കെ സി വേണുഗോപാലിനെതിരെ വ്യാജ ചിത്രം: കൈരളി ന്യൂസിനെതിരെ പരാതി

കണ്ണൂർ: എഐസിസി ജനറൽ സെക്രട്ടറി കെ സി വേണുഗോപാലിനെതിരെ വ്യാജ ചിത്രം പ്രചരിപ്പിച്ചതിന് കൈരളി ന്യൂസിനെതിരെ കോൺഗ്രസ് തെരഞ്ഞെടുപ്പ് കമ്മിഷനിലും പൊലീസിലും പരാതി നൽകി. എംപിക്കെതിരെ ചാനൽ വ്യാജവും അപകീർത്തികരവുമായ ചിത്രം പ്രചരിപ്പിച്ചതിനെതിരെ എഐസിസി നിയമവിഭാഗം ചെയർമാൻ ഡോ. അഭിഷേക് സിങ്‌വി കേന്ദ്ര തെരഞ്ഞെടുപ്പ് കമ്മിഷനിലാണ് പരാതി നൽകിയത്. ഇതിനുപുറമെ കെപിസിസി വൈസ് പ്രസിഡൻ്റ് എ എ ഷുക്കൂർ ആലപ്പുഴ നോർത്ത് പൊലീസ് സ്‌റ്റേഷനിലും പരാതി രജിസ്റ്റർ ചെയ്തു. തെരഞ്ഞെടുപ്പ് പ്രചാരണം ശക്തമാകുന്നതിനിടെയാണ് സൈബർ ഇടങ്ങളിലെ പോര് പുതിയ തലത്തിലേക്ക് കടക്കുന്നത്.

ഡിജിറ്റൽ മാർഗങ്ങളിലൂടെ എഡിറ്റ് ചെയ്ത ചിത്രം ചാനൽ പ്രചരിപ്പിച്ചു 

പണം കൈപ്പറ്റുന്നുവെന്ന് തോന്നിപ്പിക്കും വിധം ഡിജിറ്റൽ മാർഗങ്ങളിലൂടെ എഡിറ്റ് ചെയ്ത ചിത്രം ചാനൽ പ്രചരിപ്പിച്ചെന്നും ചിത്രത്തിന് മുകളിൽ പച്ച നിറത്തിലുള്ള വട്ടം ബോധപൂർവം ചേർത്തുവെന്നും പരാതികളിൽ ചൂണ്ടിക്കാട്ടുന്നു. വരാനിരിക്കുന്ന നിയമസഭാ തെരഞ്ഞെടുപ്പ് ലക്ഷ്യമാക്കി പൊതുജനങ്ങൾക്കിടയിൽ അദ്ദേഹത്തിൻ്റെ പ്രതിച്ഛായ തകർക്കാനും വോട്ടർമാരെ തെറ്റിദ്ധരിപ്പിക്കാനുമുള്ള ആസൂത്രിത ശ്രമമാണിതെന്ന് കോൺഗ്രസ് ആരോപിച്ചു. തെരഞ്ഞെടുപ്പ് അടുത്തിരിക്കുന്ന സമയത്ത് രാഷ്ട്രീയ എതിരാളികളെ ഇകഴ്ത്തിക്കാണിക്കാൻ സൈബർ ഇടങ്ങളിൽ നടക്കുന്ന ഇത്തരം നീക്കങ്ങൾക്കെതിരെ കർശന നടപടി വേണമെന്നാണ് കോൺഗ്രസ് നേതൃത്വത്തിൻ്റെ ആവശ്യം. എക്സ്, വാട്സാപ്പ്, ഫേസ്ബുക്ക് തുടങ്ങിയ സമൂഹമാധ്യമങ്ങളിലൂടെ ഈ വ്യാജ ചിത്രം മനഃപൂർവം വ്യാപകമായി പ്രചരിപ്പിക്കുന്നുണ്ടെന്നും പരാതിയിലുണ്ട്.

മാതൃകാ പെരുമാറ്റച്ചട്ട ലംഘനം ചൂണ്ടിക്കാട്ടിയ അഭിഷേക് സിങ്‌വി കമ്മിഷൻ്റെ അടിയന്തര ഇടപെടൽ തേടി. സംഭവത്തിൽ വേഗത്തിൽ അന്വേഷണം ആരംഭിക്കണമെന്നും എല്ലാ സമൂഹമാധ്യമങ്ങളിൽനിന്നും ചാനലിൽനിന്നും ഈ ചിത്രം അടിയന്തരമായി നീക്കം ചെയ്യാൻ നിർദേശിക്കണമെന്നും അദ്ദേഹം ആവശ്യപ്പെട്ടു. തെരഞ്ഞെടുപ്പ് സുതാര്യതയെ ബാധിക്കുന്ന ഇത്തരം വിഷയങ്ങളിൽ കമ്മിഷൻ ശക്തമായ നടപടി സ്വീകരിക്കുമെന്നാണ് പ്രതീക്ഷയെന്നും കോൺഗ്രസ് നേതൃത്വം വ്യക്തമാക്കി. സൈബർ ഇടങ്ങളിലെ ഇത്തരം അപവാദ പ്രചാരണങ്ങൾക്കെതിരെ വരുംദിവസങ്ങളിലും ശക്തമായ നിയമനടപടികളുമായി മുന്നോട്ടുപോകാനാണ് പാർട്ടിയുടെ തീരുമാനം.