കപ്പൽ ജീവനക്കാരൻ്റെ മൃതദേഹത്തിൽ നിന്ന് ആന്തരികാവയവങ്ങൾ കാണാനില്ല!:പോസ്റ്റ്മോർട്ടം റിപ്പോർട്ടിൽ അന്യേഷണം ആവശ്യപ്പെട്ട് കുടുംബം
മുംബൈ: പ്രധാനപ്പെട്ട ആന്തരിക അവയവങ്ങൾ നഷ്ട്ടപ്പെട്ട നിലയിൽ നാവികനായ ഇന്ത്യക്കാരൻ്റെ മൃതദ്ദേഹം നാട്ടിലെത്തിച്ചതിൽ ദുരൂഹത . വെനസ്വേലയിൽ വെച്ച് മരിച്ച രാകേഷ് ചൗഹാൻ്റെ മൃതദേഹമാണ് ഇന്ത്യയിലെത്തിയപ്പോൾ ആന്തരികാവയവങ്ങൾ നഷ്ടപ്പെട്ട നിലയിൽ കണ്ടെത്തിയത് .കപ്പലിൽ വെച്ച് വീണു പരിക്കേറ്റുവെന്നും ചികിത്സയിലാണെന്നും ആദ്യം അറിയിച്ച കമ്പനി, പിന്നീട് മരണവാർത്ത സ്ഥിരീകരിക്കുകയായിരുന്നു. മൃതദേഹം ഒരാഴ്ചയ്ക്കകം നാട്ടിലെത്തിക്കുമെന്ന് ഉറപ്പുനൽകിയിരുന്നെങ്കിലും ഒരു മാസത്തിന് ശേഷമാണ് മൃതദേഹം ദിയോറിയയിൽ എത്തിച്ചത്.
33 കാരനായ രാകേഷ് ചൗഹാൻ ഭാര്യ, ആറ് മാസം പ്രായമുള്ള മകൻ, അച്ഛൻ, സഹോദരൻ എന്നിവർക്കൊപ്പം മുംബൈയിലാണ് താമസിച്ചിരുന്നത്. ഉത്തർപ്രദേശിലെ ദിയോറിയ യാണ് സ്വദേശം . 2025 നവംബറിൽ മർച്ചന്റ് നേവിയിൽ ചേർന്ന അദ്ദേഹം വെനിസ്വേലയിൽ മറൈൻ ഫിറ്ററായി ജോലി ചെയ്തുവരികയായിരുന്നു . മെയ് 7 ന്, പിതാവ് രാംദേവ് ചൗഹാന് മകൻ ജോലി ചെയ്തിരുന്ന കമ്പനിയിൽ നിന്ന് രാകേഷ് കപ്പലിൽ വീണു പരിക്കേറ്റതായി അറിയിച്ചു. പിറ്റേന്ന്, അദ്ദേഹത്തിന്റെ നില ഗുരുതരമാണെന്നും അതിജീവിക്കാൻ 5% സാധ്യത മാത്രമേയുള്ളൂവെന്നും കുടുംബത്തോട് പറഞ്ഞു. അന്ന് വൈകുന്നേരം, രാകേഷ് മരിച്ചതായി കമ്പനി കുടുംബത്തെ അറിയിച്ചു. തലകറക്കം മൂലം അദ്ദേഹം വീണുവെന്നും ഗുരുതരമായി പരിക്കേറ്റുവെന്നും ചികിത്സയ്ക്കിടെ മരണമടഞ്ഞുവെന്നുമായിരുന്നു കമ്പനി അറിയിച്ചിരുന്നത്.
മൃതദേഹം ഒരു ആഴ്ചയ്ക്കകം നാട്ടിലെത്തിക്കുമെന്ന് ഉറപ്പ് നൽകിയിരുന്നെങ്കിലും, ഒരു മാസത്തിന് ശേഷമാണ് അത് ദേവരിയയിൽ എത്തിയത്.ദേവരിയയിൽ വെച്ച് നടത്തിയ പോസ്റ്റുമോർട്ടത്തിൽ മൃതദേഹത്തിൽ അസാധാരണമായ തുന്നലുകൾ കണ്ടെത്തി. കഴുത്ത് മുതൽ അടിവയർ വരെ 22 തുന്നലുകളും തലയിൽ 20 തുന്നലുകളും ഉണ്ടായിരുന്നു. തുടർന്ന് നടത്തിയ പരിശോധനയിൽ മസ്തിഷ്കം, തൈറോയ്ഡ്, ഹൃദയം, ശ്വാസകോശം, ആമാശയം, പിത്താശയം, വൃക്കകൾ തുടങ്ങിയവയെല്ലാം ശരീരത്തിൽ നിന്ന് നീക്കം ചെയ്തതായി വ്യക്തമായി. വെനിസ്വേലൻ അധികൃതരോ കപ്പൽ കമ്പനിയോ മരണത്തെക്കുറിച്ച് കൃത്യമായ മെഡിക്കൽ റിപ്പോർട്ടോ വിശദീകരണമോ ഇതുവരെ നൽകിയിട്ടില്ല. സാധാരണഗതിയിൽ ആദ്യ പോസ്റ്റുമോർട്ടത്തിൽ പരിശോധനയ്ക്കായി ചില അവയവങ്ങൾ നീക്കം ചെയ്യാറുണ്ടെങ്കിലും, എല്ലാ ആന്തരികാവയവങ്ങളും ഇല്ലാത്തത് വലിയ അസ്വാഭാവികതയാണ് ചൂണ്ടിക്കാട്ടുന്നത്. സംഭവത്തിൽ സമഗ്ര അന്യേഷണം വേണമെന്ന് ഫെഡറേഷൻ ഓഫ് സീഫറേഴ്സ് യൂണിയൻസ് ഓഫ് ഇന്ത്യ (FSU)ആവശ്യപ്പെട്ടു.
"കുടുംബത്തെ അറിയിക്കാതെയോ അവരുടെ സമ്മതം തേടാതെയോ അദ്ദേഹത്തിന്റെ ശരീരത്തിൽ നിന്ന് സുപ്രധാന അവയവങ്ങൾ നീക്കം ചെയ്തത് എന്തുകൊണ്ട്? മൃതദേഹത്തിന്റെ രസീത് വ്യാജമായിരുന്നു - 'രഞ്ജന ചൗരസ്യ' (ഭാര്യയുടെ പേരിൽ) എന്നതിന് പകരം 'അഞ്ജന ചൗരസ്യ' എന്ന പേരിൽ ഒപ്പിട്ടതാണ്. തൊഴിൽ കരാറിൽ പരാമർശിച്ചിരിക്കുന്ന കപ്പലിന്റെ പേര് അദ്ദേഹത്തെ യഥാർത്ഥത്തിൽ നിയമിച്ച കപ്പലുമായി പൊരുത്തപ്പെടുന്നില്ല. ഈ പൊരുത്തക്കേടുകൾ ഗുരുതരമായ സംശയങ്ങളും മറച്ചുവെക്കലിനുള്ള സാധ്യതയും ഉയർത്തുന്നു. എന്താണ് മറച്ചുവെക്കുന്നത്? " സംഘടന വെനിസ്വേലയിലെ ഇന്ത്യൻ എംബസിയോട് അടിയന്തിരമായി ഇടപെടണം എന്നാവശ്യപ്പെട്ടുകൊണ്ട് അയച്ച നിവേദനത്തിൽ ഈ ചോദ്യങ്ങൾ ഉന്നയിച്ചിട്ടുണ്ട് .