കേരള വിഷു ബമ്പര് ഭാഗ്യക്കുറി നറുക്കെടുപ്പ് അൽപ്പസമയത്തിനകം നടക്കും
തിരുവനന്തപുരം: കേരള സംസ്ഥാന ഭാഗ്യക്കുറിയുടെ വിഷു ബമ്പര് ഭാഗ്യക്കുറി നറുക്കെടുപ്പ് ഇന്ന് നടക്കും. നറുക്കെടുപ്പ്ഉച്ചയ്ക്ക് രണ്ടിന് തിരുവനന്തപുരം ഗോർഖി ഭവനിൽ നടക്കും. വിഷു ബമ്പർ നേടുന്ന ഭാഗ്യവാന് 12 കോടി രൂപയാണ് ഒന്നാം സമ്മാനമായി ലഭിക്കുക. ഒന്നാം സമ്മാനം നേടുന്ന അതേ അക്കം വരുന്ന മറ്റ് അഞ്ച് പരമ്പരകള്ക്ക് ഒരു ലക്ഷം രൂപയുടെ സമാശ്വാസ സമ്മാനവും ലഭിക്കും.ഇത്തവണ അച്ചടിച്ച മുഴുവൻ ടിക്കറ്റുകളും വിറ്റു തീർന്നു. അച്ചടിച്ച 45 ലക്ഷം ടിക്കറ്റുകളും ഏജന്റുമാർക്ക് വിറ്റുകഴിഞ്ഞു. ഇതൊരു റെക്കോഡാണ്. കഴിഞ്ഞ വർഷം 42,87,350 എണ്ണം വിഷു ബമ്പർ ടിക്കറ്റുകൾ ആയിരുന്നു വിറ്റത്. പാലക്കാട് ജില്ലയിലാണ് ഏറ്റവും കൂടുതൽ ടിക്കറ്റുകൾ വിറ്റത്, 11,58,480 എണ്ണം. തൃശൂരിൽ 5,10,820, തിരുവനന്തപുരം 4,21,380 എന്നിങ്ങനെയാണ് മറ്റു ജില്ലകളിലെ കണക്ക്.
കേരള സര്ക്കാരിന്റെ പ്രധാന വരുമാന സ്രോതസ്സുകളില് ഒന്നാണ് ലോട്ടറി. ദിനംപ്രതി നറുക്കെടുന്ന ടിക്കറ്റുകള്ക്കു പുറമേ ബംബര് ടിക്കറ്റുകളും സര്ക്കാര് പുറത്തിറക്കാറുണ്ട്. ഓണം, വിഷു, ക്രിസ്മസ്, പൂജ എന്നിവയോടനുബന്ധിച്ചാണ് ബംബര് ടിക്കറ്റുകള് പുറത്തിറക്കാറുളളത്. ഇതിനു പുറമേ മണ്സൂണ്, സമ്മര് ബംബര് ടിക്കറ്റുകളുമുണ്ട്.