പരിഹാരം കാണുമെന്ന് മന്ത്രി ഉറപ്പുനൽകി :മുംബൈയിലെ 'കബുതർഖാന'കൾ അടച്ചുപൂട്ടുന്നതിനെതിരെ ജൈന സന്യാസി ആരംഭിച്ച നിരാഹാര സമരം അവസാനിപ്പിച്ചു

 മുംബൈ: നഗരത്തിലു ടനീളമുള്ള കബുതർഖാനകൾ (പ്രാവുകൾക്ക് തീറ്റ നൽകുന്ന കേന്ദ്രങ്ങൾ) അടച്ചുപൂട്ടുന്നതിനെതിരെ  ജൈന സമുദായം നടത്തുന്ന പ്രതിഷേധത്തിന്റെ മുൻനിരയിൽ നിന്നിരുന്ന സന്യാസി നിലേഷ് ചന്ദ്ര വിജയ്   ആസാദ് മൈതാനിയിൽ  ആരംഭിച്ച അനിശ്ചിതകാല നിരാഹാര സമരം പിൻവലിച്ചു. കാബിനറ്റ് മന്ത്രി മംഗൾ പ്രഭാത് ലോധയും പ്രാദേശിക എംഎൽഎയുംമഹാരാഷ്ട്ര നിയമസഭാ സ്പീക്കറുമായ രാഹുൽ നർവേക്കറും പ്രതിഷേധ സ്ഥലത്തെത്തി 15 ദിവസത്തിനുള്ളിൽ സമുദായത്തിന്റെ ആവശ്യങ്ങൾക്ക് പരിഹാരം കാണുമെന്ന് വാഗ്ദാനം ചെയ്തതിനെത്തുടർന്ന് ഉച്ചകഴിഞ്ഞ് അദ്ദേഹം നിരാഹാര സമരം അവസാനിപ്പിക്കുകയായിരുന്നു .കഴിഞ്ഞ ആഴ്ച, മുംബൈയിൽ നിയന്ത്രിത സമയത്തിൽ  പ്രാവുകൾക്ക് തീറ്റ നൽകുന്നതിനായി ബിഎംസി താൽക്കാലികമായി നാല് സ്ഥലങ്ങൾ പ്രഖ്യാപിച്ചിരുന്നു. ഇതിനെത്തുടർന്ന് പക്ഷികൾക്ക് ഭക്ഷണത്തിനായി 9 കിലോമീറ്റർ പറക്കാൻ കഴിയില്ലെന്നും പുതിയ സ്ഥലങ്ങൾ നിലവിലുള്ള കബൂതർഖാനകളിൽ നിന്ന് 2 കിലോമീറ്ററിനുള്ളിൽ ആയിരിക്കണമെന്നും ആവശ്യപ്പെട്ട്  നിരവധി പ്രാവ് സ്നേഹികൾ എതിർപ്പ് ഉന്നയിച്ചു.

മുംബൈയിലുടനീളം പക്ഷി തീറ്റ മേഖലകൾ സൃഷ്ടിക്കുക, ഹൈപ്പർസെൻസിറ്റിവിറ്റി ന്യൂമോണൈറ്റിസിന്റെ 60-65% കാരണവും  പ്രാവുകളുടെ കാഷ്ഠം മൂലമാണെന്ന് അവകാശപ്പെടുന്ന തെറ്റിദ്ധരിപ്പിക്കുന്ന പൊതുജന ബോർഡുകൾ പിൻവലിക്കുക, ആധികാരിക ശാസ്ത്രീയ തെളിവുകൾ ഉപയോഗിച്ച് സ്ഥിരീകരിക്കുന്നതുവരെ; എല്ലാ ജീവജാലങ്ങളുടെയും ജീവിക്കാനുള്ള മൗലികാവകാശം അംഗീകരിക്കുക, എല്ലാ ജീവജാലങ്ങളുടെയും മാനുഷികവും നിയമപരവുമായ സംരക്ഷണം ഏകോപിപ്പിക്കുന്നതിന് മത സംഘടനകളുടെയും മൃഗക്ഷേമ ഗ്രൂപ്പുകളുടെയും പരിസ്ഥിതി വിദഗ്ധരുടെയും പ്രതിനിധികൾ ഉൾപ്പെടുന്ന ഒരു സ്ഥിരം  കമ്മിറ്റി സ്ഥാപിക്കുക എന്നിവയാണ് ജൈന സന്യാസി  സമരത്തിൽ ഉന്നയിച്ച  പ്രധാന ആവശ്യങ്ങൾ.ബിഎംസി തിരഞ്ഞെടുപ്പിന് മുന്നോടിയായി, മുനി നിലേഷ് ചന്ദ്ര വിജയ് 'രാഷ്ട്രീയ സനാതൻ ചട്ടീസ് കൗം സേന' എന്ന പേരിൽ ഒരു സംഘടന രൂപീകരിച്ച്‌   തന്റെ സ്ഥാനാർത്ഥികളെ നിർത്തുമെന്നു പ്രഖ്യാപിച്ചിരുന്നു  നിയന്ത്രിത പ്രാവുകൾക്ക് തീറ്റ നൽകുന്നത് സംബന്ധിച്ച തീരുമാനമെടുക്കൽ വൈകിയതിൽ ബിജെപി നേതൃത്വത്തോടുള്ള തന്റെ നിരാശ അദ്ദേഹം പ്രകടിപ്പിച്ചിരുന്നു. വരാനിരിക്കുന്ന ബിഎംസി തിരഞ്ഞെടുപ്പുകളിൽ ഉദ്ധവ് താക്കറെയുടെ നേതൃത്വത്തിലുള്ള ശിവസേനയ്ക്ക്  അദ്ദേഹം പിന്തുണയും  പ്രഖ്യാപിച്ചിരുന്നു.

