കോൺക്രീറ്റ് കാടായി മുംബൈ : നഗരം ചുട്ടുപൊള്ളുമ്പോൾ കടന്നുവരുന്ന ഒരു പരിസ്ഥിതിദിനം

മുംബൈ: കനത്തചൂടിനെ തുടച്ചുമാറ്റിക്കൊണ്ട് കേരളത്തിൽ കാലവർഷത്തിന്  തുടക്കം കുറിച്ചുകഴിഞ്ഞപ്പോൾ മഹാരാഷ്ട്ര അടക്കമുള്ള ചില സംസ്ഥാനങ്ങൾ  ഇപ്പോഴും  ചുട്ടുപൊള്ളുകയാണ് .പ്രത്യേകിച്ച് മുംബൈ പോലുള്ള മഹാനഗരങ്ങൾ വിയർത്തുകുളിക്കയാണ് .

''രാവിലെ ലോക്കൽ ട്രെയിനിൽ കയറാൻ പോകുമ്പോൾ,  പൊടിയും പുകയുമാണ് വീശുന്നത്. മുൻപൊക്കെ രാത്രിയിൽ കടൽത്തീരത്ത് തണുത്ത കാറ്റ് വീശുമായിരുന്നു. ഇപ്പോള്‍ ചൂടുള്ള നീരാവിയാണ് ഉയരുന്നത്. ഒരു തണുത്ത കാറ്റിന് വേണ്ടി ലീവെടുത്ത് നാട്ടിൽപോകേണ്ട  അവസ്ഥയാണ് ഇപ്പോഴുള്ളത് '' മുംബൈ നിവാസിയും പാലക്കാട്  സ്വദേശിയുമായ പ്രസാദ് ഷൊറണ്ണൂർ  പറയുന്നു. ഇന്ന് മിക്കവാറും എല്ലാ മുംബൈ നിവാസികളും അനുഭവിക്കുന്ന ഒന്നാണ് മാറി വരുന്ന കാലാവസ്ഥ വ്യതിയാനവും അസഹനീയമായ ഉഷ്‌ണ തരംഗവും.

കടൽക്കാറ്റിൻ്റെ നേർത്ത തണുപ്പിനെപ്പോലും തടഞ്ഞുവെച്ചുകൊണ്ട് നഗരത്തെ  ഊഷരതയുടെ  ആസ്ഥാനമാക്കി മാറ്റുകയാണ്  അധികൃതവും അനധികൃതവുമായ,വർദ്ദിച്ചുവരുന്ന മുംബൈയിലെ കെട്ടിടനിർമ്മാണം. സിമന്റ് കാടുകളിൽ നിന്ന് നിർഗ്ഗമിക്കുന്ന ചൂട്‌പുകയാണ് ഇന്ന് മുംബൈ നിവാസികളുടെ ജീവവായു .ഒരു പച്ചപ്പിനെപ്പോലും അവശേഷിപ്പിക്കാതെ മുംബൈയേയും പരിസരപ്രദേശങ്ങളെയും മണ്ണുവാരിയന്ത്രങ്ങൾ  ഉഴുതുമറച്ചുകൊണ്ടിരിക്കുമ്പോൾ നഗരത്തിലേക്ക് വൈകിയെത്തി, നേരത്തെപോകുന്ന പ്രതിഭാസമായി മഴക്കാറുകളും മാറിക്കൊണ്ടിരിക്കുന്നു.

കഴിഞ്ഞ ആറ് മാസമായി മുംബൈയിലെ കാലാവസ്ഥയിലുണ്ടായ മാറ്റങ്ങൾ നഗരത്തിലെ ദൈനംദിന ജീവിതത്തിലും പൊതുജനാരോഗ്യത്തിലും പരിസ്ഥിതിയിലും ഗുരുതരമായ പ്രത്യാഘാതങ്ങൾ സൃഷ്‌ടിച്ചിട്ടുണ്ട്. ലോക പരിസ്ഥിതി ദിനത്തിൽ മാറിക്കൊണ്ടിരിക്കുന്ന കാലാവസ്ഥയുടെ വ്യക്തമായ മുന്നറിയിപ്പാണിത്.

