'ഒറ്റഞാവൽമരം' നാളെ നെരൂളിൽ

മുംബൈ: 2023-ൽ ഉർവശിക്കൊപ്പം മികച്ച നടിയായി പുരസ്കൃതയായ ബീന ആർ ചന്ദ്രൻ അഭിനയിക്കുന്ന 'ഒറ്റഞാവൽമര'മെന്ന ഏകപാത്ര നാടകം നാളെ വൈകിട്ട് 6.59 ന് നവി മുംബൈയിലെ നെരൂൾ സമാജത്തിലെ മൂന്നാം നിലയിലെ ഹാളിൽ  അരങ്ങേറും. മികച്ച നടിക്കുള്ള സംസ്ഥാന പുരസ്കാരം നേടിയ നടി ബീന ആർ. ചന്ദ്രൻ ഇതാദ്യമായാണ് മുംബൈയിൽ നാടകവുമായി എത്തുന്നത്.മികച്ച നവാഗത സംവിധായകനുള്ള അവാർഡ് ലഭിച്ച ഫാസിൽ റസാഖിന്റെ ‘തടവ്’ എന്ന സിനിമയിലെ വേഷത്തിനായിരുന്നു സംസ്‌ഥാന ചലച്ചിത്ര പുരസ്കാരം. ആദ്യ സിനിമയ്ക്ക് തന്നെ സംസ്ഥാനത്തിൻ്റെ  അംഗീകാരം നേടിയ നടി.

നാടകവേദികളിൽ സജീവമായ ബീന ആർ. ചന്ദ്രൻ, മാധവിക്കുട്ടിയുടെ കഥ ‘വേനലിന്റെ ഒഴിവ്’ അടിസ്ഥാനമാക്കി കെ.വി. ശ്രീജ രചിച്ച ‘ഒറ്റ ഞാവൽ മരം’ എന്ന ഏകപാത്ര നാടകത്തിലെ അഭിനയത്തിലൂടെ ആഗോള ശ്രദ്ധയും നേടി.   ഈ നാടകത്തിൻ്റെ  സംവിധാനം  നിർവഹിച്ചത് സി.എം. നാരായണനാണ് . കലാപാഠശാല ആറങ്ങോട്ടുകരയുടെ അവതരണത്തിലാണ് ഈ നാടകം പ്രേക്ഷകരുടെ മുൻപിലെത്തുന്നത്.വിവിധ നാടകസംഘങ്ങളിൽ പ്രവർത്തിച്ചിട്ടുള്ള ബീന ആർ. ചന്ദ്രൻ, കലാപാഠശാലയുടെ മുപ്പതോളം നാടകങ്ങളിൽ അഭിനയിച്ചിട്ടുണ്ട്.അധ്യാപികയായ ബീന ആർ. ചന്ദ്രൻ പട്ടാമ്പി പരുതൂർ സ്വദേശിനിയാണ്.

നാടകാവതരണത്തിനെ തുടർന്ന് നടിയുമായി മുഖാമുഖവും അരങ്ങേറും.

"നിങ്ങള് നിങ്ങളെ മാത്രം ഇഷ്ടപ്പെടല്ലപ്പാ" , "പെരുത്ത ഭൂമീന്റെ ഉള്ളിന്റുള്ളില് ഒരു ചെറിയ ഭൂമീണ്ട്"- തുടങ്ങിയ പാട്ടുകളുടെ രചയിതാവും നാടക പ്രവർത്തകനുമായ കെ വി വിജേഷിന് ഇപ്റ്റ കേരള മുംബൈ ഘടകം ശ്രദ്ധാഞ്ജലിയും അർപ്പിക്കും.