നോയിഡ അന്താരാഷ്ട്ര വിമാനത്താവളത്തിന്റെ ആദ്യ ഘട്ടം പ്രധാനമന്ത്രി ഇന്ന് ഉദ്ഘാടനം ചെയ്തു

നോയിഡ : ഉത്തർപ്രദേശിലെ ഗൗതം ബുദ്ധ നഗർ ജില്ലയിലെ ജേവാറിൽ നോയിഡ അന്താരാഷ്ട്ര വിമാനത്താവളത്തിന്റെ ആദ്യ ഘട്ടം പ്രധാനമന്ത്രി നരേന്ദ്ര മോദി ഇന്ന് ഉദ്ഘാടനം ചെയ്തു. 40 ഏക്കറിൽ വ്യാപിച്ചുകിടക്കുന്ന മെയിന്റനൻസ്, റിപ്പയർ, ഓവർഹോൾ (എംആർഒ) സൗകര്യങ്ങളുടെ തറക്കല്ലിടലും അദ്ദേഹം നിർവഹിച്ചു.മുഖ്യമന്ത്രി യോഗി ആദിത്യനാഥ്, വ്യോമയാന മന്ത്രി കിഞ്ചരപു റാം മോഹൻ നായിഡു, മറ്റ് വിശിഷ്ട വ്യക്തികൾ എന്നിവർ പ്രധാനമന്ത്രി മോദിയോടൊപ്പം ഉണ്ടായിരുന്നു.പ്രധാനമന്ത്രിയുടെ സന്ദർശനത്തോടനുബന്ധിച്ച് വിപുലമായ സുരക്ഷാ ക്രമീകരണങ്ങൾ ഏർപ്പെടുത്തിയിരുന്നു.

വിക്‌സിത് യുപി, വിക്‌സിത് ഭാരത് കാമ്പെയ്‌നിന് ഇതൊരു പുതിയ അധ്യായമാണെന്ന് ചടങ്ങിൽ സംസാരിച്ച പ്രധാനമന്ത്രി  പറഞ്ഞു. ഇന്ത്യയിൽ ഏറ്റവും കൂടുതൽ അന്താരാഷ്ട്ര വിമാനത്താവളങ്ങളുള്ള സംസ്ഥാനങ്ങളിലൊന്നായി യുപി ഇപ്പോൾ ഉയർന്നുവന്നിട്ടുണ്ടെന്ന് അദ്ദേഹം  കൂട്ടിച്ചേർത്തു. ആഗ്ര, മഥുര, അലിഗഡ്, ഗാസിയാബാദ്, ഇറ്റാവ, ഫരീദാബാദ് എന്നിവയുൾപ്പെടെ പടിഞ്ഞാറൻ യുപിയിലെ വിവിധ ജില്ലകൾക്ക് ഈ വിമാനത്താവളം പ്രയോജനപ്പെടുമെന്നും  പടിഞ്ഞാറൻ ഉത്തർപ്രദേശിലെ കർഷകർ, ചെറുകിട, ഇടത്തരം വ്യവസായങ്ങൾ, യുവാക്കൾ എന്നിവർക്ക് ഈ വിമാനത്താവളം നിരവധി പുതിയ അവസരങ്ങൾ നൽകുമെന്നും  മോദി പറഞ്ഞു. ജെവാർ വിമാനത്താവളം ഉത്തർപ്രദേശിന്റെ പുരോഗതിയുടെയും വികസനത്തിന്റെയും പ്രതീകമായി മാറുമെന്ന് അദ്ദേഹം പ്രത്യാശ പ്രകടിപ്പിച്ചു.

