സിപിഐഎം പ്രതിഷേധo: ആലപ്പുഴ നഗരസഭയുടെ സ്വീകരണച്ചടങ്ങിൽ ജി. സുധാകരൻ പങ്കെടുത്തില്ല

ആലപ്പുഴ: സിപിഐഎം പ്രതിഷേധ സാധ്യത ഉയർന്ന സാഹചര്യത്തിൽ മുൻ മന്ത്രിയും മുതിർന്ന സിപിഐഎം നേതാവുമായ ജി. സുധാകരൻ ആലപ്പുഴ നഗരസഭ സംഘടിപ്പിച്ച സ്വീകരണച്ചടങ്ങിൽ നിന്ന് വിട്ടുനിന്നു  പ്രതിഷേധം ഉണ്ടാകുമെന്ന മുന്നറിയിപ്പിനെ തുടർന്നാണ് പരിപാടിയിൽ പങ്കെടുക്കേണ്ടെന്ന തീരുമാനം അദ്ദേഹം സ്വീകരിച്ചത്.ആലപ്പുഴ നഗരസഭയുടെ സ്വീകരണച്ചടങ്ങിൽ ജി. സുധാകരനെ ഒഴികെയുള്ള എംഎൽഎമാർ പങ്കെടുത്ത് ആദരം ഏറ്റുവാങ്ങി. സുധാകരന്റെ അസാന്നിധ്യം ചടങ്ങിൽ ശ്രദ്ധേയമായി. സമീപകാലത്ത് പൊതുവേദികളിൽ നടത്തിയ പരാമർശങ്ങളുടെ പശ്ചാത്തലത്തിൽ ജി. സുധാകരന് സിപിഐഎം നേതൃത്വം താക്കീത് നൽകിയിരുന്നു. പൊതുവേദികളിലെ വിമർശനങ്ങളും അധിക്ഷേപങ്ങളും അവസാനിപ്പിക്കണമെന്നും രാഷ്ട്രീയ അഭിപ്രായവ്യത്യാസങ്ങൾ ഇത്തരത്തിൽ പ്രകടിപ്പിക്കരുതെന്നും പാർട്ടി നേതൃത്വം നിർദേശിച്ചിരുന്നു.സുധാകരൻ നിലപാട് മാറ്റിയില്ലെങ്കിൽ ക്രമസമാധാന പ്രശ്നങ്ങൾ ഉണ്ടാകാൻ സാധ്യതയുണ്ടെന്ന് സിപിഐഎം ആലപ്പുഴ ജില്ലാ സെക്രട്ടറി ആർ. നാസർ മുന്നറിയിപ്പ് നൽകിയിരുന്നു. തുടർച്ചയായ വിമർശനങ്ങൾ തുടരുകയാണെങ്കിൽ പ്രതികരിക്കേണ്ട സാഹചര്യം ഉണ്ടാകുമെന്നും അദ്ദേഹം വ്യക്തമാക്കിയിരുന്നു. അതേസമയം, ജി. സുധാകരനെതിരായ സിപിഐഎമ്മിന്റെ നിലപാടിനെതിരെ കോൺഗ്രസ് നേതാവും എംപിയുമായ കെ.സി. വേണുഗോപാൽ രംഗത്തെത്തി. സുധാകരനെതിരായ ഇത്തരം നീക്കങ്ങൾ സിപിഐഎം പ്രവർത്തകർ പോലും അംഗീകരിക്കില്ലെന്നാണ് അദ്ദേഹത്തിന്റെ പ്രതികരണം.