ശൈത്യകാലം കുറഞ്ഞ് വരുന്ന മുബൈ 

ഇത്തവണ ഫെബ്രുവരി അവസാനിക്കുന്നതിന് മുമ്പുതന്നെ ചൂട് രൂക്ഷമാകാൻ തുടങ്ങിയിരുന്നു. കാലാവസ്ഥാ വകുപ്പിൻ്റെ (IMD) കണക്കുകൾ പ്രകാരം, മാർച്ച് ആറിന് മുംബൈയിൽ ഈ സീസണിലെ ആദ്യത്തെ ഉഷ്‌ണതരംഗം രേഖപ്പെടുത്തി. സാന്താക്രൂസ് നിരീക്ഷണാലയത്തിൽ താപനില 38.9 ഡിഗ്രി സെൽഷ്യസായി ഉയർന്നു. സാധാരണയേക്കാൾ ഏകദേശം ആറ് ഡിഗ്രി കൂടുതൽ.വരാനിരിക്കുന്ന ചുട്ടുപൊള്ളുന്ന വേനൽക്കാലത്തിൻ്റെ മുന്നറിയിപ്പായിരുന്നു ഈ മാർച്ചിലെ ഉഷ്‌ണതരംഗം. ഏപ്രിൽ, മെയ് മാസങ്ങളിൽ സ്ഥിതി കൂടുതൽ വഷളായി. താപനില 39 നും 40 നും ഇടയിൽ ഉയർന്നു. പകൽ സമയത്തെ ചൂടിനേക്കാൾ കൊടും ചൂടുള്ള രാത്രികൾ നഗരവാസികള്‍ക്ക് കൂടുതൽ ദുരിതപൂർണമായിരുന്നു. കോൺക്രീറ്റ് ഘടനകളും ദ്രുതഗതിയിലുള്ള നഗരവൽക്കരണവും കാരണം നഗരത്തിനുള്ളിൽ ചൂട് തങ്ങി നിൽക്കുന്നു.രാത്രിയിലെ താപനില ശരാശരിയേക്കാൾ ഏകദേശം മൂന്ന് ഡിഗ്രി ഉയരാൻ കാരണമായി. എയർ കണ്ടീഷണറുകളും ഫാനുകളും പ്രവർത്തിപ്പിച്ചിട്ടും, നിരവധി മുംബൈ നിവാസികൾക്ക് വിയർപ്പിൽ മുങ്ങിയ രാത്രികൾ സഹിക്കേണ്ടിവന്നു.

ചൂടിനൊപ്പം, മുംബൈയിലെ വായുവിൻ്റെ ഗുണനിലവാരവും ആശങ്കയ്ക്ക് കാരണമായി. കേന്ദ്ര മലിനീകരണ നിയന്ത്രണ ബോർഡിൻ്റെ ഡാറ്റ പ്രകാരം, ജനുവരി മുതൽ മാർച്ച് വരെ മുംബൈയുടെ ശരാശരി വായു ഗുണനിലവാര സൂചിക (AQI) 170 നും 200 നും ഇടയിലായിരുന്നു. ഇത് 'മോശം' നിലവാരം എന്ന് തരംതിരിച്ചിരുന്നു. ചെമ്പൂർ, ബാന്ദ്ര-കുർള കോംപ്ലക്‌സ്, മസ്‌ഗാവ് തുടങ്ങിയ പ്രദേശങ്ങളിൽ വായു ഗുണനിലവാര സൂചിക (AQI) പലപ്പോഴും 250 കവിഞ്ഞു. തൽഫലമായി, ശ്വസന സംബന്ധമായ അസുഖങ്ങൾ, ചുമ, തൊണ്ട സംബന്ധമായ അസുഖങ്ങൾ, അലർജികൾ എന്നിവയിലും വർധനവുണ്ടായി.കൊച്ചുകുട്ടികൾ, മുതിർന്ന പൗരന്മാർ, ആസ്ത്മ രോഗികൾ എന്നിവരെയാണ് വായു മലിനീകരണം വേഗത്തിൽ ബാധിച്ചത്. മെയ് അവസാനത്തോടെ സ്ഥിതി അൽപ്പം കുറഞ്ഞു. ശക്തമായ കടൽക്കാറ്റ് വായുവിലൂടെയുള്ള പൊടിയുടെയും മലിനീകരണത്തിൻ്റെയും അളവ് കുറയ്ക്കാൻ സഹായിച്ചു. എന്നാൽ പരിസ്ഥിതി ദിനത്തോടനുബന്ധിച്ച്, മുംബൈയുടെ ശരാശരി വായു ഗുണനിലവാര സൂചിക 55 നും 65 നും ഇടയിൽ രേഖപ്പെടുത്തി, ഇത് 'തൃപ്‌തികരമായ' വിഭാഗത്തിൽ പെടുന്നു."എന്നിരുന്നാലും, ഇത് ഒരു താൽക്കാലിക ആശ്വാസം മാത്രമാണ്, മലിനീകരണത്തിൻ്റെ മൂലകാരണം വീണ്ടും തുടരുകയാണ്," പരിസ്ഥിതി ഗവേഷകനും ശാസ്ത്രജ്ഞനുമായ ചിൻമയ് ഖനോൽക്കർ നിരീക്ഷിച്ചു. മലിനീകരണത്തിൻ്റെ പ്രാഥമിക കാരണം കണ്ടത്തേണ്ടതുണ്ട്. വർധിച്ചുവരുന്ന മലിനീകരണ തോതിൽ ബോംബെ ഹൈക്കോടതി പ്രകടിപ്പിച്ച അതൃപ്‌തി കണക്കിലെടുത്ത്, ബ്രിഹൻമുംബൈ മുനിസിപ്പൽ കോർപ്പറേഷൻ (ബിഎംസി) നിരവധി കർശന നടപടികൾ നടപ്പാക്കി.