"മുഖ്യമന്ത്രിയുമായി സംസാരിച്ച് ചില പരിഹാരങ്ങൾ കണ്ടെത്തും. അതേസമയം, നാല് സ്ഥലങ്ങളിൽ നിയന്ത്രിത പ്രാവുകൾക്ക് തീറ്റ നൽകാൻ ബിഎംസി അനുമതി നൽകിയിട്ടുണ്ട്. കബൂതർഖാന (ദാദർ) തുറക്കുന്നതിനെക്കുറിച്ച് പ്രദേശത്തെ മലിനീകരണതോതും മറ്റ് ഘടകങ്ങളും പരിശോധിച്ചതിന് ശേഷം തീരുമാനമെടുക്കും,"  നർവേക്കർ പറഞ്ഞു.കഴിഞ്ഞ ജൂലൈ 3 ന്, പ്രാവിന്റെ കാഷ്ഠവും തൂവലുകളും ആരോഗ്യത്തിന് ഹാനികരമാണെന്ന് ചൂണ്ടിക്കാട്ടി  പ്രാവിന് തീറ്റകൊടുക്കുന്ന മുംബൈയിലെ 51 കബൂതർഖാനകളും ബിഎംസി അടച്ചുപൂട്ടിയിരുന്നു . തുടർന്ന് ദാദർ കബൂതർഖാന ട്രസ്റ്റും മറ്റ് രണ്ട് പേരും ബിഎംസിയുടെ തീരുമാനത്തിനെതിരെ ബോംബെ ഹൈക്കോടതിയിൽ ഹർജി ഫയൽ ചെയ്യുകയും കോടതി ഒരു വിദഗ്ദ്ധ സമിതി രൂപീകരിക്കാൻ ഉത്തരവിടുകയും ചെയ്തു. അടുത്ത വാദം കേൾക്കൽ ഡിസംബർ 11 ന് നടക്കും. അതുവരെ, മുംബൈയിലെ 51 കബൂതർഖാനകൾ അടച്ചിടൽ തുടരും   നാല് ഇടക്കാല സ്ഥലങ്ങളിൽ രാവിലെ 7 മുതൽ 9 വരെ  തീറ്റകൊടുക്കാൻ സമയം അനുവദിച്ചിട്ടുണ്ട്."നിയമസഭാ സ്പീക്കർ രാഹുൽ നർവേക്കർ ഈ ആഴ്ച മുഖ്യമന്ത്രി ദേവേന്ദ്ര ഫഡ്‌നാവിസുമായി കൂടിക്കാഴ്ച നടത്തുമെന്നും പ്രാവുകളെ തീറ്റുന്നതിന് സ്ഥിരമായ ഒരു പരിഹാരം കണ്ടെത്തുമെന്ന് വാഗ്ദാനം ചെയ്തിട്ടുണ്ടെന്നും മുനി നിലേഷ് ചന്ദ്ര വിജയ് മാധ്യമങ്ങളോട്  പറഞ്ഞു. ഞങ്ങളുടെ പോരാട്ടം പ്രാവുകൾക്ക് മാത്രമായി ഒതുങ്ങുന്നില്ല, മറിച്ച് എല്ലാ ശബ്ദമില്ലാത്ത മൃഗങ്ങൾക്കും വേണ്ടിയാണ്. നേതാക്കൾ ഞങ്ങളുടെ ആവശ്യങ്ങൾ ഗൗരവമായി എടുത്തതിൽ ഞാൻ നന്ദിയുള്ളവനാണ്." അദ്ദേഹം പറഞ്ഞു.