കഴിഞ്ഞ മൂന്ന് ലോകകപ്പ് ജേതാക്കളെ കൃത്യമായി പ്രവചിച്ച സാമ്പത്തിക വിദഗ്ധൻ 2026ൽ വിജയിക്കുന്ന ടീമിനേയും പ്രവചിച്ചു

ജർമ്മനി : ഫുട്ബോൾ ലോകകപ്പിലെ കഴിഞ്ഞ മൂന്ന് ജേതാക്കളെയും കൃത്യമായി പ്രവചിച്ച ജർമ്മൻ സാമ്പത്തിക വിദഗ്ധൻ യോക്കിം ക്ലെമെന്റ് 2026 ലോകകപ്പിന്റെ ജേതാവിനെക്കുറിച്ചുള്ള തന്റെ പുതിയ പ്രവചനവുമായി രംഗത്തെത്തിയിരിക്കുകയാണ് . ഇത്തവണ കിരീടം നേടുക നെതർലൻഡ്സായിരിക്കുമെന്നാണ് അദ്ദേഹത്തിന്റെ വിലയിരുത്തൽ. 2014ൽ ജർമ്മനിയും, 2018ൽ ഫ്രാൻസും, 2022ൽ അർജന്റീനയും ലോകകപ്പ് നേടുമെന്ന് കൃത്യമായി പ്രവചിച്ച ക്ലെമെന്റിൻ്റെ പുതിയ പ്രവചനവും ശ്രദ്ധ നേടുകയാണ്. ജനസംഖ്യ, ഫിഫ റാങ്കിങ്, ടീമിൻ്റെ പ്രകടന സൂചികകൾ തുടങ്ങിയ വിവരങ്ങൾ അടിസ്ഥാനമാക്കിയുള്ള ഗണിത മാതൃകയാണ് അദ്ദേഹം ഉപയോഗിക്കുന്നത്. ആദ്യമായി 2014 ലോകകപ്പിന് മുമ്പ് ഈ മാതൃക പരീക്ഷിച്ചപ്പോൾ ജർമ്മനി കിരീടം നേടുമെന്ന് ഫലം വന്നത് തന്നെ അത്ഭുതപ്പെടുത്തിയിരുന്നുവെന്ന് ക്ലെമെന്റ് പറഞ്ഞു. ദക്ഷിണ അമേരിക്കയിൽ യൂറോപ്യൻ ടീമുകൾ ലോകകപ്പ് നേടിയിട്ടില്ലെന്നായിരുന്നു അന്നത്തെ പൊതുവായ വിലയിരുത്തൽ.

ഡോയ്ച്ചെ വെല്ലെയ്ക്ക് നൽകിയ അഭിമുഖത്തിൽ, തനിക്ക്  ഭാഗികമായി മാത്രമേ മത്സരഫലങ്ങൾ വിശദീകരിക്കാൻ കഴിയൂവെന്നും ബാക്കി കാര്യങ്ങൾ ഭാഗ്യത്തിൻ്റെയും അപ്രതീക്ഷിത സാഹചര്യങ്ങളുടെയും ഭാഗമാണെന്നും അദ്ദേഹം പറഞ്ഞു. “ഞാൻ പ്രവചനത്തിൽ തെറ്റിപ്പോകാനാണ് ആദ്യം ശ്രമിച്ചത്. എന്നാൽ തുടർച്ചയായി മൂന്ന് തവണ ശരിയായത് കൊണ്ട് ഞാൻ ലോകത്തിലെ ഏറ്റവും ഭാഗ്യവാനായ സാമ്പത്തിക വിദഗ്ധനാകാം,” അദ്ദേഹം തമാശയായി പറഞ്ഞു.

2026 ലോകകപ്പിൽ ആരാണ് കിരീടം നേടുക എന്ന ചോദ്യത്തിന് മറുപടിയായി ക്ലെമെന്റ് പറഞ്ഞത്: “ഒരു ജർമ്മൻ എന്ന നിലയിൽ ഇത് പറയുന്നത് എനിക്ക് വിഷമമുണ്ട്. പക്ഷേ ഈ തവണ ലോകകപ്പ് നേടുക നെതർലൻഡ്സായിരിക്കുമെന്നാണ് എന്റെ പ്രവചനം.” ഇതുവരെ ലോകകപ്പ് കിരീടം നേടാത്ത നെതർലൻഡ്സ് ഫൈനലിൽ മൂന്ന് തവണ എത്തിയിട്ടുണ്ടെങ്കിലും കിരീടം സ്വന്തമാക്കാൻ കഴിഞ്ഞിട്ടില്ല. അതിനാൽ ക്ലെമെന്റിന്റെ പ്രവചനം ശരിയാകുമോ എന്ന ആകാംക്ഷയിലാണ് ഫുട്ബോൾ ആരാധകർ. 2026 ലോകകപ്പ് ആരംഭിച്ച സാഹചര്യത്തിൽ, അദ്ദേഹത്തിന്റെ ഗണിത മാതൃക വീണ്ടും വിജയിക്കുമോയെന്നതാണ് ഇപ്പോൾ കായിക ലോകത്തെ പ്രധാന ചർച്ചാവിഷയം.