ഇന്ന് വൈകിട്ട് 6 മുതല് ഏപ്രിൽ 9ന് വൈകിട്ട് ആറുവരെ കേരളത്തിലെ മദ്യ ശാലകള് തുറക്കില്ല
തിരുവനന്തപുരം: കേരളത്തിൽ ഏപ്രില് 9ന് നടക്കുന്ന വോട്ടെടുപ്പുമായി ബന്ധപ്പെട്ട് ഇന്ന് വൈകിട്ട് 6 മുതല് 9ന് വൈകിട്ട് ആറുവരെ മദ്യ ശാലകള് തുറക്കില്ല. വിദേശമദ്യ ചില്ലറ വില്പ്പനശാലകളും ബാറുകളും കള്ളുഷാപ്പുകളും പ്രവര്ത്തിക്കില്ല. 48 മണിക്കൂര് ഡ്രൈഡേയാണ് പ്രഖ്യാപിച്ചിട്ടുള്ളത്.പ്രഖ്യാപനം വരുന്നതിനുമുന്നെ തന്നെ സംസ്ഥാനത്തെ മദ്യ വിൽപ്പനശാലകളിൽ വൻതിരക്കാണ് ദൃശ്യമായിട്ടുള്ളത്. പല സ്ഥലങ്ങളിലും പൊരിവെയിലത്ത് നിൽക്കുന്നവരുടെ നീണ്ട നിരയാണ്.
ഇന്ന് വൈകിട്ട് ആറിന് തെരഞ്ഞെടുപ്പ് പ്രചാരണം അവസാനിക്കും. മണ്ഡലത്തിലെ വോട്ടര്മാരല്ലാത്ത പുറത്തു നിന്നുള്ള രാഷ്ട്രീയ പ്രവര്ത്തകരും പാര്ട്ടി ഭാരവാഹികളും പ്രചാരണ സമയം അവസാനിച്ചാലുടന് മണ്ഡലം വിട്ടു പോകണമെന്ന് മുഖ്യ തെരഞ്ഞെടുപ്പ് ഓഫീസര് ഡോ. രത്തന് യു ഖേല്ക്കര് അറിയിച്ചു.വോട്ടെടുപ്പ് അവസാനിക്കുന്നതിന് നിശ്ചയിച്ചിട്ടുള്ള സമയത്തിന് 48 മണിക്കൂര് മുമ്പ് പൊതുയോഗങ്ങള് സംഘടിപ്പിക്കാനോ പങ്കെടുക്കാനോ പാടില്ല. ജാഥകള്, ഘോഷയാത്രകള്, സംഗീത പരിപാടികള്, നാടകങ്ങള് , വോട്ടര്മാരെ ആകര്ഷിക്കുന്ന തരത്തിലുള്ള മറ്റ് വിനോദ പരിപാടികള് എന്നിവയ്ക്കും നിരോധനമുണ്ട്. ടെലിവിഷന്, സിനിമ , റേഡിയോ , സമാന മാദ്ധ്യമങ്ങള് വഴി തെരഞ്ഞെടുപ്പ് സംബന്ധമായ കാര്യങ്ങള് പ്രദര്ശിപ്പിക്കുന്നത് നിരോധിച്ചു. വോട്ടെടുപ്പ് ദിവസവും അതിന്റെ തലേ ദിവസവും പത്രങ്ങളില് രാഷ്ട്രീയ പരസ്യങ്ങള് പ്രസിദ്ധീകരിക്കുന്നതിന് മീഡിയ സര്ട്ടിഫിക്കേഷന് ആന്ഡ് മോണിറ്ററിങ് കമ്മിറ്റിയുടെ മുന്കൂര് അനുമതി ആവശ്യമാണ്.
കേരളത്തിൽ താപനില കൂടുന്നു
കേരളത്തിൽ വീണ്ടും ഉയർന്ന താപനില മുന്നറിയിപ്പ്. ഇന്നുമുതൽ തെരഞ്ഞെടുപ്പ് ദിവസമായ വ്യാഴാഴ്ച വരെ എട്ടു ജില്ലകളിലാണ് കേന്ദ്ര കാലാവസ്ഥ വകുപ്പ് മുന്നറിയിപ്പ് നൽകിയത്. ജാഗ്രതയുടെ ഭാഗമായി ഈ ജില്ലകളിൽ യെല്ലോ അലർട്ട് പ്രഖ്യാപിച്ചു.വ്യാഴാഴ്ച വരെ പാലക്കാട് ജില്ലയിൽ ഉയർന്ന താപനില 38 °C വരെയും കൊല്ലം, കോട്ടയം, തൃശൂർ ജില്ലകളിൽ 37°C വരെയും രേഖപ്പെടുത്തുമെന്നാണ് കാലാവസ്ഥ വകുപ്പിന്റെ പ്രവചനം. തിരുവനന്തപുരം,പത്തനംതിട്ട, ആലപ്പുഴ, എറണാകുളം ജില്ലകളിൽ ഉയർന്ന താപനില 36°C വരെയും ഉയരാൻ സാധ്യതയുണ്ട്. ഈ ജില്ലകളിൽ സാധാരണയേക്കാൾ 2 മുതൽ 3 ഡിഗ്രി സെൽഷ്യസ് വരെ കൂടുതൽ ചൂട് അനുഭവപ്പെടാൻ സാധ്യതയുള്ളതിനാൽ ജാഗ്രത പാലിക്കണം.