‘ഓപ്പറേഷൻ ഓൾ ഔട്ട്’; ഛത്രപതി സംഭാജിനഗറിൽ 72 പേർക്കെതിരെ കേസ്; 1.18 കോടിയുടെ ആസ്തികൾ പിടിച്ചെടുത്തു

മുംബൈ: മഹാരാഷ്ട്രയിലെ ഛത്രപതി സംഭാജിനഗറിൽ (ഔറംഗബാദ്) കുറ്റകൃത്യങ്ങൾ അടിച്ചമർത്തുന്നതിൻ്റെ  ഭാഗമായി പോലീസ് ആരംഭിച്ച  ‘ഓപ്പറേഷൻ ഓൾ ഔട്ട്’ ൽ, നഗരത്തിലുടനീളമുള്ള പരിശോധനകളിൽ വിവിധ നിയമവിരുദ്ധ പ്രവർത്തനങ്ങളിൽ ഏർപ്പെട്ട 72 പേർക്കെതിരെ കേസെടുത്തതായി പോലീസ് അധികൃതർ അറിയിച്ചു.റെയ്ഡുകളുടെ ഭാഗമായി വിവിധ സംഘങ്ങളിൽ നിന്നും കുറ്റവാളികളിൽ നിന്നുമായി ഏകദേശം 1.18 കോടി രൂപ വിലമതിക്കുന്ന അനധികൃത ആസ്തികളും വാഹനങ്ങളും മറ്റ് സാമഗ്രികളും പോലീസ് പിടിച്ചെടുത്തു. നഗരത്തിലെ ക്രമസമാധാന നില തകിടം മറിക്കുന്നവർക്കെതിരെ കർശന നടപടി സ്വീകരിക്കുന്നതിന്റെ ഭാഗമായാണ് പോലീസ് കമ്മീഷണറുടെ പ്രത്യേക നിർദ്ദേശപ്രകാരം ഈ ഓപ്പറേഷൻ നടത്തിയത്.ശനിയാഴ്ച രാത്രി മുതൽ ഞായറാഴ്ച പുലർച്ചെ വരെ നഗരത്തിലെ വിവിധ പോലീസ് സ്റ്റേഷൻ പരിധികളിൽ ഒരേസമയമാണ് പരിശോധനകൾ നടന്നത്. റെക്കോർഡുകളിലുള്ള കുറ്റവാളികൾ, മുൻപ് ജയിൽശിക്ഷ അനുഭവിച്ചവർ, വധശ്രമക്കേസുകളിലെ പ്രതികൾ എന്നിവരുടെ വീടുകളിലും ഒളിത്താവളങ്ങളിലും പോലീസ് സംഘം നേരിട്ടെത്തി പരിശോധന നടത്തി. കൂടാതെ നഗര അതിർത്തികളിൽ കർശനമായ വാഹന പരിശോധനയും ഏർപ്പെടുത്തിയിരുന്നു.

പിടിയിലായവരിൽ നിന്നും മാരകായുധങ്ങൾ, നിരോധിത ലഹരിവസ്തുക്കൾ, കണക്കിൽപ്പെടാത്ത പണം എന്നിവ കണ്ടെടുത്തു. വരും ദിവസങ്ങളിലും നഗരത്തിൽ സമാധാനം നിലനിർത്തുന്നതിനായി ഇത്തരം കർശനമായ പരിശോധനകൾ തുടരുമെന്ന് പോലീസ് ഉദ്യോഗസ്ഥർ വ്യക്തമാക്കി. ജനങ്ങളുടെ സുരക്ഷ ഉറപ്പാക്കുന്നതിൽ യാതൊരുവിധ വിട്ടുവീഴ്ചയും ഉണ്ടാകില്ലെന്ന് ഛത്രപതി സംഭാജിനഗർ പോലീസ് മുന്നറിയിപ്പ് നൽകി.