നിർമ്മാണ സ്ഥലങ്ങളിൽ നിന്ന് പുറപ്പെടുന്ന പൊടി മലിനീകരണത്തിൻ്റെ പ്രധാന ഉറവിടO

നഗരത്തിലുടനീളമുള്ള ആയിരക്കണക്കിന് നിർമ്മാണ സ്ഥലങ്ങളിൽ നിന്ന് പുറപ്പെടുന്ന പൊടി മലിനീകരണത്തിൻ്റെ പ്രധാന ഉറവിടമായി കണക്കാക്കി. എല്ലാ നിർമ്മാണ പദ്ധതികളിലും സെൻസർ അധിഷ്‌ഠിത വായു ഗുണനിലവാര മോണിറ്ററുകളും എൽഇഡി ഡിസ്പ്ലേ ബോർഡുകളും സ്ഥാപിക്കുന്നത് നിർബന്ധമാക്കി. ഈ സംവിധാനം തത്സമയ വായു ഗുണനിലവാര ഡാറ്റ മുനിസിപ്പൽ കൺട്രോൾ റൂമിലേക്ക് നേരിട്ട് കൈമാറാൻ പ്രാപ്‌തമാക്കുന്നു. പ്രധാന റോഡുകളിൽ വെള്ളം സ്പ്രേ ചെയ്‌ത് പൊടി നിയന്ത്രിക്കാനുള്ള ശ്രമങ്ങൾ ഊർജിതമാക്കി. അങ്ങനെ മുനിസിപ്പൽ കോർപ്പറേഷൻ ആദ്യമായി ഒരു 'ഹീറ്റ് ആക്ഷൻ പ്ലാൻ' നടപ്പിലാക്കി.ഉച്ചയ്ക്ക് 12:00 നും വൈകുന്നേരം 4:00നും ഇടയിൽ പുറത്ത് ജോലി ചെയ്യുന്ന തൊഴിലാളികൾക്ക് വിശ്രമ ഇടവേളകൾ നൽകാനും കുടിവെള്ളം ക്രമീകരിക്കാനും നിർദ്ദേശങ്ങൾ നൽകി. മുംബൈ ഒരുകാലത്ത് ശുദ്ധവായു, തണുത്ത കടൽക്കാറ്റ്, സുഖകരമായ കാലാവസ്ഥ എന്നിവയ്ക്ക് പേരുകേട്ടതായിരുന്നു.

വർധിച്ചുവരുന്ന നഗരവൽക്കരണം, കോൺക്രീറ്റ് കെട്ടിടങ്ങളുടെ നിർമാണം മെട്രോ ലൈനുകളുടെയും മറ്റ് അടിസ്ഥാന സൗകര്യ പദ്ധതികളുടെയും നിർമ്മാണം എന്നിവ കാരണം, നഗരത്തിലെ താപനില ക്രമാനുഗതമായി വർദ്ധിച്ചുകൊണ്ടിരിക്കുകയാണ്. പുകമഞ്ഞ് നിറഞ്ഞ ശൈത്യകാല ദിവസങ്ങളെ അപേക്ഷിച്ച് ഇന്ന് മുംബൈയിലെ വായുവിന് അൽപ്പം മെച്ചപ്പെട്ട അനുഭവം ലഭിച്ചേക്കാം, എന്നാൽ കൂടുതൽ ഗുരുതരമായ ഒരു പ്രതിസന്ധിയിലേക്കാണ് ഡാറ്റ വിരൽ ചൂണ്ടുന്നതെന്നും പരിസ്ഥിതി സംരക്ഷകർ മുന്നറിയിപ്പ് നൽകുന്നു.

ഓക്സ്ഫോർഡ് സർവകലാശാല നടത്തിയ പഠനത്തിൽ, മുംബൈ, നാഗ്പൂർ, പൂനെ എന്നിവ അപകടകരമായ വിധം വർധിച്ചുകൊണ്ടിരിക്കുന്ന ചൂടിന് സാധ്യതയുള്ള 50 നഗരങ്ങളുടെ പട്ടികയിൽ ഇടം നേടിയിരിക്കയാണ്.ഒരു ജനതയുടെ കടുത്ത ചൂടിൻ്റെ  ദോഷകരമായ ശാരീരിക, സാമൂഹിക, സാമ്പത്തിക പ്രത്യാഘാതങ്ങളോടുള്ള സംവേദനക്ഷമതയെയാണ് താപ അപകടസാധ്യതാ ദുർബലതയെ  അളക്കുന്നത്.

