വാട്സാപ്പിന് പിന്നാലെ ടെലിഗ്രാമിനും സിഗ്നലിനും നോട്ടീസ് അയച്ച് കേന്ദ്ര ഐടി മന്ത്രാലയം
ന്യൂഡൽഹി: പ്രമുഖ ഇൻസ്റ്റന്റ് മെസ്സേജിംഗ് ആപ്പായ വാട്സാപ്പിന് പിന്നാലെ ടെലിഗ്രാം, സിഗ്നൽഎന്നീ പ്ലാറ്റ്ഫോമുകൾക്കും നോട്ടീസ് അയച്ച് കേന്ദ്ര ഐടി മന്ത്രാലയം . ഉപയോക്താക്കളുടെ ഫോൺ നമ്പറുകൾ വെളിപ്പെടുത്താതെ പരസ്പരം കണക്ട് ചെയ്യാൻ സഹായിക്കുന്ന ‘യൂസർ നെയിം’ ഫീച്ചറിന്മേലുള്ള നിരീക്ഷണം ശക്തമാക്കുന്നതിന്റെ ഭാഗമായാണ് കേന്ദ്ര സർക്കാരിന്റെ ഈ പുതിയ നടപടി. ഈ പ്ലാറ്റ്ഫോമുകളിൽ നിലവിലുള്ള യൂസർ നെയിം സംവിധാനങ്ങൾ ഓൺലൈൻ തട്ടിപ്പുകൾക്കും വ്യാജ വ്യക്തിത്വ ചമയ്ക്കലുകൾക്കും (Impersonation) എങ്ങനെ വഴിമാറുന്നു എന്നും, ഇവ തടയാൻ എന്ത് സുരക്ഷാ മുൻകരുതലുകളാണ് സ്വീകരിച്ചിട്ടുള്ളതെന്നും വിശദീകരിക്കാൻ നോട്ടീസിൽ ആവശ്യപ്പെട്ടിട്ടുണ്ട്.
കഴിഞ്ഞ ബുധനാഴ്ചയാണ് വാട്സാപ്പ് ഇന്ത്യയിൽ അവതരിപ്പിക്കാൻ തയ്യാറെടുക്കുന്ന പുതിയ യൂസർ നെയിം ഫീച്ചറിന്റെ റോൾ-ഔട്ട് അടിയന്തിരമായി നിർത്തിവെക്കാൻ കേന്ദ്ര സർക്കാർ മെറ്റയോട് ആവശ്യപ്പെട്ടത്. ഈ ഫീച്ചർ രാജ്യത്ത് ഓൺലൈൻ സാമ്പത്തിക തട്ടിപ്പുകൾ, ഫിഷിംഗ് (Phishing), ഡിജിറ്റൽ അറസ്റ്റ് (Digital Arrest) തുടങ്ങിയ സൈബർ കുറ്റകൃത്യങ്ങൾ വൻതോതിൽ വർദ്ധിപ്പിക്കാൻ കാരണമാകുമെന്ന ആശങ്ക മുൻനിർത്തിയായിരുന്നു അത്. ഇതിന് തൊട്ടുപിന്നാലെയാണ് നിലവിൽ വർഷങ്ങളായി ഈ ഫീച്ചർ വിജയകരമായി ഉപയോഗിച്ചുവരുന്ന ടെലിഗ്രാം, സിഗ്നൽ എന്നീ ആപ്പുകളിലേക്കും കേന്ദ്രം അന്വേഷണം വ്യാപിപ്പിച്ചത്.യൂസർ നെയിം ഫീച്ചറിലൂടെ ഔദ്യോഗിക സ്ഥാപനങ്ങളുടെയോ പ്രമുഖ വ്യക്തികളുടെയോ പേരിനോട് സാമ്യമുള്ള വ്യാജ ഐഡികൾ നിർമ്മിച്ച് ജനങ്ങളെ വഞ്ചിക്കാൻ തട്ടിപ്പുകാർക്ക് എളുപ്പത്തിൽ സാധിക്കുമെന്ന് സർക്കാർ വിലയിരുത്തുന്നു. ടെലിഗ്രാമിന് അയച്ച നോട്ടീസിൽ, പ്ലാറ്റ്ഫോമിൽ ഇത്തരം ഒരു ഫീച്ചർ ഇനി എന്തിനാണ് തുടരാൻ അനുവദിക്കുന്നത് എന്ന് വിശദീകരിക്കാൻ പോലും കേന്ദ്രം ആവശ്യപ്പെട്ടിട്ടുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്. അടുത്തിടെ നീറ്റ് പരീക്ഷാ (NEET) ചോദ്യപേപ്പർ ചോർച്ചയുമായി ബന്ധപ്പെട്ട് ടെലിഗ്രാമിന് ഇന്ത്യയിൽ താൽക്കാലിക നിരോധനം ഏർപ്പെടുത്തിയിരുന്ന പശ്ചാത്തലത്തിൽ പുതിയ നോട്ടീസ് കമ്പനിക്ക് കടുത്ത പ്രതിസന്ധിയാകും.
ഫോൺ നമ്പർ പങ്കിടാതെ സ്വകാര്യത ഉറപ്പാക്കുക എന്ന ലക്ഷ്യത്തോടെയാണ് കമ്പനികൾ ഈ ഫീച്ചർ കൊണ്ടുവരുന്നതെങ്കിലും സൈബർ സുരക്ഷ മുൻനിർത്തി സർക്കാരിനെ തൃപ്തിപ്പെടുത്തുന്ന രീതിയിലുള്ള സുരക്ഷാ ക്രമീകരണങ്ങൾ ബോധ്യപ്പെടുത്താൻ സാധിച്ചില്ലെങ്കിൽ ഈ ആപ്പുകൾക്കെതിരെ ഐടി ആക്ട് (IT Act) പ്രകാരം കർശനമായ നിയന്ത്രണങ്ങളിലേക്ക് കടക്കാനാണ് കേന്ദ്രത്തിന്റെ തീരുമാനം.
https://www.worldm.news/national/whatsapp-responds-to-user--31963