കീം പ്രവേശന പരീക്ഷാഫലം : ഒന്നാം റാങ്ക് റോഷൻ രാജുവിന്

തിരുവനന്തപുരം: കേരള എഞ്ചിനീയറിങ് ആർക്കിടെക്ചർ മെഡിക്കൽ (KEAM) പ്രവേശന പരീക്ഷാഫലം ഔദ്യോഗികമായി പ്രസിദ്ധീകരിച്ചു. എഞ്ചിനീയറിങ് വിഭാഗത്തിൽ അങ്കമാലി സ്വദേശി റോഷൻ രാജു ഒന്നാം റാങ്കും, കണ്ണൂർ സ്വദേശി ധ്യാൻ തേജ് രണ്ടാം റാങ്കും കരസ്ഥമാക്കി . ഫാർമസി റാങ്ക് പട്ടികയിൽ തൃശൂർ സ്വദേശികളായ വിനായകൻ നാരായണൻ ഒന്നാം റാങ്കും ജെസ്സി ജസ്റ്റിൻ രണ്ടാം റാങ്കും നേടി.എഞ്ചിനീയറിങ് റാങ്ക് പട്ടികയിൽ 79,717 വിദ്യാർഥികളാണ് ഇടംനേടിയത്. ആകെ 96,750 പേർ പരീക്ഷയ്ക്ക് ഹാജരായതിൽ 79,717 പേർ യോഗ്യത നേടി. ഫാർമസി പട്ടികയിൽ 26,943 പേരും ഉൾപ്പെട്ടിട്ടുണ്ട്. സിബിഎസ്ഇ പുനർമൂല്യനിർണ്ണയ ഫലം വൈകിയതിനെത്തുടർന്നാണ് കീം ഫലപ്രഖ്യാപനം അല്പം വൈകിയതെന്ന് ഉന്നതവിദ്യാഭ്യാസ മന്ത്രി റോജി എം. ജോൺ അറിയിച്ചു. സിബിഎസ്ഇ വിദ്യാർഥികൾക്ക് മാർക്ക് ലിസ്റ്റ് സമർപ്പിക്കാൻ രണ്ട് തവണ അധിക സമയം അനുവദിച്ചിരുന്നു.കേരളത്തിന് പുറത്തും വിദേശത്തുമായി സജ്ജീകരിച്ച 192 പരീക്ഷാ കേന്ദ്രങ്ങളിലായി 95,016 വിദ്യാർഥികളാണ് സംസ്ഥാനത്ത് മാത്രം പരീക്ഷ എഴുതിയത്. പരാതികളില്ലാതെ സുതാര്യമായും സമയബന്ധിതമായും പരീക്ഷ നടത്തിപ്പും മൂല്യനിർണ്ണയവും പൂർത്തിയാക്കാൻ സാധിച്ചുവെന്ന് മന്ത്രി വ്യക്തമാക്കി. റാങ്ക് ജേതാക്കളെ മന്ത്രി ഫോണിൽ വിളിച്ച് അഭിനന്ദിച്ചു. വരും ദിവസങ്ങളിൽ പ്രവേശന നടപടികൾ ആരംഭിക്കുമെന്നും വിദ്യാർഥികൾ ഔദ്യോഗിക വെബ്സൈറ്റ് സന്ദർശിക്കണമെന്നും അധികൃതർ നിർദ്ദേശിച്ചു.

 റോഷൻ രാജു