വ്യാജ ഗർഭച്ഛിദ്രം റാക്കറ്റ്; പൂനെയിൽ ഗൈനക്കോളജിസ്റ്റ് അറസ്റ്റിൽ, വനിതാ ഡോക്ടർ ഒളിവിൽ

പൂനെ:  ഗ്രാമീണ മേഖല കേന്ദ്രീകരിച്ച് വർഷങ്ങളായി പ്രവർത്തിച്ചിരുന്ന വൻ നിയമവിരുദ്ധ ഗർഭച്ഛിദ്ര, ലിംഗനിർണ്ണയ റാക്കറ്റിലെ മുഖ്യസൂത്രധാരനായ ഗൈനക്കോളജിസ്റ്റിനെ പോലീസ് അറസ്റ്റ് ചെയ്തു . സംഭവവുമായി ബന്ധമുള്ള ഒരു വനിതാ ഡോക്ടർ ഒളിവിൽ പോയതായി പോലീസ് അറിയിച്ചു. പൂനെ ജില്ലയിലെ ദൗണ്ട് , കേഡ്ഗാവ്, ലോഹഗാവ് പരിസരങ്ങളിൽ വ്യാപിച്ചുകിടക്കുന്ന വലിയൊരു ശൃംഖലയെയാണ് പോലീസ് തകർത്തത്.രഹസ്യ വിവരത്തിന്റെ അടിസ്ഥാനത്തിൽ ആരോഗ്യവകുപ്പ് ഉദ്യോഗസ്ഥരും പൂനെ റൂറൽ പോലീസും സംയുക്തമായി നടത്തിയ റെയ്ഡിലാണ് ഞെട്ടിക്കുന്ന വിവരങ്ങൾ പുറത്തുവന്നത്.

അനധികൃതമായി ഗർഭസ്ഥ ശിശുവിന്റെ ലിംഗനിർണ്ണയ പരിശോധന നടത്തുകയും തുടർന്ന് പെൺഭ്രൂണങ്ങളാണെന്ന് കണ്ടെത്തിയാൽ വ്യാജമായി ഗർഭച്ഛിദ്രം  നടത്തിക്കൊടുക്കുകയുമായിരുന്നു ഈ സംഘത്തിന്റെ പ്രധാന രീതി. കഴിഞ്ഞ രണ്ട് വർഷത്തിനിടെ അഞ്ഞൂറിലധികം നിയമവിരുദ്ധ ഗർഭച്ഛിദ്രങ്ങൾ ഈ റാക്കറ്റ് വഴി നടന്നിട്ടുണ്ടെന്നാണ് പോലീസിന്റെ പ്രാഥമിക നിഗമനം.പരിശോധനകൾക്കായി ഒളിപ്പിച്ചുവെച്ച നിലയിലുള്ള അനധികൃത സോണോഗ്രഫി മെഷീനുകളും മെഡിക്കൽ ഉപകരണങ്ങളും പോലീസ് റെയ്ഡിൽ പിടിച്ചെടുത്തു. ലിംഗനിർണ്ണയ പരിശോധനകൾക്കായി ഓരോ സ്ത്രീകളിൽ നിന്നും 50,000 രൂപ വീതമാണ് ഇവർ ഈടാക്കിയിരുന്നത്. സംഭവത്തിൽ അറസ്റ്റിലായ ഗൈനക്കോളജിസ്റ്റിനെ കോടതിയിൽ ഹാജരാക്കി പോലീസ് കസ്റ്റഡിയിൽ വാങ്ങി. ഒളിവിൽ പോയ വനിതാ ഡോക്ടർക്കായി പോലീസ് തിരച്ചിൽ ഊർജിതമാക്കിയിട്ടുണ്ട്.ഈ റാക്കറ്റിന് പിന്നിൽ പത്തോളം മറ്റ് പ്രാദേശിക ഡോക്ടർമാർക്കും ഏജന്റുമാർക്കും പങ്കുണ്ടെന്ന് പോലീസ് സംശയിക്കുന്നു. സംഭവത്തിന്റെ ഗൗരവം കണക്കിലെടുത്ത് സംസ്ഥാന ആരോഗ്യ മന്ത്രാലയം പ്രത്യേക അന്വേഷണത്തിന് ഉത്തരവിടുകയും രണ്ടോ മൂന്നോ ദിവസത്തിനകം വിശദമായ റിപ്പോർട്ട് സമർപ്പിക്കാൻ നിർദ്ദേശിക്കുകയും ചെയ്തിട്ടുണ്ട്. പൂനെ റൂറൽ പോലീസ് സൂപ്രണ്ടിന്റെ മേൽനോട്ടത്തിൽ കേസിൽ വിശദമായ അന്വേഷണം പുരോഗമിക്കുകയാണ്.