രമേഷ് നായരുടെ ചിത്രപ്രദർശനം ജഹാംഗീർ ആർട്ട്ഗ്യാലറിയിൽ

മുംബൈ : മുംബൈ മലയാളിയും  പ്രമുഖ ചിത്രകാരനുമായ രമേഷ് നായരുടെ ചിത്രപ്രദർശനം ജഹാംഗീർ ആർട്ട്ഗ്യാലറിയിൽ ആരംഭിച്ചു.'Reconstructing Fragments' എന്നു നാമകരണം ചെയ്ത പ്രദർശനം ഇതിനകംതന്നെ  ജനശ്രദ്ധ നേടിക്കഴിഞ്ഞു.

ഇന്ത്യയിലും വിദേശരാജ്യങ്ങളിലും നിരവധി ചിത്രപ്രദർശനങ്ങൾ നടത്തിയ രമേഷ് നായർ മുംബൈയിൽ താനെയിൽ താമസിക്കുന്നു.ഒരു ഇല്ലസ്ട്രേറ്ററായി നഗര ജീവിതം  ആരംഭിച്ച്‌  പിന്നീട്  നിരവധി പ്രമുഖ പരസ്യ ഏജൻസികൾക്ക് വേണ്ടി അദ്ദേഹം കലാസംവിധായകനായി പ്രവർത്തിച്ചു. നവംബർ 11ന് മുംബൈയിലെ  ജഹാംഗീർ ആർട്ട്ഗ്യാലറിയിൽ  ആരംഭിച്ച ചിത്രപ്രദർശനം 17 ന് അവസാനിക്കും.  

 ആധുനിക കലയിലെ സാങ്കേതിക ശൈലിയായ ക്യൂബിസത്തിലൂടെ  ഓർമ്മ, ഭാവന, കാഴ്ചപ്പാട് എന്നീ  ത്രിമാനതയെ  എങ്ങനെ ഒത്തുചേർത്ത്  ഒരു സ്ഥലത്തെ പുനർനിർമ്മിക്കുന്നു എന്ന് നിറങ്ങളുടെയും രേഖകളുടെയും ആലേഖനത്തിലൂടെ ആവിഷ്ക്കരിക്കുകയാണ് 'Reconstructing Fragments' ലൂടെരമേഷ് നായർ. 

പരമ്പരാഗത ക്യൂബിസത്തിന്റെ നിയന്ത്രണങ്ങളിൽ നിന്ന് മാറി, ഈ കൃതികൾ ഘടനാപരമായ ഉപകരണങ്ങളായി നിറങ്ങളെയും നിഴലുകളെയും സ്വീകരിക്കുന്നു. പൊളിച്ചുമാറ്റിയ ശകലങ്ങൾ അവയുടെ ഉത്ഭവത്തിന്റെ നിഴൽ നിലനിർത്തിക്കൊണ്ട്, പുനഃസമാഹരണത്തിന് പുതിയ മാനം നൽകുന്ന നൂതന രചനകളായി പുനഃക്രമീകരിക്കപ്പെടുന്നു. അങ്ങനെ ചെയ്യുമ്പോൾ,  അദ്ദേഹത്തിൻ്റെ  ചിത്രങ്ങൾ കാലത്തിലൂടെയുള്ള ഒരു യാത്രയെ രേഖപ്പെടുത്തുന്നുമുണ്ട് .

 വ്യത്യാസവും സമാനതയും, പിരിമുറുക്കവും ഐക്യവും ഒരു ഫ്രെയിമിനുള്ളിൽ എങ്ങനെ ഒന്നിച്ചുനിൽക്കുമെന്ന്  ഇവ കാണിക്കുന്നു. പൊളിച്ചുമാറ്റലും പുനഃസംയോജിപ്പിക്കലും എന്ന ഈ പ്രക്രിയയിലൂടെ, പാളികളായ കാഴ്ചപ്പാടുകളിൽ നിന്ന് പുതിയ ലോക ദർശനം ഉയർന്നുവരുന്നത് തൻ്റെ ഭാവനയിലൂടെ രമേഷ്‌നായർ ക്യാൻവാസുകളിൽ  ആവിഷ്ക്കരിച്ചിരിക്കുകയാണ്.

തലശ്ശേരിസ്വദേശിയായ രമേഷ്‌ നായർ   തലശ്ശേരി  കേരള സ്കൂൾ ഓഫ് ആർട്‌സിൽ നിന്ന് ഡ്രോയിംഗിലും പെയിന്റിംഗിലും ഡിപ്ലോമ നേടിയാണ്  മുംബൈയിലെത്തുന്നത്.. വർഷങ്ങളായുള്ള   മഹാനഗര ജീവിതം അനുഭവിപ്പിച്ച   ബഹുസാംസ്കാരിക അന്തരീക്ഷമാണ്  തൻ്റെ  കലാപരമായ ആവിഷ്കാരത്തെ വിശാലമാക്കിയതെന്നും അതിനുശേഷമാണ് ഇന്ത്യയുടെ വിവിധഭാഗങ്ങളിലും    ബാങ്കോക്ക് , ദുബായ് പോലുള്ള  വിദേശരാജ്യങ്ങളിലും  തൻ്റെ സൃഷ്ടികൾക്ക് ഇടം കണ്ടെത്താൻ കഴിഞ്ഞതെന്നും അദ്ദേഹം പറയുന്നു. കേരളത്തിന്റെ സാംസ്കാരിക സ്മരണകളിൽ നിന്ന് മുംബൈയുടെ ചലനാത്മകമായ നഗരഘടനയിലേക്കുള്ള  യാത്ര - ക്യൂബിസത്തിലെ അദ്ദേഹത്തിന്റെ പര്യവേഷണങ്ങളുടെ പശ്ചാത്തലമായി മാറുന്നു.  വ്യതിരിക്തമായ വിശകലന ക്യൂബിസ്റ്റ് ശൈലിയെ പ്രതിഫലിപ്പിക്കുന്ന അദ്ദേഹത്തിന്റെ "ബ്രിക്കോളൂർ ഓഫ് സ്പേസ്" എന്ന പരമ്പരയിൽനിന്നുള്ള ചിത്രങ്ങളാണ് പ്രദർശനത്തിനായി ഒരുക്കിയിട്ടുള്ളത്. 

രാവിലെ 11 മണിമുതൽ വൈകുന്നേരം 7 മണിവരെയാണ് പ്രദർശന സമയം