മുംബ്ര ട്രെയിൻ ദുരന്തം:രണ്ട് റെയിൽവേ എഞ്ചിനീയർമാർക്ക് ബോംബെ ഹൈക്കോടതി ഇടക്കാല സംരക്ഷണം നൽകി.

മുംബൈ:ജൂൺ 9 ന് അഞ്ച് യാത്രക്കാരുടെ മരണത്തിന് കാരണമായ മുംബ്ര ട്രെയിൻ അപകടത്തിൽ പ്രതികളായ സെൻട്രൽ റെയിൽവേ എഞ്ചിനീയർമാരായ വിശാൽ ഡോളസിനും സമർ യാദവിനും അറസ്റ്റിൽ നിന്ന് ബോംബെ ഹൈക്കോടതി ഇടക്കാല ഇളവ് അനുവദിച്ചു.ഡിസംബർ 9 വരെ ഇരുവരുടെയും മുൻകൂർ ജാമ്യാപേക്ഷ പരിഗണിക്കുന്നതുവരെ ഇരുവർക്കുമെതിരെ യാതൊരു നിർബന്ധിത നടപടിയും സ്വീകരിക്കരുതെന്ന് ജസ്റ്റിസ് നിതിൻ ബോർക്കർ പോലീസിനോട് നിർദ്ദേശിച്ചു.

കഴിഞ്ഞയാഴ്ച താനെ സെഷൻസ് കോടതി മുൻകൂർ ജാമ്യാപേക്ഷ തള്ളിയതിനെത്തുടർന്നാണ് അഭിഭാഷകരായ നിതിൻ ഗവാരെ പാട്ടീൽ, ശാന്തനു കോൽഹെ എന്നിവർ മുഖേന രണ്ട് എഞ്ചിനീയർമാരും ഹൈക്കോടതിയെ സമീപിച്ചത് .കേസിൽ അന്വേഷണം ഇപ്പോഴും പുരോഗമിക്കുകയാണെന്ന് പബ്ലിക് പ്രോസിക്യൂട്ടർ റുതുജ അംബേക്കർ കോടതിയെ അറിയിച്ചു.സംഭവം "വെറും അപകടം" മാത്രമാണെന്ന വാദം അംഗീകരിക്കാൻ താനെ സെഷൻസ് കോടതി വിസമ്മതിച്ചു. അഞ്ച് യാത്രക്കാർ മരിക്കുകയും ഒമ്പത് പേർക്ക് പരിക്കേൽക്കുകയും ചെയ്ത ദുരന്തം കുറ്റാരോപിതരായ റെയിൽവേ എഞ്ചിനീയർമാരുടെയും മറ്റ് ഉദ്യോഗസ്ഥരുടെയും "അറിഞ്ഞുകൊണ്ടുളള വീഴ്ച" മൂലമാണെന്ന് കോടതി നിരീക്ഷിച്ചു.

പാളം തെറ്റാനുള്ള കാരണത്തെക്കുറിച്ച് രണ്ട് പരസ്പരവിരുദ്ധമായ റിപ്പോർട്ടുകൾ കോടതിയിൽ സമർപ്പിച്ചു.ജിആർപി നിയോഗിച്ച വീർമാത ജിജാബായ് ടെക്നോളജിക്കൽ ഇൻസ്റ്റിറ്റ്യൂട്ട് (വിജെടിഐ) നടത്തിയ അന്വേഷണത്തിൽ, ആവർത്തിച്ചുള്ള മുന്നറിയിപ്പുകൾ നൽകിയിട്ടും ഗുരുതരമായ ട്രാക്ക് തകരാറുകൾ പരിഹരിക്കുന്നതിൽ പരാജയപ്പെട്ടതിന് ഡോളസും യാദവും ഉത്തരവാദികളാണെന്ന് കണ്ടെത്തി.റെയിൽ ജോയിന്റുകൾക്കിടയിൽ 17 മില്ലീമീറ്റർ വിടവ്, 7 മില്ലീമീറ്റർ ലംബ വിടവ്, 4 മില്ലീമീറ്റർ ലാറ്ററൽ ഷിഫ്റ്റ് എന്നിവ റിപ്പോർട്ട് എടുത്തുകാണിച്ചു.ഈ തകരാറുകൾ പാളം തെറ്റുന്നതിലേക്ക് നയിച്ച ഒരു ശക്തമായ കുലുക്കത്തിന് കാരണമായി എന്ന് റിപ്പോർട്ടിൽ ആരോപിക്കപ്പെടുന്നു.

ജൂൺ 5 ന് ട്രാക്ക് മാറ്റിയതിനുശേഷം വെൽഡിംഗ് നടത്തിയിട്ടില്ലെന്നും ട്രാക്ക് കൾക്കിടയിൽ  വെള്ളം കയറിയത് ലൈനിനെ കൂടുതൽ ദുർബലപ്പെടുത്തിയെന്നും റിപ്പോർട്ടിൽ പറയുന്നു. എന്നാൽ റെയിൽവേയുടെ വിദഗ്ദ്ധ സമിതി വിജെടിഐ നിഗമനങ്ങളെ തള്ളിക്കളഞ്ഞു.2.25 ഡിഗ്രി വളവിൽ  അനുവദനീയമായ മണിക്കൂറിൽ 72 കിലോമീറ്റർ വേഗതയിലാണ് ട്രെയിൻസഞ്ചരിച്ചതെന്ന്  കമ്മിറ്റി പറഞ്ഞു.

അപകടം പൂർണമായും ഒഴിവാക്കാവുന്നതാണെന്നും, തിരക്കേറിയ സമയങ്ങളിൽ ഇടനാഴിയിൽ തിരക്ക് കൂടുതലാണെന്ന് അറിയാമായിരുന്നിട്ടും, തകർന്ന ട്രാക്കുകളും മോശം അറ്റകുറ്റപ്പണികളും അധികൃതർ അവഗണിച്ചതിനാലാണെന്നും സെഷൻസ് കോടതി വിധിച്ചു.