്പള പരിധി
സന്ദർശകരുമായുള്ള ബന്ധം അനുസരിച്ച് സ്പോണ്സർ ചെയ്യേണ്ട വ്യക്തിക്ക് ഉണ്ടായിരിക്കേണ്ട കുറഞ്ഞ വരുമാന പരിധി ജിഡിആർഎഫ്എ നിശ്ചയിച്ചിട്ടുണ്ട്. ഇതിനായുള്ള ശമ്പള ആവശ്യകതകള് താഴെ പറയുന്ന പ്രകാരമാണ്.
ഫസ്റ്റ് ഡിഗ്രി ബന്ധുക്കള്: മാതാപിതാക്കള്, പങ്കാളി, കുട്ടികള് എന്നിവരെ സ്പോണ്സർ ചെയ്യുന്നതിന് താമസക്കാർക്ക് പ്രതിമാസം കുറഞ്ഞത് 4,000 ദിർഹം ശമ്പളം ഉണ്ടായിരിക്കണം.
രണ്ടാം ഡിഗ്രി, മൂന്നാം ഡിഗ്രി ബന്ധുക്കള്: സഹോദരങ്ങള്, മുത്തശ്ശീ-മുത്തശ്ശന്മാർ, പേരക്കുട്ടികള്, അമ്മാവന്മാർ, അമ്മായിമാർ, കസിൻസ് എന്നിവരെ സ്പോണ്സർ ചെയ്യുന്നതിന് കുറഞ്ഞത് 8,000 ദിർഹം പ്രതിമാസ ശമ്പളം ആവശ്യമാണ്.
സുഹൃത്തുക്കള്: ഒരു സുഹൃത്തിനെ സ്പോണ്സർ ചെയ്യാൻ ആഗ്രഹിക്കുന്ന താമസക്കാർക്ക് കുറഞ്ഞത് 15,000 ദിർഹം പ്രതിമാസ ശമ്പളം ഉണ്ടായിരിക്കണം.
അപേക്ഷകർക്ക് സാധുതയുള്ള യുഎഇ റസിഡൻസ് വിസയും എമിറേറ്റ്സ് ഐഡിയും ഉണ്ടായിരിക്കണം. വരുമാനം തെളിയിക്കാൻ ശമ്പള സർട്ടിഫിക്കറ്റോ സാക്ഷ്യപ്പെടുത്തി തൊഴില് കരാറോ സമർപ്പിക്കേണ്ടതുണ്ട്.
ആവശ്യമായ പ്രധാന രേഖകള്
അപേക്ഷകർ താഴെ പറയുന്ന രേഖകള് സമർപ്പിക്കേണ്ടതുണ്ട്:
സ്പോണ്സറുടെ എമിറേറ്റ്സ് ഐഡിയും പാസ്പോർട്ട് പകർപ്പും.
സന്ദർശകന്റെ ഫോട്ടോയും പാസ്പോർട്ട് പകർപ്പും (പാസ്പോർട്ടിന് കുറഞ്ഞത് 6 മാസത്തെ കാലാവധി ഉണ്ടായിരിക്കണം).
താമസ സൗകര്യം തെളിയിക്കുന്ന രേഖ (ഹോട്ടല് ബുക്കിംഗ് അല്ലെങ്കില് വാടക കരാർ).
വരുമാന സർട്ടിഫിക്കറ്റ്.
ബന്ധം തെളിയിക്കുന്ന സാക്ഷ്യപ്പെടുത്തിയ സർട്ടിഫിക്കറ്റുകള്.
വിസ നിരക്കുകളും സെക്യൂരിറ്റി ഡെപ്പോസിറ്റും
സന്ദർശന വിസകളുടെ നിരക്കുകള് താഴെ പറയുന്ന രീതിയിലാണ് ക്രമീകരിച്ചിരിക്കുന്നത്:
1. സിംഗിള് എൻട്രി വിസ (ഒരു തവണ മാത്രം പ്രവേശനം):
30 ദിവസത്തേക്ക്: 200 ദിർഹം
60 ദിവസത്തേക്ക്: 300 ദിർഹം
90 ദിവസത്തേക്ക്: 400 ദിർഹം
കൂടാതെ റീഫണ്ട് ചെയ്യാവുന്ന 1,000 ദിർഹം സെക്യൂരിറ്റി ഡെപ്പോസിറ്റ് നല്കണം.
2. മള്ട്ടിപ്പിള് എൻട്രി വിസ (പലതവണ വന്ന് പോകാം):
30 ദിവസത്തേക്ക്: 300 ദിർഹം
60 ദിവസത്തേക്ക്: 500 ദിർഹം
90 ദിവസത്തേക്ക്: 700 ദിർഹം
കൂടാതെ റീഫണ്ട് ചെയ്യാവുന്ന 2,000 ദിർഹം സാമ്പത്തിക ഗ്യാരണ്ടി നല്കണം.
(വാറ്റ്, ഹെല്ത്ത് ഇൻഷുറൻസ്, മറ്റ് സേവന നിരക്കുകള് എന്നിവ ഈ ഫീസുകള്ക്ക് പുറമെയായിരിക്കും).
എങ്ങനെ അപേക്ഷിക്കാം?
ദുബായ് വിസയുള്ള താമസക്കാർക്ക് താഴെ പറയുന്ന മാർഗ്ഗങ്ങളിലൂടെ അപേക്ഷിക്കാം:
GDRFA ദുബായ് സ്മാർട്ട് പോർട്ടല് അല്ലെങ്കില് മൊബൈല് ആപ്ലിക്കേഷൻ വഴി.
ആമർ സെന്ററുകള് (Amer Centres) അല്ലെങ്കില് കസ്റ്റമർ ഹാപ്പിനസ് സെന്ററുകള് വഴി നേരിട്ട്.
യുഎഇ പാസ് (UAE Pass) ഉപയോഗിച്ച് ഓണ്ലൈനായും അപേക്ഷ സമർപ്പിക്കാം.
കൂടുതല് അപേക്ഷകളും 48 മണിക്കൂറിനുള്ളില് പ്രോസസ്സ് ചെയ്ത് ലഭിക്കും. വിസ ലഭിച്ച തീയതി മുതല് 60 ദിവസത്തിനകം സന്ദർശകർ യുഎഇയില് പ്രവേശിച്ചിരിക്കണം.
ഉയർന്ന ജനപ്രീതി:
ബന്ധുക്കള്ക്കും സുഹൃത്തുക്കള്ക്കുമുള്ള വിസകള്ക്ക് പ്രവാസികള്ക്കിടയില് വലിയ ഡിമാൻഡാണ് ഉള്ളതെന്ന് ജിഡിആർഎഫ്എ അറിയിച്ചു. 2026-ന്റെ ആദ്യ പകുതിയില് മാത്രം 29,456 വിസകളാണ് ഈ വിഭാഗത്തില് അതോറിറ്റി അനുവദിച്ചത്. ലളിതമായ ഡിജിറ്റല് സംവിധാനങ്ങളിലൂടെ കുടുംബങ്ങളെ ഒന്നിപ്പിക്കുന്നതിനും മികച്ച ടൂറിസം സൗഹൃദ അന്തരീക്ഷം സൃഷ്ടിക്കുന്നതിനും ഈ പദ്ധതി സഹായകരമാകുന്നു.