ബഹിരാകാശ യാത്രികൻ ശുഭാൻഷു ശുക്ല മാർച്ച് 28ന് തിരുവനന്തപുരത്ത്

തിരുവനന്തപുരം: ബഹിരാകാശ യാത്രികൻ ശുഭാൻഷു ശുക്ല മാർച്ച് 28ന് തിരുവനന്തപുരത്ത് എത്തും. ലോക്ഭവൻ ഒരുക്കുന്ന പ്രത്യേക പരിപാടിയിൽ ഗവർണർ രാജേന്ദ്ര അർലേക്കറുടെ അതിഥിയായാണ് ശുഭാൻഷു കേരളത്തിലെത്തുക. വൈകുന്നേരം നാല് മണിക്കു ആരംഭിക്കുന്ന പരിപാടിയിൽ തെരഞ്ഞെടുക്കപ്പെട്ട 500ഓളം വിദ്യാർഥികളുമായി ശുഭാൻഷു ലോക്ഭവനിൽ സംവദിക്കും. ബഹിരാകാശത്തിൽ ഇന്ത്യ, സുശക്തം ഇന്ത്യ, വികസിത ഭാരത്തിനായുള്ള യുവജന വീക്ഷണം എന്നീ വിഷയത്തിൽ പ്രഭാഷണം നടത്തുമെന്നും ലോക്ഭവൻ അറിയിച്ചിട്ടുണ്ട്.നാല് പതിറ്റാണ്ടിന് ശേഷം ബഹിരാകാശത്തെത്തിയ യാത്രികനാണ് ശുഭാൻഷു ശുക്ല. അന്താരാഷ്ട്ര ബഹിരാകാശ നിലയത്തിലെ 18 ദിവസത്തെ ദൗത്യത്തിന് ശേഷമായിരുന്നു ശുഭാൻഷു ഇന്ത്യയിലേക്ക് മടങ്ങിയത്. ആദ്യമായാണ് ബഹിരാകാശ നിലയം സന്ദർശിച്ചതിന് ശേഷം ശുഭാൻഷു കേരളത്തിലെത്തുന്നത്. അതിനാൽ ആവേശകരമായി പരിപാടി നടത്താൻ തന്നെയാണ് ലോക്ഭവൻ്റെ തീരുമാനം.