"ഏതൊരു രാജ്യത്തും വിമാനത്താവളങ്ങൾ വെറും അടിസ്ഥാന സൗകര്യങ്ങൾ മാത്രമല്ല, പുരോഗതിക്ക് ചിറകുകൾ നൽകുന്നു. മേഖലയിലെ കണക്റ്റിവിറ്റി വികസിക്കുന്നതിനാൽ, പശ്ചിമ യുപിയിലെ കാർഷിക ഉൽപ്പന്നങ്ങൾ ആഗോള വിപണിയിൽ കൂടുതൽ മികച്ച രീതിയിൽ എത്തും . മെയിന്റനൻസ്, റിപ്പയർ, ഓവർഹോൾ (എംആർഒ) മേഖലയെക്കുറിച്ച് സംസാരിക്കുമ്പോൾ, ഈ മേഖലയിൽ ഇന്ത്യയെ സ്വയംപര്യാപ്തമാക്കാനും സർക്കാർ തീരുമാനിച്ചിട്ടുണ്ട് " മോദി ചൂണ്ടിക്കാട്ടി.

കഴിഞ്ഞ ഒരു മാസമായി പശ്ചിമേഷ്യയിൽ തുടരുന്ന യുദ്ധം കാരണം പല രാജ്യങ്ങളും ഭക്ഷണം, പെട്രോൾ-ഡീസൽ, ഗ്യാസ്, വളങ്ങൾ തുടങ്ങിയ അവശ്യവസ്തുക്കളുടെ ക്ഷാമം നേരിടുന്നുണ്ടെന്ന് അദ്ദേഹം പറഞ്ഞു. ഈ പ്രതിസന്ധിയെ നേരിടാൻ എല്ലാ രാജ്യങ്ങളും ശ്രമങ്ങൾ നടത്തുന്നുണ്ടെന്ന് അദ്ദേഹം ചൂണ്ടിക്കാട്ടി. പൗരന്മാരുടെ ശക്തിയിൽ ആശ്രയിച്ച് ഇന്ത്യ പൂർണ്ണ ശക്തിയോടെ ഈ പ്രതിസന്ധിയെ നേരിടുന്നുണ്ടെന്ന് പ്രധാനമന്ത്രി ഊന്നിപ്പറഞ്ഞു.യുദ്ധബാധിത മേഖലയിൽ നിന്ന് ഇന്ത്യ വൻതോതിൽ അസംസ്കൃത എണ്ണയും വാതകവും ഇറക്കുമതി ചെയ്യുന്നുണ്ടെന്നും, ഈ പ്രതിസന്ധിയുടെ ഭാരം സാധാരണ കുടുംബങ്ങളുടെയും കർഷകരുടെയും മേൽ വരാതിരിക്കാൻ സർക്കാർ സാധ്യമായ എല്ലാ നടപടികളും സ്വീകരിക്കുന്നുണ്ടെന്നും അദ്ദേഹം പറഞ്ഞു. ഈ പ്രതിസന്ധി ഘട്ടത്തിലും ഇന്ത്യ വികസനത്തിന്റെ വേഗത നിലനിർത്തുന്നുണ്ടെന്നും അദ്ദേഹം കൂട്ടിച്ചേർത്തു.

രാജ്യത്തെ ഏറ്റവും വലിയ ഗ്രീൻഫീൽഡ് വിമാനത്താവള പദ്ധതികളിൽ ഒന്നാണ് നോയിഡ അന്താരാഷ്ട്ര വിമാനത്താവളം. പൊതു-സ്വകാര്യ പങ്കാളിത്ത മാതൃകയിൽ ഏകദേശം 11,200 കോടി രൂപയുടെ മൊത്തം നിക്ഷേപത്തിലാണ് നോയിഡ അന്താരാഷ്ട്ര വിമാനത്താവളത്തിന്റെ ഒന്നാം ഘട്ടം വികസിപ്പിച്ചിരിക്കുന്നത്. തുടക്കത്തിൽ പ്രതിവർഷം 12 ദശലക്ഷം യാത്രക്കാരെ കൈകാര്യം ചെയ്യാവുന്നതും പൂർണ്ണ വികസനത്തിന് ശേഷം പ്രതിവർഷം 70 ദശലക്ഷം യാത്രക്കാരെ വരെ കൈകാര്യം ചെയ്യാവുന്നതുമായ വിമാനത്താവളമായിരിക്കും ഇത്.

https://www.worldm.news/english/prime-minister-inaugurated--24037

https://www.worldm.news/national/pm-modi-to-launch-delhi-ncrs--23964