പാചക വാതക സിലിണ്ടറുകളുടെ വില വീണ്ടും വർധിപ്പിച്ചു

എറണാകുളം : സംസ്ഥാനത്ത് വാണിജ്യ ആവശ്യങ്ങൾക്കുള്ള പാചക വാതക സിലിണ്ടറുകളുടെ വില വീണ്ടും വർധിപ്പിച്ചു. 19 കിലോഗ്രാം തൂക്കമുള്ള വാണിജ്യ സിലിണ്ടറിന് 49 രൂപയുടെ വർധനവാണ് പൊതുമേഖലാ എണ്ണക്കമ്പനികൾ വരുത്തിയിരിക്കുന്നത്. ഇതോടെ സിലിണ്ടറിന്റെ വില 1698 രൂപയിൽ നിന്ന് 1747 രൂപയായി ഉയർന്നു.

ഹോട്ടലുകൾ, റസ്റ്റോറന്റുകൾ, കാറ്ററിംഗ് സ്ഥാപനങ്ങൾ, ബേക്കറികൾ തുടങ്ങിയ വാണിജ്യ മേഖലകളെ ഈ വിലക്കയറ്റം നേരിട്ട് ബാധിക്കും. നിലവിൽ തന്നെ ഉയർന്ന പ്രവർത്തനച്ചെലവുകൾ നേരിടുന്ന ചെറുകിട ഭക്ഷ്യ സംരംഭകർക്ക് പുതിയ വർധനവ് അധിക സാമ്പത്തിക ബാധ്യതയാകും.അതേസമയം, ഗാർഹിക ആവശ്യങ്ങൾക്കുള്ള സിലിണ്ടറുകളുടെ വിലയിൽ മാറ്റമില്ലാത്തത് സാധാരണക്കാർക്ക് ആശ്വാസമായി. വാണിജ്യ സിലിണ്ടറുകളുടെ വില വർധിക്കുന്നത് ഹോട്ടൽ ഭക്ഷണ നിരക്കുകൾ ഉയരാൻ കാരണമായേക്കുമെന്ന് വ്യാപാര സംഘടനകൾ മുന്നറിയിപ്പ് നൽകുന്നുണ്ട്. അന്താരാഷ്ട്ര വിപണിയിലെ വിലനിലവാരം കണക്കിലെടുത്ത് ഓരോ മാസവും ഒന്നാം തീയതിയാണ് എണ്ണക്കമ്പനികൾ സാധാരണയായി വില പുതുക്കി നിശ്ചയിക്കാറുള്ളത്.