ഐ.പി.എൽ അമ്പയർമാർക്ക് പ്രതിഫലമായി ലഭിക്കുന്നത് ലക്ഷങ്ങൾ ; അന്താരാഷ്ട്ര അമ്പയർ അനിൽ ചൗധരിയുടെ വെളിപ്പെടുത്തൽ

മുംബൈ: ഐ.പി.എൽ മത്സരങ്ങളിൽ അമ്പയർമാർക്ക് ലഭിക്കുന്ന പ്രതിഫലത്തെക്കുറിച്ചുള്ള വിവരങ്ങൾ വെളിപ്പെടുത്തി മുൻ അന്താരാഷ്ട്ര അമ്പയർ അനിൽ ചൗധരി. ഐ.പി.എൽ സീസണിൽ ഒരു അമ്പയർക്ക് ശരാശരി 45 മുതൽ 50 ലക്ഷം രൂപ വരെ വരുമാനം ലഭിക്കാറുണ്ടെന്ന് അദ്ദേഹം ഒരു പോഡ്‌കാസ്റ്റിൽ വ്യക്തമാക്കി. 2025-ൽ വിരമിച്ച അനിൽ ചൗധരിയാണ് ക്രിക്കറ്റ് ലോകത്തെ ഞെട്ടിപ്പിക്കുന്ന ഈ കണക്കുകൾ പങ്കുവെച്ചത്.ഐ.പി.എല്ലിൽ ഓരോ മത്സരത്തിനും അമ്പയർമാർക്ക് ലഭിക്കുന്ന തുകയിൽ വ്യത്യാസമുണ്ട്. 

സാധാരണ മത്സരങ്ങൾ: 4,000 ഡോളർ (ഏകദേശം 3.3 ലക്ഷം രൂപ).

പ്ലേഓഫ് മത്സരങ്ങൾ: 6,000 ഡോളർ (ഏകദേശം 5 ലക്ഷം രൂപ).

ഫൈനൽ മത്സരം: 8,000 ഡോളർ (ഏകദേശം 6.7 ലക്ഷം രൂപ).

ഇതിനുപുറമെ, പ്രതിദിന അലവൻസായി (DA) 6,000 ഡോളർ വരെ ലഭിക്കാറുണ്ട്.

ആഭ്യന്തര ക്രിക്കറ്റിൽ മുൻനിര അമ്പയർമാർക്ക് സീസണിൽ 20 മുതൽ 25 ലക്ഷം രൂപ വരെ അധിക വരുമാനവും ലഭിക്കുന്നുണ്ടെന്ന് അദ്ദേഹം കൂട്ടിച്ചേർത്തു.

അന്താരാഷ്ട്ര ക്രിക്കറ്റിലെ വരുമാനം:

അന്താരാഷ്ട്ര മത്സരങ്ങളിൽ അമ്പയർമാർക്ക് ലഭിക്കുന്ന പ്രതിഫലത്തെക്കുറിച്ചും അനിൽ ചൗധരി വിവരിച്ചു. ടെസ്റ്റ് മത്സരങ്ങൾക്ക് ഏകദേശം 8 ലക്ഷം രൂപയും, ടി20 മത്സരങ്ങൾക്ക് 2 ലക്ഷം രൂപയുമാണ് പ്രതിഫലം. മത്സരം നടക്കുന്നുണ്ടോ അതോ മഴമൂലം ഉപേക്ഷിക്കപ്പെട്ടതാണോ എന്നത് അമ്പയർമാരുടെ പ്രതിഫലത്തെ ബാധിക്കില്ലെന്നും അദ്ദേഹം വ്യക്തമാക്കി.

അതോടൊപ്പം, ഇന്ത്യൻ നായകന്മാരായ വിരാട് കോഹ്‌ലി, രോഹിത് ശർമ്മ, എം.എസ്. ധോണി എന്നിവർ ഡി.ആർ.എസ് (DRS) തീരുമാനങ്ങൾ എടുക്കുന്നതിലെ വ്യത്യസ്ത ശൈലികളെക്കുറിച്ചും അനിൽ ചൗധരി സംസാരിച്ചു. ധോണിയുടെ ഡി.ആർ.എസ് തീരുമാനങ്ങൾ എടുക്കാനുള്ള മികവിനെ അദ്ദേഹം ‘മാസ്റ്റർ ഓഫ് ഡി.ആർ.എസ്’ എന്ന് വിശേഷിപ്പിച്ചു