നിതിൻരാജിൻ്റെ ആത്മഹത്യ : അധ്യാപകരെ സ്ഥാപനത്തില് നിന്ന് പിരിച്ചുവിടണമെന്ന ആവശ്യം ശക്തമാകുന്നു
കണ്ണൂര്: അഞ്ചരക്കണ്ടി ഡെന്റല് കോളേജ് വിദ്യാര്ത്ഥി നിതിന് രാജിന്റെ മരണത്തിന് പിന്നാലെ അധ്യാപകര്ക്കെതിരെ വ്യാപക പ്രതിഷേധം ഉയരുന്നു. നിതിന് രാജിനെ ജാതീയമായും നിറത്തിന്റെ പേരിലും അധിക്ഷേപിച്ചിരുന്ന അധ്യാപകരെ സ്ഥാപനത്തില് നിന്ന് പിരിച്ചുവിടണമെന്നാണ് ആവശ്യമുയരുന്നത്. ആക്ടിവിസ്റ്റ് ടി എസ് ശ്യാം കുമാർ അടക്കമുള്ളവർ ഈ ആവശ്യം ഉന്നയിച്ച് ഇതിനകം രംഗത്ത് വന്നിട്ടുണ്ട്.ഡോ. എം കെ റാം, ഡോ. സംഗീത നമ്പ്യാര് എന്നീ അധ്യാപകര് തന്നെ നിരന്തരമായി അധിക്ഷേപിച്ചതിനെ കുറിച്ച് നിതിന് രാജ് സുഹൃത്തുക്കളോടും കുടുംബാംഗങ്ങളോടും പല തവണ സംസാരിച്ചിട്ടുണ്ട്.അവസാനമായി സുഹൃത്തുക്കൾക്ക് അയച്ച വാട്സ്ആപ്പ് ഓഡിയോ സന്ദേശത്തിലും തനിക്കെതിരെ നടക്കുന്ന ക്രൂരതകൾ നിതിൻരാജ് കൃത്യമായി പറയുന്നുണ്ട്.
നിതിന് രാജിന്റെ മരണത്തിന് പിന്നാലെ ഈ അധ്യാപകരെ കോളേജില് നിന്ന് സസ്പെന്ഡ് ചെയ്തിരുന്നു.സസ്പെന്ഷന് മാത്രം മതിയാകില്ലെന്നും ഒരു വിദ്യാര്ത്ഥിയുടെ മരണത്തിന് വഴിവെച്ചവര്ക്കെതിരെ ഏറ്റവും കര്ശനമായ നടപടികള് വേണമെന്നുമാണ് സമൂഹത്തിന്റെ വിവിധ മേഖലകളില് നിന്നുള്ളവര് ആവശ്യപ്പെടുന്നത്. എസ്എഫ്ഐ, കെഎസ്യു തുടങ്ങിയ വിദ്യാര്ത്ഥി സംഘടനകളും സംഭവത്തില് പഴുതടച്ച അന്വേഷണം വേണമെന്ന് ആവശ്യപ്പെട്ട് രംഗത്ത് വന്നിട്ടുണ്ട്.