ഗുജറാത്തിനെ തകർത്ത് ആർസിബി വീണ്ടും ഐപിഎൽ ഫൈനലിൽ

ധരംശാല: മനോഹരമായ എച്ച്‌പിസിഎ സ്റ്റേഡിയത്തിൽ വീണ്ടുമൊരു ചരിത്രം കുറിച്ച് നിലവിലെ ചാമ്പ്യന്മാരായ റോയൽ ചലഞ്ചേഴ്‌സ് ബെംഗളൂരു ഐപിഎല്‍ ഗ്രാൻഡ് ഫൈനലിലേക്ക് ആധികാരികമായി യോഗ്യത നേടിയിരിക്കുന്നു. ക്വാളിഫയർ 1 പോരാട്ടത്തിൽ കരുത്തരായ ഗുജറാത്ത് ടൈറ്റൻസിനെ 92 റൺസിന് അക്ഷരാർത്ഥത്തിൽ നിഷ്പ്രഭമാക്കിക്കൊണ്ടാണ് രജത് പടിദാറിൻ്റെ നേതൃത്വത്തിലുള്ള റെഡ് ആർമി തങ്ങളുടെ അഞ്ചാം ഐപിഎൽ ഫൈനൽ ടിക്കറ്റ് ഉറപ്പിച്ചത്.

പടിദാറിൻ്റെ 'രുദ്രതാണ്ഡവം'

ടോസ് നഷ്‌ടപ്പെട്ട് ആദ്യം ബാറ്റിംഗിനിറങ്ങിയ ആർസിബിക്ക് വേണ്ടി ക്യാപ്റ്റൻ രജത് പടിദാർ നടത്തിയ ബാറ്റിംഗ് പ്രകടനം ധർമ്മശാലയെ ആവേശം കൊള്ളിച്ചു. വെറും 33 പന്തുകളിൽ നിന്ന് 9 സിക്‌സറുകളുടെയും 5 ഫോറുകളുടെയും അകമ്പടിയോടെ 93* റൺസ് അടിച്ചുകൂട്ടിയ പടിദാറിൻ്റെ തകർപ്പൻ ഇന്നിംഗ്‌സാണ് ആർസിബിയെ 20 ഓവറിൽ 254/5 എന്ന കൂറ്റൻ സ്കോറിലേക്ക് നയിച്ചത്.

ക്ലാസിക് ശൈലിയിൽ 43 റൺസ് നേടിയ വിരാട് കോഹ്‌ലിയും അവസരോചിതം ബാറ്റ് വീശിയ കൃണാൽ പാണ്ഡ്യയും (43) പടിദാറിന് മികച്ച ന്തുണ നൽകി. ഐപിഎൽ പ്ലേഓഫ് ചരിത്രത്തിലെ തന്നെ ഏറ്റവും ഉയർന്ന ടീം സ്കോറുകളിലൊന്നാണ് ബെംഗളൂരു ഇന്നലെ കുറിച്ചത്.

ബൗളിംഗ് കോട്ടയിൽ തകർന്നു വീണ് ടൈറ്റൻസ്

255 റൺസ് എന്ന ഹിമാലയൻ ലക്ഷ്യം പിന്തുടർന്നിറങ്ങിയ ഗുജറാത്ത് ടൈറ്റൻസിന് തുടക്കം മുതലേ പിഴച്ചു. ആദ്യ ഓവറുകളിൽ തന്നെ അവരുടെ മുൻനിര ബാറ്റർമാരെ ആർസിബി ബൗളർമാർ പവലിയനിലേക്ക് മടക്കി. രാഹുൽ തേവാതിയ (68) ഒറ്റയാൾ പോരാട്ടം നടത്തിയെങ്കിലും മറ്റ് ബാറ്റർമാർക്കൊന്നും ബെംഗളൂരുവിൻ്റെ കണിശമായ പന്തേറിന് മുന്നിൽ പിടിച്ചുനിൽക്കാനായില്ല. ആർസിബിക്ക് വേണ്ടി ജേക്കബ് ഡഫി 3 വിക്കറ്റും, ഭുവനേശ്വർ കുമാർ, രസിഖ് സലാം, കൃണാൽ പാണ്ഡ്യ എന്നിവർ രണ്ട് വിക്കറ്റ് വീതവും വീഴ്ത്തി ഗുജറാത്തിൻ്റെ ഇന്നിംഗ്‌സ് 19.3 ഓവറിൽ 162 റൺസിൽ അവസാനിപ്പിച്ചു.

കഴിഞ്ഞ സീസണിൽ (2025) തങ്ങളുടെ കന്നി കിരീടം നേടിയ ആർസിബി, നിലവിലെ ചാമ്പ്യന്മാരുടെ എല്ലാ ഗാംഭീര്യത്തോടും കൂടിയാണ് ഇത്തവണ കളിക്കുന്നത്. ലീഗ് ഘട്ടത്തിൽ 18 പോയിൻ്റോടെ ഒന്നാം സ്ഥാനക്കാരായി പ്ലേഓഫിൽ എത്തിയ അവർ ഫൈനലിലേക്കും ആദ്യമേ തന്നെ സീറ്റ് ഉറപ്പിച്ചു കഴിഞ്ഞു. മെയ് 31-ന് അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ വെച്ചാണ് ആർസിബിയുടെ ഫൈനൽ പോരാട്ടം.

സൺറൈസേഴ്‌സ് ഹൈദരാബാദും രാജസ്ഥാൻ റോയൽസും തമ്മിലുള്ള എലിമിനേറ്റർ മത്സരത്തിലെ വിജയികൾ ക്വാളിഫയർ 2-ൽ ഗുജറാത്തിനെ നേരിടും. അതിലെ വിജയികളാകും ഫൈനലിൽ ആർസിബിയുടെ എതിരാളികൾ. തുടർച്ചയായ രണ്ടാം ഐപിഎൽ കിരീടം എന്ന ചരിത്ര നേട്ടത്തിലേക്ക് ഇനി ബെഗളൂരുവിന് ഒരൊറ്റ വിജയത്തിൻ്റെ അകലം മാത്രമാണുള്ളത്.