'മൂവിംഗ് ബിയോണ്ട് എക്സ്പോഷർ: എ ഗ്ലോബലി കംപറബിൾ ഫ്രെയിംവർക്ക് ഫോർ ഹീറ്റ് റിസ്ക് അസസ്മെന്റ് ഇൻ സിറ്റിസ്' എന്ന തലക്കെട്ടുള്ള  ഓക്സ്ഫോർഡ് സർവകലാശാല നടത്തിയ പഠനത്തിൽ ലോകമെമ്പാടുമുള്ള 205 നഗരങ്ങളിലെ 1 ദശലക്ഷത്തിലധികം ജനസംഖ്യയുള്ള ആളുകളുടെ ജീവിത സാഹചര്യങ്ങൾ വിശകലനം ചെയ്തു. ഇന്ത്യയുൾപ്പെടെ നിരവധി രാജ്യങ്ങൾ എൽ-നിനോയ്ക്ക് കീഴിൽ വലയുന്ന സമയത്താണ് ഈ പഠനം നടക്കുന്നത് -  കാറ്റ് ദുർബലമാകുകയും ചൂടുവെള്ളത്തെ ആഗോള കിഴക്കോട്ട് തള്ളിവിടുകയും ചെയ്യുമ്പോൾ സംഭവിക്കുന്ന ഒരു കാലാവസ്ഥാ ഘട്ടം. തൽഫലമായി, എൽ നിനോ ആഗോളതലത്തിൽ താപനില ഉയരാൻ കാരണമാകുന്നു.

എൽ നിനോ പ്രതിഭാസത്തിൻ്റെ വരവ് 

ലോകത്തെ ആശങ്കയിലാഴ്ത്തികൊണ്ടാണ്  എൽ നിനോ പ്രതിഭാസം വീണ്ടും വരുന്നത് . ഈ വർഷം ആഗോള താപനിലയിൽ വൻ വർദ്ധനയുണ്ടാകുമെന്ന കടുത്ത ജാഗ്രതാനിർദ്ദേശവുമായി ഐക്യരാഷ്ട്രസഭയുടെ കാലാവസ്ഥാ ഏജൻസിയായ വേൾഡ് മെട്രോളജിക്കൽ ഓർഗനൈസേഷനും  (WMO)പറയുന്നു.. പുതിയ റിപ്പോർട്ടുകൾ പ്രകാരം ദക്ഷിണേഷ്യൻ രാജ്യങ്ങളിൽ കടുത്ത വരൾച്ചയ്ക്കുള്ള സാധ്യതയുണ്ടെന്നാണ് മുന്നറിയിപ്പ്. കേരളത്തിലും ഇന്ത്യയിലാകെയും ഈ പ്രതിഭാസം വലിയ തിരിച്ചടിയാകാൻ സധ്യതകാണിക്കുന്നു .കാലാവസ്ഥാ വ്യതിയാനത്തിന്റെ ഭാഗമായി ശരാശരിയേക്കാൾ 6 ഡിഗ്രി സെൽഷ്യസ് വരെ താപനില ഉയർന്നേക്കുമെന്നാണ് മുന്നറിയിപ്പ്. സമുദ്രങ്ങളിൽ ഉഷ്ണതരംഗങ്ങൾ രൂപപ്പെടുന്നത് കടുത്ത വരൾച്ചയ്ക്കും, ചിലയിടങ്ങളിൽ അപ്രതീക്ഷിതമായ കനത്ത മഴയ്ക്കും കാരണമാകും. മധ്യ, കിഴക്കൻ പസഫിക് സമുദ്രത്തിലെ സമുദ്രോപരിതല താപനിലയിലുണ്ടാകുന്ന അസ്വാഭാവികമായ മാറ്റങ്ങളാണ് എൽ നിനോയ്ക്ക് കാരണം. ജൂൺ മുതൽ ആരംഭിക്കുന്ന ഉയർന്ന താപനില ഓഗസ്റ്റ് മാസം വരെ തുടരും. നവംബർ മാസം വരെ എൽ നിനോ പ്രതിഭാസം നീണ്ടുനിൽക്കാൻ സാധ്യതയുണ്ടെന്ന് വേൾഡ് മെട്രോളജിക്കൽ ഓർഗനൈസേഷൻ വിലയിരുത്തുന്നു.