ഇ-ഡെലിവറി പ്ലാറ്റ്ഫോമുകൾക്ക് കുവൈറ്റ് പുതിയ നിയമങ്ങൾ പുറത്തിറക്കി
കുവൈത്ത് സിറ്റി: കുവൈത്തിലെ ഓൺലൈൻ ഇ-ഡെലിവറി സേവന മേഖലയിൽ സുപ്രധാനമായ പുതിയ നിയന്ത്രണങ്ങളും ചട്ടങ്ങളും ഏർപ്പെടുത്തി വാണിജ്യ-വ്യവസായ മന്ത്രാലയം ഉത്തരവിറക്കി. പുതിയ ചട്ടപ്രകാരം, രാജ്യത്ത് ഇ-ഡെലിവറി സേവനങ്ങൾ നടത്തുന്ന കമ്പനികളും തങ്ങളുടെ വാണിജ്യ ലൈസൻസ് ഇന്റർനാഷണൽ ക്ലാസിഫിക്കേഷൻ അനുസരിച്ചുള്ള ‘ഇലക്ട്രോണിക് പ്ലാറ്റ്ഫോമുകൾ വഴിയുള്ള ഡെലിവറി സേവനങ്ങളുടെ മാനേജ്മെന്റ്’എന്ന പ്രത്യേക പ്രവർത്തന വിഭാഗത്തിലേക്ക് നിർബന്ധമായും മാറ്റണം. ഇതിനായി കമ്പനികൾക്ക് 2026 സെപ്റ്റംബർ 1 വരെയാണ് മന്ത്രാലയം സമയം അനുവദിച്ചിട്ടുള്ളത്.
വാണിജ്യ-വ്യവസായ മന്ത്രി ഒസാമ അബ്ദുൽ മുഹ്സിൻ അൽ ബുദൈ പുറത്തിറക്കിയ 109/2026-ാം നമ്പർ ചരിത്രപരമായ മന്ത്രിതല ഉത്തരവ് ഔദ്യോഗിക ഗസറ്റായ ‘കുവൈത്ത് അൽ-യൗം’ പ്രസിദ്ധീകരിച്ചു. ഭക്ഷണ വിതരണത്തിന് പുറമെ ഗ്രോസറി, ഫാർമസി ഉൾപ്പെടെയുള്ള മുഴുവൻ ഓൺലൈൻ ഡെലിവറി ആപ്പുകൾക്കും പ്ലാറ്റ്ഫോമുകൾക്കും ഈ പുതിയ ചട്ടം ബാധകമായിരിക്കും.ഈ പുതിയ ഉത്തരവ് പ്രാബല്യത്തിൽ വന്നതിന് ശേഷം പ്ലാറ്റ്ഫോമുകൾ ഉപഭോക്താക്കളുമായും റസ്റ്റോറന്റുകൾ ഉൾപ്പെടെയുള്ള സേവനദാതാക്കളുമായും ഒപ്പിടുന്ന എല്ലാ പുതിയ കരാറുകളും പരിഷ്കരിച്ച ചട്ടങ്ങൾക്ക് അനുസൃതമായിരിക്കണം. നിലവിലുള്ള പഴയ കരാറുകളും സെപ്റ്റംബർ ഒന്നിന് മുമ്പ് ഭേദഗതി ചെയ്ത് നിയമാനുസൃതമാക്കേണ്ടതുണ്ട്. എന്നാൽ പുതിയ ഉത്തരവ് പ്രശാസിക്കുന്ന നിശ്ചിത കമീഷൻ പരിധിക്കുള്ളിലുള്ള നിലവിലെ കരാറുകൾക്ക് അവയുടെ കാലാവധി അവസാനിക്കുന്നതുവരെ മാറ്റമില്ലാതെ തുടരാൻ അനുമതിയുണ്ടാകും.
വിപണിയിലെ ന്യായമായ മത്സരം ഉറപ്പാക്കുന്നതിനും കുത്തക-അന്യായ വ്യാപാരരീതികൾ പൂർണ്ണമായും തടയുന്നതിനുമായി മത്സര സംരക്ഷണ അതോറിറ്റി അംഗീകരിച്ച കൃത്യമായ മാനദണ്ഡങ്ങൾ ഡെലിവറി കമ്പനികൾ പാലിക്കണമെന്ന് ഉത്തരവിൽ പ്രത്യേകം നിർദേശിക്കുന്നുണ്ട്. ഇതിന്റെ ഭാഗമായി ഡെലിവറി സേവനങ്ങളിലെ കമീഷൻ നിരക്കുകൾക്കും വിതരണ വ്യവസ്ഥകൾക്കും കർശനമായ സാമ്പത്തിക പരിധിയും മന്ത്രാലയം നിശ്ചയിച്ചിട്ടുണ്ട്.സെപ്റ്റംബർ ഒന്നിനകം പുതിയ ചട്ടങ്ങൾ പാലിച്ച് പ്രവർത്തനങ്ങൾ ക്രമീകരിക്കാത്തതോ നിയമലംഘനം നടത്തുന്നതോ ആയ ഇ-ഡെലിവറി സ്ഥാപനങ്ങൾക്കെതിരെ ലൈസൻസ് റദ്ദാക്കൽ ഉൾപ്പെടെയുള്ള കടുത്ത നിയമനടപടികൾ സ്വീകരിക്കുമെന്ന് വാണിജ്യ-വ്യവസായ മന്ത്രാലയം ശക്തമായ മുന്നറിയിപ്പ് നൽകി.അതേസമയം, റെസ്റ്റോറന്റുകളുടെയും ഭക്ഷ്യവിതരണ സേവനങ്ങളുടെയും പ്രവർത്തനം മാത്രം ലക്ഷ്യമിട്ട് മുൻപ് പുറപ്പെടുവിച്ചിരുന്ന 10/2026-ാം നമ്പർ മന്ത്രിതല ഉത്തരവ് പൂർണ്ണമായും റദ്ദാക്കിയതായും മന്ത്രാലയം അറിയിച്ചു. പുതിയ സമഗ്ര ഉത്തരവ് ഔദ്യോഗിക ഗസറ്റിൽ പ്രസിദ്ധീകരിച്ച തീയതി മുതൽ രാജ്യത്ത് പ്രാബല്യത്തിൽ വന്നു കഴിഞ്ഞു.